Кандидатите на американките претседателски избори на 8-ми ноември, на Демократската партија – Хилари Клинтон, и на Републиканската партија – Доналд Трамп, ќе се соочат првпат во понеделникот по локално време, во првата претседателска телевизиска дебата за којашто се очекува дека ќе биде забележана како најгледаното и најочекуваното политичко соочување во историјата на САД.

Изедначената трка за Белата куќа, како и непредвидливите судири на стиловите на двајцата конкуренти кои добро се познаваат, создадоа голем интерес за дебатата којашто може и да биде клучна за изборите кои ќе се одржат за шест седмици, пишува Reuters.

Бројот на телевизиските гледачи може да го надмине рекордот од претседателските дебати од 80 милиони колку во 1980 година го следеле соочувањето меѓу демократскиот претседател Џими Картер, и републиканскиот кандидат Роналд Реган. Се очекува дебатата меѓу поранешната прва дама и поранешна државна секретарка Хилари Клинтон и њујоршкиот претприемач и милијардер Доналд Трмап, да ја следат најмалку 90 милиони луѓе, пишува AFP.

Дуелот кој ќе трае 90 минути, ќе започне во 21 часот (вторник во 3 часот наутро по македонско време), на универзитетот Хофстра на Лонг Ајленд во сојузната држава Њујорк. Ова е првата од трите планирани претседателски телевизиски соочувања.

И Клинтон и Трамп, за кои анкетите покажуваат дека се најнепопуларните кандидати за Белата куќа во историјата, се надеваат дека ќе го искористат соочувањето за да ги привлечат неодлучните гласачи, и да ги исправат пропустите од своите досегашни кампањи.

Аналитичарите сметаат дека непредвидливиот Трамп ќе има можност да ја покаже длабочината и постојаноста којашто е соодветна за вистински лидер, додека претпазливата Клинтон ќе се обиде директно да им се обрати на гласачите кои не ѝ веруваат.

Трамп, кој нема искуство како политичари и во извршување на должности, за кого се оценува дека досега повеќе ѝ се посветувал на критиката отколку на политиката, може да има полза од помалите очекувања на гласачите.

„Нема сомнение дека Трамп има полесна задача“, смета Ден Шнар, поранешен стратег на републиканците кој сега работи како професор по политика на универзитетот Јужна Калифорнија. „Трамп не треба да биде брилијантен, само не смее да биде премногу бомбастичен“, додава.

Влоговите во дебатата се огромни. Таа доаѓа во периодот кога анкетите покажуваат дека се истопила големата двоцифрена предност којашто на крајот од летово ја имаше Клинтон пред Трамп, па дури и дека тој минал во водство. Во прв ред тоа се припишува на контроверзиите околу финансиите на семејната фондација на Клинтонови и незаконското користење на приватната електронска пошта и приватниот сервер за официјална преписка со многу доверливи документи во периодот кога беше државна секретарка во првиот мандат на актуелниот претседател Барак Обама, откако се повлече од трката со него за партиската номинација на демократите на претседателските избори во 2008 година.

Истражувањето на јавното мнение на дневниот весник The Washington Post и на телевизиската мрежа ABC News, покажа во неделата дека Клинтон е изедначена со Трамп со 43 отсто гласови на регистрираните избирачи кои двајцата ги добиваат. Анкетата на агенцијата Reuters и на институтот Ipsos објавена во понеделникот, покажува дека половината од веројатните американски гласачи ќе одлучуваат преку впечатокот од телевизиските дебати. Повеќе од 61 отсто од нив се надеваат на пристојна дебата, и не се заинтересирани за валканиците од кампањата.

Но, 68-годишната Клинтон и 70-годишниот Трамп често си упатуваат остри навреди, поради што се очекува жестока расправа, Трамп неретко Клинтон ја нарекува „нечесната Хилари“, и повика на нејзино притворање до крај на истрагата околу скандалот со електронската пошта. Клинтон, пак, често го осудува Трамп за „темпераментно недораснат“ и „политички некомпетентен“ за Белата куќа.

Трамп доминираше на републиканските телевизиски дебати со нападите врз своите ривали, но нема искуство во соочувањата еден на еден, кои бараат подолги дискусии. Клинтон има учествата во голем број вакви дебати во текот на својата неуспешна кампања за номинацијата на демократите во 2008-та, како и во текот на годинешната кампања кога имаше само еден против кандидат, демократскиот сенатор Берни Сандерс.

Штабот на Клинтон стори сé за да го подигне прагот за Трамп, а пред телевизиското соочување во понеделникот, двајцата кандидати се обидоа да ги наметнат своите очекувања.

„Она што не го сакаме се двојните стандарди со кои Доналд Трамп би ја добил наградата за најголем напредок, а Хилари Клинтон да се проценува според истенчените ставови за политиката“, вели за NBC, Роби Мук, шеф на кампањата на Клинтон, додавајќи дека Трамп го смета за „забавувач“.

Директорката на кампањата на Трамп, Келиен Конвеј, која дојде по низата смени во штабот на републиканскиот кандидат, исто така, за NBC изјави дека големото искуство на Клинтон тешко ќе се пренесе на дебатата, каде што Трамп има предност. „Тој нема да зборува ако робот, напамет“, рече.

Американската јавност дебатираше и за улогата на водителот на NBC на соочувањето, Лестер Холт, кој демократите го повикуваат да го исправа Трамп доколку давал „лажни искази“.Но и Трамп се обиде да влијае на Холт, како и на модераторите на другите дебати, велејќи дека кандидатите треба самите да се исправаат за неточните изјави./крај/мф/сн

Извор: Макфакс