Обидот за воен преврат кој се одвиваше ноќта кон саботата е „црна дамка“ на турската демократија, но нацијата им даде „најдобар одговор на терористите“, изјави во саботата турскиот премиер Бинали Јилдирим.

Говорејќи на прес-конференцијата во Анкара пренесувана на телевизиите, турскиот премиер Бинали Јидлирим рече дека припадниците на „паралелните структури“, кој е термин со кој власта ги идентификува приврзаниците на исламскиот клерик Фетулах Ѓулен кој живее во доброволен егзил во американска Пенсилванија, ќе бидат изведени пред лицето на правдата.

Од вкупно 265 жртви Јилдирим изјави дека 161 лице убиени, кои ја поддржувале власта и околу 104 заговорници и нивни симпатизери,. а 1.440 граѓани се ранети во обидот за воен удар. „Во моментов притворени се 2.839 учесници во превратот“, изјави за новинарите турскиот премиер изразувајќи очекување дека тој број ќе расте.

„Која и да е земја којашто стои зад клерикот Ѓулен нема да биде сметана за пријател на Турција и ќе се смеа дека е во војна со членка на НАТО“, изјави Јилдирим повторувајќи дека приврзаниците на исламскиот проповедник и филозоф кој со години живее во доброволен егзил во САД а против него во Турција се водат неколку процеси, стојат зад обидот за воен удар.

Со години наназад владата го обвинува Ѓулен, поранешен близок истомисленик со турскиот претседател Реџеп Тајип Ердоган, дека се обидува да ја изгради „паралелната држава“ преку системот на образовни институции на различни нивоа, во судството, медиумите, полицијата и војската, како начин за преземање на власта.

Самиот Ѓулен ги одбива ваквите обвинувања, а во саботата утрото и нему блиското движење ја отфрли својата вмешаност во пучот истакнувајќи ја демократската процедура како па за освојување на власта.

Како водач на обидот за преврат, турските медиуми го идентификуваат поранешниот командант на воздухопловните сили Акин Езтурк. Агенцијата Dogan објави дека тој бил командант од 2013 до 2015 година и требало да биде сменет на 30-ти август 2016 година. Меѓутоа, се верува дека тој требало да биде изведен пред воени суд, поради можна поврзаност со Ѓулен.

Езтурк и претходно бил сомничен дека може да поведе воен преврат, и речиси околу една година бил опсервиран од службите.

Според Јулдирим, ситуацијата е „целосно под контрола“, а воените команданти на своите места.

Министерот задолжен за односи со ЕУ, Омер Челик, малку претходно за приватната телевизијa NTV изјави дека ситуацијата околу пучот „е 90 отсто под контролата“, иако некои воени команданти сé уште се заложници во рацете на заговорниците.

Според агенцијата Reuters станува збор за фрегата „Јавуз“, која често навлегува во грчктие територијални води, и го земале како заложник командантот на флотата. Фрегатата била одземена од базата „Ѓелџук“.

„Ударот дефинитивно пропадна“, изјави челникот на националната разузнавачка служба Хакан Фидан. „Систематските операции се речиси завршени“, изјави Фидан признавајќи дека има уште „изолирани случаи“, но дека „95 отсто“ од заговорниците се откриени.

Грчкото министерство за внатрешни работи извести дека на северот од Грција слетал еден турски воен хеликоптер, како и дека осумте лица кои биле во него, од кои седум биле во воени униформи, побарале азил како и дека по излегувањето од хеликоптерот биле уапсени.

Инаку границите кон Бугарија и кон Грција се затворени набрзо по синоќешниот обид за државен преврат.

Побунета фракција во турските вооружен исили во текот на ноќта се обиде да ја урне владата користејќи тенкови и хеликоптери, но тие беа запрени од граѓаните кои излегоа на улиците за да му дадат поддршка на претседателот Ердоган.

Во меѓувреме турската владина агенција Anadolu извести повикувајќи се на воздухопловните власти, дека турскиот воздушен простор над северозападната покраина Мармарис ќе биде затворен за цивилни авиони во следните 18 часа. /крај/мф/сн

Извор: Макфакс