Вести
Јемен: Над 62 лица убиени и 452 ранети во Аден од средата

Повеќе од 62 лица беа убиени и 452 се ранети во јужното јеменско пристаниште Аден од средата кога започна воената интервенција на Саудиска Арабија, изјавил претставник на министерството за здравство.
Во експлозијата во најголемиот градски магацин со муниција во саботата најмалку девет луѓе се тешко повредени.
Жителите на Аден известија за жестоките судири меѓу припадниците на бунтовничката шиитска милиција од племето Хути и мнозинските сунитски племенски борци на југот од земјата, додека саудиските воздушни напади се обидуваат да ја запрат новата офанзива на шиитската милиција врз Аден од истокот.
Во саботата саудиските сили од воздух ја гаѓале базата на Хутите со ракети од долг дострел. Се верува дека јеменската армија има околу 300 „скадови“ и оти повеќето од нив паднале во рацете на шиитската милиција и се распоредени по должината на границата со Саудиска Арабија.
Интервенцијата на Ријад, која претставува изненадувачки потег на оваа конзервативна монархија позната повеќе по „покажување на мускулите“ на нафтените пазари отколку по воената сила, би требало да трае еден месец, но би можела да биде продолжена на пет па дури и шест месеци, изјавил за Reuters неименуван дипломатски извор.
Од јеменската престолнина Сана, којашто од септември е под контрола на милицијата на Хутите, евакуирани се повеќе од сто службеници на Обединетите нации, рекол извор од светската организација. Вработените на аеродромите изјавиле дека други десетици странци коишто работата за мултинационалните нафтени компании и невладини организации, исто така, го напуштиле Јемен. Десетици дипломати со бродови на саудиската воена морнарица, беа префрлени од Аден во Џеда, пристаниште во Црвеното Море, објави претходно во саботата саудиската државна телевизија.
Хутите, кои ја имаат поддршката на Иран, ги принудија јеменскиот претседател Абд Раба Мансур Хади, под изговор дека не презема ништо против сунитските бунтовници блиски на Ал Каеда кои контролираат области на северот од земјата, да го напушти главниот град и да побегне во Аден. Јеменските сунитски соседи во Персискиот залив го осудија заземањето на престолнината Сана и го нарекоа државен удар, и му дадоа поддршка на претседателот Хади.
Очевидци за AFP изјавија дека конвој на Хутите, во кои имало оклопни возила, тенкови и воени камиони, кој се движел по крајбрежниот автопат кон пристаништето Аден бил пооден од борбени авиони пред мугрите во саботата, како и дека имало повеќе погодени возила.
На самитот на Арапската лига во египетското одморалиште Шерм ел-Шејк кој започна во саботата, Хади ја повика јеменската војска да ги штити државните институции и да ги почитува наредбите на јеменското „легитимно раководство“. Ја истакна и регионалната димензија нарекувајќи ги Хутите „иранска марионета“.
Египетскиот претседател Абдел Фатах ал-Сиси отворајќи го панарапскиот самит ја повтори својата поддршка за основањето на мултинационалните арапски сили, истакнувајќи дека регионот е соочен со терористички закани „без преседан“.
Генералниот секретар на ОН, Бан Ки-мун, изјави пред арапските челници на самитот дека единствен начин да се спречи продолжувањето на судирите во Јемен е да се покренат преговори со посредство на ОН. „Преговорите со посредство на мојот специјален претставник Џамал Беномар и со одобрение на Советот за безбедност се единствената шанса за спречување на долготраен судир“, додаде Бан./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Вести
“Во основа е пекол на земјата”: Градот Газа оставен тотално без здравствената заштита

Во раните утрински часови во саботата, над купови бетон и урнатини, толпа лекари и пациенти пешачеа километри низ уништените улици на градот Газа, принудени да се евакуираат пеш од она што остана од болниците. Здравствените работници велат дека се плашат да ги оставаат критично болните пациенти зад себе во град кој сега во голема мера е сведен на урнатини, преземен израелските сили, со болници кои работат без струја, гориво, вода или храна, пишува британски „Гардијан“.
“Тоа е во основа пекол на земјата”, вели Вилијам Шомбург, шефот на Меѓународниот комитет на Црвениот крст во Газа, опишувајќи го она што остана од животот во градот.
Со недели, десетици илјади луѓе се надеваа дека во болниците во Газа ќе најдат засолниште кое е најблиску до безбедно бидејќи енклавата издржа интензивирачки бомбардирања.
Но, откако израелските сили се приближија до објектите и потоа ја нападнаа најголемата болница во Газа, Дар ал-Шифа минатата недела, илјадници луѓе беа раселени заедно со медицинскиот персонал, шетајќи низ уништените улици на југ од енклавата.
Палестинското министерство за здравство во Газа соопшти дека израелските сили побарале евакуација на болницата Ал Шифа вчераутро, три дена откога влегоа во објектот. Здравствените лица сведочат дека им им било кажано дека имаат еден час да ја евакуираат болницата која беше центар на здравствениот систем на Газа.
Најмалку 12.000 луѓе загинаа во израелскиот напад врз Газа по нападот на Хамас на 7-ми октомври, во кој загинаа 1.200 Израелци, а околу 240 луѓе беа заложници.
Вести
Борел: Целосно е невозможно да се евакуираат милиони луѓе од северот на Газа

Првиот човек на ЕУ-дипломатијата Жозеп Борел утринава на прес-конференција изјави дека евакуацијата на милиони луѓе од северниот дел на Газа е целосно невозможна.
Десетици илјади цивили почнаа да бегаат од јужниот дел на Газа вчера, откако Израел им порача на луѓето да ја напуштат областа пред очекуваната копнена офанзива.
„Да се замисли дека можеш да преселиш милион луѓе за 24 часа во ситуација во каква што е Газа, може да биде само хуманитарна криза“, рече Борел на последниот ден од тридневната дипломатска посета на Кина.
И покрај изјавата на ЕУ за поддршка на Израел, тој исто така предупреди дека и Израел е должен да го почитува меѓународното хуманитарно право во одбранбениот процес.
„Позицијата е јасна“, рече Борел. „Но, како и секое право, тоа има граница. А таа граница е меѓународното право“.
Вести
Проценки на ОН: Десетици илјади луѓе веќе ја напуштија Газа

Во текот на ноќта беа објавени најновите проценки на ОН за бројот на луѓе кои ги напуштиле своите домови во северниот дел на Газа.
Тие велат дека веруваат дека станува збор за десетици илјади кои се упатиле кон југ по предупредувањето за евакуација на Израел.
Пред наредбата за евакуација, повеќе од 400.000 Палестинци беа внатрешно раселени, според хуманитарната канцеларија на ОН OCHA.
Израелската војска им порача на околу 1,1 милион луѓе во северниот дел на Газа да заминат пред очекуваната копнена инвазија. Хамас, пак, ги повика луѓето да останат на место и да пркосат на израелската воена наредба.
Генералниот секретар на ОН, Антонио Гутереш рече дека наредбата од Хамас е „исклучително опасна – и во некои случаи едноставно не е возможна“.