Катарскиот емир Шеик Тамим бен Хамад ал-Тани во средата во Берлин во разговорот со германската канцеларка Ангела Меркел се дистанцираше од Исламска држава и го демантираше дека оваа радикална сунитска групација ја ужива поддршката од владата на неговата земја.
 

Катарскиот емир Шеик Тамим бен Хамад ал-Тани во средата во Берлин во разговорот со германската канцеларка Ангела Меркел се дистанцираше од Исламска држава и го демантираше дека оваа радикална сунитска групација ја ужива поддршката од владата на неговата земја.

Веќе подолг период светските медиуми повикувајќи се на дипломатски извори го обвинуваат Катар дека ја поддржува Исламската држава. Кон средината на август германскиот министер за развој Герд Милер во телевизиско интервју, како што подоцна беше објавено од неговата портпаролка, „потпирајќи се на медиумски извештаи, а не врз конкретни докази коишто ги поседува владата на Германија“, го обвини Катар дека ја финансира терористичката џихадистичка организација Исламска држава. Официјален Берлин тогаш експресно реагираше со извинување до катарската влада.

„Катар никогаш не ги поддржувал екстремистичките групации“, изјави катарскиот емир Шеик Тамим бен Хамад ал-Тани на заедничката прес-конференција со германската канцеларка Ангела Меркел по разговорите во Берлин. Одби, меѓутоа, да одговори на новинарско прашање дали ги поддржува екстремистите во Либија, пренесуваат германските медиуми.

Тамим ал-Тани од јуни 2013 година е катарски емир, и со 34 години е најмладиот арапски владетел.

Меркел, пак, изјави дека емирот убедливо и’ објаснил дека меѓународната борба против Исламската држава за Катар претставува прашање на безбедноста. „Немам причини да не им верувал на зборовите на емирот“, изјави Меркел.

Во разговорите станало збор и за односите на Катар со палестинското исламистичко движење Хамас, кое управува со палестинската енклава Појасот Газа а ова лето се судри со Израел. Катар, имено, го поддржува Хамас, кој западните земји го сметаат за терористичка организација.

Западот настојува да ги придобие на своја страна влијателните сунитски арапски земји во регионот на Персискиот залив за заедничка борба против Исламската држава. Сунитските екстремисти собрани околу оваа екстремна организација, којашто според некои процени брои повеќе десетици илјади борци од целиот свет, контролираат големи делови од Ирак и од Сирија. Западот особено е вознемирен од фактот што во редовите на Исламската држава се борат и илјадници Европејци и стотици Американци кои преминале на исламот, а по враќањето на татковините можат да преземат напади врз западни цели.

Наводната поддршка на Катар за џихадистите од Исламската држава беше тема на разговорите и на емирот со германскиот сојузен претседател Јоаким Гаук. Според информации од неименувани дипломати присутни на средбата, Гаук, исто така, директно го запрашал емирот ал-Тани за односите меѓу Катар и Исламската држава, при што емирот одлучно негирал секаква катарска поддршка за оваа организација.

Разговорот на ал-Тани со канцеларката Меркел и со шефот на германската дипломатија Франк-Валтер Штајнмаер во средата попладне во Берлин сепак се оствари, иако претходно се шпекулираше дека средбите се откажани.

Според анонимен член на надворешнополитичката комисија на Бундестагот (парламентот), Катар како важен меѓународен инвеститор и како организатор на светското фудбалско првенство во 2022 година е важен соговорник.

Претходно, заменикот на претседателот на германските социјалдемократи од SPD, Ралф Штегнер изјави дека Германија би требала да ги залади односите со Катар. „Земјите коишто финансиски или политички го поддржуваат тероризмот на Исламската држава, не би требало да добиваат германско оружје, ниту би требало да ги уживаат привилегираните економски односи со Германија“, истакна Штегнер.

Катар е еден од најголемите странски инвеститори во Германија, а со 13,9 милијарди евра е најголем од арапскиот свет. Инвеститорите од Катар имаат удели во најзначајните германски компании, како „Volkswagen“, „Deutsche Bank“, „Siemens“ како и во градежниот гигант „Hochief“. Истовремено, германските компании учествуваат во подготовките за светското фудбалско првенство во Катар.

Во разговорот меѓу емирот и највисоките германски функционери било отворено и прашањето на положбата на странските работници во оваа земја, во којашто особено на градилиштата на фудбалските стадиони, живеат и работат во лоши услови.

„Многу јасно реков дека земја како што е Катар, којашто спаѓа во најбогатите во светот, мора да понуди добри услови за странските работници“, изјави Меркел.

„Да, во Катар има проблеми. Не тврдиме дека сме идеална држава која не прави грешки. Но преземавме многу чекори и во врска со странските работници. Проектите чијашто цел е заштита на странските работници се спроведуваат“, возврати ал-Тани./крај/мф/сн

Извор: Макфакс