Светот ќе биде побезбеден доколку Вашингтон и Москва работат задно, изјави во вторникот навечер во Париз американскиот државен секретар Џон Кери по повеќе од тричасовните разговори со неговиот руски колега Сергеј Лавров, кој ја оцени средбата како многу корисна.

„Нашата цел денес е да ги продлабочиме нашите можности да работиме заедно; да соработуваме со Русија, каде што можеме, во интерес на нашите земји и земјите засегнати од дејствијата кои ние сме решиле да ги преземеме“, изјави Кери.„Доколку САД и Русија успеат во тоа да работат заедно, светот ќе стане побезбеден“, истакна американскиот државен секретар.„Разликите остануваат, но во заеднички интерес е да се бара договор по тие прашање“, рече Лавров цитиран од руските медиуми и истакна дека сите одлуки треба да се засноваат „на меѓусебно уважувачки дијалог, кој ќе се базира на рамноправното договарање и водење сметка за интересите на другиот“.„Разговаравме за многу прашања, ситуацијата во Украина, во Ирак, како и за прашањата од билатералните односи, некои прашања од хуманитарен карактер, кои се однесуваат на судбината на руските граѓани“, наведе Лавров.„Средбата, според мое мислење, беше корисна, се согласивме да ги продолжиме контактите за во сите тие прашање да оствариме напредок. Онаму, каде што можеме да соработуваме да продолжиме да го правиме тоа за да се подобри ефикасноста на заедничките напори, а каде што и натаму има разлики – да бараме договор кој ќе го одразува балансот на интересите – справедливо и рамноправно“, информира шефот на руската дипломатија за разговорите со американскиот колега.Осврнувајќи се на ситуацијата во Украина, Лавров потцртува дека Русија и САД не се завојувани страни во конфликтот. Москва упорно повторува дека не е инволвирана во украинската граѓанска војна, додека Западот и кој ги поддржува новите прозападни власти во Киев ја обвинува дека го поддржува сепаратизмот во југоисточните доминантно рускојазични региони кои во април самопрогласија ткн народни републики. „Решението на украинската криза е можно само преку директни преговори и договор меѓу двете страни“, изјави Лавров. Според него, во моментов е најважно да не биде урнат мировниот договор од Минск. На 5-ти септември во белоруската престолнина украинските претставници и претставниците на побунетите источни региони Донецк и Луганск постигнаа договор за разграничување на воените единици и прекин на огнот, кој повремено се прекршува за што се обвинуваат двете страни.  Меѓутоа, Лавров не ја испушти можноста да ги спомене масовните гробници на територијата на Донецк откриени по повлекувањето на силите лојални на владата во Киев, истакнувајќи дека таа не била отворена на разговорот со Кери.

Кери во врска со украинската криза додаде дека на самитот во Милано. „Минскиот договор мора да биде исполнет во целиот обем, иако некои од точките се предмет на дискусија. Во текот на следните седмици ќе има многу претпазливи разговори за тоа. Мислам дека на средбата во Милано (во петок кога ќе се сретнат рускиот и украинскиот претседател) ќе биде утврден планот за имплементирање на договорот, кои точки се исполнети а кои не“, изјави Кери.Двајцата соговорници се договориле да комуницираат поефикасно во борбата против тероризмот, кој според нив станува главната закана за регионите на Блискиот исток и Северна Африка.„Вториот проблем, каде што сме заинтересирани за успехот на меѓународните напор е борбата против вирусот на еболата“, потсетувајќи дека Русија меѓу првите земји испрати свои лекари во Гвинеја и Сиреа Леоне кои се меѓу најпогодените од епидемијата и дека ќе ја поддржи иницијативата на генералниот секретар на ОН во справувањето со оваа закана соработувајќи со другите држави./крај/мф/сн

Извор: РИА Новости/Итар-Тасс