Ниту Русија, ниту проруските бунтовници во источна Украина не го почитуваат примирјето од 12-ти февруари, предупреди во средата американскиот државен секретар Џон Кери, а истовремено властите на самопроласените „народни републики“ во Донецк и Луганск се обратија до челниците на Франција, Германија и Русија да не му дозволат Киев да го урне мировниот договор.

„Се’ досега ниту Русија, ниту силите коишто ги поддржува (…) не ги извршуваат своите обврски“ од договорот од 12-ти февруари во белоруската престолнина Минск, изјави пред една од комисиите на американскиот Конгрес, државниот секретар Џон Кери, повторувајќи дека на Москва поради тоа може да ѝ бидат воведени дополнителни санкции од Вашингтон.

„Побаравме целосна примена на документите од Москва, во прв ред повлекување на целото оружје и странските единици од истокот на Украина, целосен надзор над меѓународните граници на Украина со Русија и ослободување на сите заробеници“, наброи Кери толкувајќи го договорот кој го потпишаа челниците на Украина, Русија, Франција и Германија во Минкс и обвинувајќи ја Русија дека „гледа во очи додека лаже“ дека не е воено вмешана во Украина, пренесува AFP.

Официјална Москва ваквите обвинувања одлучно ги отфрла и постојано бара од Вашингтон со докази да ги аргументира таквите тврдења, а и потсетува за информациите за присуство на странски платеници и наводни доброволци, вклучително и платеници од американска компанија за обезбедување која има договор со американската влада, во редовите на силите лојални на прозападните власти во Киев.

Истовремено, челниците на ткн „народни републики“ во Донецк и Луганск, Денис Пушилин и ладислав Дајнего, апелираа до челниците на Франција, Германија и Русија да спречат киевските власти да го урнат мировниот договор од Минск, предупредувајќи дека Киев се обидува да го повлече потписот на неговиот претставник од договорот за повлекување на тешкото вооружување од линијата на раздвојувањето.

Украинскиот воен портпарол Андриј Лисенко, имено претходно во средата истакна дека примирјето, коешто предвидува и повлекување на тешкото вооружување и создавање тампон зона во длабочина од 30 до 70 километри од линијата на раздвојувањето за што бунтовниците велат дека го започнале а Киев најави дека нема да го стори до целосното престанување на престрелките – не се почитува во целост.

„Ние сме принудени да се обратиме до украинската страна, а исто така и до гарантите на преговарачкиот процес, германската канцеларка Ангела Меркел, и францускиот и рускиот претседател, Франсоа Оланд односно Владимир Путин, и да ги повикаме да не дозволата нарушување на мировните намери“, се наведува во заедничката изјава на претставниците на одметнатите рускојазични региони, коешто го цитира РИА Новости.

Се истакнува и дека по средбата од средата на претставниците на Донецк и Луганск во Контактната група за Украина (во којашто влегуваат и претставници на Киев, Москва и ОБСЕ), забележана е тенденцијата којашто го става под прашање подготвеноста за преземање на одговорноста на украинската страна. Во документот, исто така, се истакнува дека Киев прави „уште еден обид да се повлече потписот на својот претставник“.

Се истакнува, исто така, дека „планот за повлекување на тешкото вооружување од 22-ри февруари кој го разработи Заедничкиот центар за координација (кој го сочинуваат претставници на страните застапени и во Контактната група –з.р.), претставниците на Украина се обидуваат да го направат неважечки“ и оти бунтовничките сили повлекле повеќе од 400 единици тешко вооружување. /крај/мф/сн

Извор: Макфакс