Американскиот државен секретар Џон Кери му ја изразил својата загриженост на својот руски колега по должност Сергеј Лавров поради извештаите дека Русија за наводно засилено трупа воени сили во Сирија, соопшти во саботата вечерта американскиот Стејт департмент.

„Државниот секретар јасно кажа дека доколку тие извештаи се точни, тие акции би можеле да водат кон натамошна ескалација, поголеми загуби на живот, поголем број бегалци, а се закануваат и со судир со коалицијата којашто во Сирија дејствува против таканаречената Исламска држава“, се наведува во соопштението на американската дипломатија без прецизирање на која антиџихадистичка коалиција се однесува.

Во, исто така, штурото соопштение на руското министерство за надворешни работи се истакнува дека телефонскиот разговор бил по иницијатива на американската страна, како и дека „Во текот на разговорите беа дискутирани различните аспекти на ситуацијата во Сирија и околу неа, задачите во борбата против Исламската држава и другите терористички организации, како и прашањата за заедничките активности во поддршка на напорите на ОН за воспоставување на политичкиот процес во Сирија во согласност со одредбите од Женевското коминике од 30-ти јуни 2012 година“.

Притоа забележливо не се споменуваат изразите на загриженост за кои се зборува во американското соопштение, но двете страни истакнуваат дека Кери и Лавров се договориле разговорите за Сирија да ги продолжат подоцна овој месец во Њујорк.

Претходно Вашингтон, кој инаку изведува воздушни удари врз позициите на Исламската држава во Сирија, без консултации и договор со владата на сирискиот претседател Башар ал-Асад, најави дека ќе ги испита „слуховите за руските единици на задача“ во Сирија. САД во четвртокот најавија дека ќе ги испитаат информациите според коишто Русија води воени операции во Сирија, предупредувајќи дека таквите акции, кога би биле потврдени, би биле „дестабилизирачки и контрапродуктивни“.

Рускиот претседател Владимир Путин изјави во петокот дека сé уште е прерано да се зборува за воен ангажман на Русија во Сирија за борба против радикалната сунитска групација Исламска држава. Запрашан за евентуален воен ангажман на Русија, против џихадистите, Путин на новинарите им одговори дека „се разгледуваат различни опции, но ова за што вие зборувате не е дневен ред“.

„Прерано е да кажеме дека сме подготвени да одиме таму веднаш“, одговори рускиот челник, сепак потсетувајќи дека Русија со децении, вклучително и на владата на претседателот Башар ал-Асад, на Сирија ѝ продава оружје. „Ја снабдуваме Сирија со поприлично сериозна помош во воена опрема, со оспособување на нивните единици коишто ги вооружуваме“, додаде Путин.

Повеќе медиумски извештаи објавени во четвртокот и петокот, кои се повикуваа на неименувани американски функционери, говореа за наводно зголемување на руските воени сили во Сирија, кои се инаку присутни во децениската единствена во овој регион воена руска база во Тартус, како и за јакнењето на воената поддршка на сојузникот на Москва, сирискиот претседател – алавитот (шиит) Башар ал-Асад, кого САД под притисок на своите сунитски сојузници во регионот, во прв ред Турција и Саудиска Арабија сакаат да го соборат од власта и не го прифаќаат рускиот предлог да се оди на избори и политичката транзиција во Сирија да се изврши со учество на сите фактори, туку бараат тие неизоставно да се одржат без негово учество.

Цитирајќи неименуван извори од администрацијата на американскиот претседател Барак Обама, дневниот весник The New York Times објави дека Русија испратила воен извидувачки тим во Сирија и монтажни куќи за стотици луѓе и опрема за полски аеродром во Сирија. Според толкувањето на весникот, тоа говори дека Москва би можела да распореди до 1.000 воени советници и друг воен персонал на аеродромот кај Латакија, главното морско пристаниште во Сирија.

Бунтот против четиридецениското владеењето на сириската социјалистичка партија Баас, која ја предводи сето тоа време семејството Асад, избувна во март 2011 година, по инерција на ткн Арапска пролет со која во низа арапски земји, како Либија, Тунис, Египет и Јемен, беа урнати децениските автократски режими. Официјален Дамаск, односно владата на Башар ал-Асад, која има поддршка од алавитите, либералните сунити, Друзите и христијаните, додека значајната курдска заедница се држи настрана од конфликтот, ги обвинува Турција, Катар и Саудиска Арабија и нивните западни сојузници дека со своите диверзантски групи ги предизвикале судирите во Сирија и оти планирано материјално и воено ја поддржувале сунитската вооружена опозиција која тие ја нарекуваат „умерена“.

Меѓутоа, во текот на речиси четири ипол годишниот конфликт, граѓанската војна во Сирија се претвори во меѓуконфесионален судир во кој најголема полза имаа џихадистичките организации како Исламската држава и Џебхат ан-Нусра, сириското крило на ал Каеда, додека опозицските сили поддржани од Западот контролираат само мали територии, главно, кон границата со Турција и Либан./крај/мф/сн

Извор: Макфакс