Американскиот државен секретар Џон Кери изјави во понеделникот дека разговорите со Русија и коалициските партнери се „сé поблиску до точката на разбирање“ во врска со обновувањето на примирјето во Сирија, вклучително и околу северниот град Алепо, а тамошната влада објави дека за уште 48 часа го продолжува „режимот на затишје“ во областа на главниот град Дамаск.

Изјавата Кери за новинарите ја даде во Женева, пред започнувањето на разговорите со саудискиот министер за надворешни работи Абдел ал-Џубеир во рамките на засилените дипломатски напори за запирање на порастот на насилствата и спасувањето на кревкото примирје и мировните преговори.

„Се поблиску сме до моментот на разбирање, меѓутоа имаме уште многу работи и затоа сме тука“, изјави американскиот државен секретар Џон Кери.

Џубеир ја осуди ескалацијата на судирите нарекувајќи го „кршење на сите хуманитарни закони“. Тој за воздушните удари во Алепо ги обвини владините сили и уште еднаш го повика сирискиот претседател Башар ал-Асад да се повлече од должноста.

„Тој не може да замине низ политички процес и се надеваме дека тоа и ќе го стори, или ќе биде тргнат на сила“, се закани шефот на дипломатијата на Саудиска Арабија, монархија каде се практикува вехабитскиот сунитски ислам, и која официјален Дамаск ја обвинува за финансирање на радикалните исламистички и џихадистички групи во Сирија да ја започнат војната во март 2011 година.

Што се однесува до прашањето за повлекување од должноста на алавтискиот (шиитски) претседател Башар ал-Асад, како што бара вооружената сунитски опозиција поддржана од сунитските земји во регионот и од Западот, Дамаск повеќепати истакна, за што ја има поддршката од своите сојузници Русија и шиитски Иран, дека за политичката иднина на Асад треба да одлучуваат само Сиријците, и тоа на избори.

„Светот нема да дозволи тоа да им мине само така“, додаде Џубаир алудирајќи на воздушните удари во кои минатата седмица во Алепо беше погодена болница во кој загинаа доктори и пациенти, за што ја обвинува владата во Дамаск.

Но, тој не одговори на сириските обвинувања и тврдењето на руското министерство за одбрана кое понуди докази дека критичниот ден кога е погодена болницата во Алепо над градот летале само авиони на меѓународната коалиција предводена од САД, чија членка е и Саудиска Арабија.Сириската влада соопшти во петокот дека воведува привремен „режим на затишје“ во покраината околу главниот град Дамаск и во покраината Латакија, но Кери порача дека примирјето постигнато со посредство на САД и Русија од 27-ми февруари, мора да го вклучува и Алепо, каде што е регистриран најголем пораст на насилствата, но каде што се активни и двете радикални сунтиски групации Исламска држава и Џебхат ан-Нусра, кои не се опфатени со договорот за примирјето.

Руското министерството за одбрана соопшти во неделата дека во тек се разговори за вклучување на сириската покраина Алепо во привремениот „режим на затишје“ на судирите, пренесуваат руските новински агенции, а сириската армија го потврди продолжувањето на овој режим за покраината на главниот град Дамаск, за уште 24 часа.

Во понеделникот сириската армија ја потврди информација од Москва дека го продолжува за 48 часа примирјето околу Дамаск и регионот Источна Гута, откако претходно во неделата објави дека „режимот на затишје“ објавен во петокот го продолжува за дополнителни 24 часа.

Рускиот генерал Сергеј Кураленко, еден до портпаролите на министерството за одбрана, рече во понеделникот дека Русија, САД, сириската влада и „умерената“ опозиција се согласиле да го продолжат затишјето за уште два дена, до крајот на вторник 3-ти мај./крај/мф/сн

Извор: Reuters/РИА Новости