Кандидатката на владејачката Демократска партија на американските ноемвриски претседателски избори, Хилари Клинтон, „се обврзува наскоро да обезбеди повеќе информации за својата здравствена состојба“, изјави во вторникот нејзиниот кандидат за потпретседател на САД, Тим Кејн, по предизборен собир во Дејтон, во сојузната држава Охајо.

Меѓутоа, новинарите многу повеќе отколку на ова ветување покажаа интерес за изјавата на поранешниот гувернер на Охајо а сега кандидат за сенатор, Тед Стрикленд, кој во веведниот говор пред настапот на кандидатот за потпретседател Тим Кејн на собирот изјави дека доколку е неопходно, вториот е „подготвен да биде претседател“ на земјата.

Во неделата Хилари Клинтон беше принудена предвреме да ја напушти церемонијата во спомен на жртвите од терористичките напади од 11-ти септември 2001 година во Њујорк, откако ѝ се слоши. Подоцна беше објавено дека причина за тоа е пневмонија. Во моментов таа закрепнува во нејзиниот дом во државата Њујорк, привремени прекинувајќи го личното учество во изборната кампања.

Според Кејн, тој веднаш ја повикал по непријатноста во Њујорк и како што тврдеше пред новинарите таа „изгледаше одлично, живо реагираше на неговите зборови, беше зборлива и се шегуваше“. Оцени дека Клинтон се преморила, бидејќи минатата седмица „работела без да се штеди“, а потоа отишла на важната за неа церемонија во неделата, иако уште во петокот ѝ била дијагностицирана пневмонија.

„Таа води кампања веќе осумнаесет месеци. Нејзината енергија ме восхитува. Ќе ми биде тешко да ја следам“, изјави 58-годишниот сенатор за својата 68-годишна партнерка во трката за Белата куќа.

Како што оценува весникот The Columbus Dispatch, „дежурните комплименти“ од страна на Кејн се разбрани како „должност“, додека изјавата на Стрикленд за самиот кандидат за потпретседател „предизвика бурна реакција“, иако во други околности би била „сосема рутинска“.

Шпекулациите за здравствената состојба на Клинтон не стивнуваа и во вторникот. Така, телевизиската мрежа NBC објави список со прашања до нејзиниот предизборен штаб „на кои досега нема одговори“.

Новинарите особено ги интересирало: зошто се криела таква дијагноза, како што е пневмонијата; дали станува збор за атипична пневмонија којашто може да се прележи на нозе; чувствувала ли Клинтон последните денови слабост од други причини; дали по неделната епизода Клинтон ја загубила свеста; зошто не била хоспитализирана, туку прво ја однеле во домот на ќерката Челзи во Њујорк, итн.

Американките медиуми не веруваат дека од изборниот штаб на поранешната прва дама и државна секретарка ќе одговорат на овие, како и на други прашања. Забележуваат, исто така, дека Клинтон отсекогаш била позната по отсуството на желба да комуницира со новинарите, пример што го следи и нејзиниот изборен штаб. Дури и актуелни службеници на Стејт департментот, кои работат со медиумите, се жалат дека нејзиниот штаб е сосема „недостапен“.

Во понеделникот портпаролот на нејзината кампања Ник Мерил кусо изјави дека Клинтон „по советите на лекарите останува дома и одмора“. Нејзината состојба „продолжува де се подобрува“, додаде, како и дека Клинтон закрепнува од слабоста и ја продолжува предизборната борба.

Во поновата американска историја новинарите успеаја да пронајдат само еден преседан на откажување на кандидатот од кампањата за претседател на држава. Во 1972 година сенаторот Том Иглтон се согласил да се кандидира за потпретседател како партнер на Џорџ Мекговерн, но наскоро бил принуден да се повлече, поради нападите на тешка депресија. Тоа уште повеќе и поткопало позициите на Мекговерн во трката со тогаш актуелниот американски претседател Ричард Никсон, кој се бореше за уште еден мандат./крај/мф/сн

Извор: NBC News