Поранешната државна секретарка и прва дама на САД, Хилари Клинтон, вети во неделата навечер дека ќе се бори за обичните Американци, тргнувајќи во долго најавуваната втора трка за Белата куќа, како најсериозен кандидат за добивање на номинацијата на Демократската партија за изборите во 2016 година, а американските медиуми истакнуваат дека нејзината кампања може да биде најскапата во историјата.

„На обичните Американци им е потребен нивен заговорник. Сакам да бидам тој заговорник. Американците успеаја да ја победат тешката економска криза, но најсилните карти и натаму ги држат оние кои се на врвот“, изјави Хилари Клинтон во видео пораката објавена на интернет, пренесува Reuters.

Хилари Клинтон, која во својот прв обид да ја добие претседателска номинација од Демократската партија беше поразена од актуелниот претседател Барак Обама во 2008 година кога го освои својот прв мандат а потоа ја именуваше за државен секретар, многу скоро ќе отпатува за сојузната држава Ајова, првата во која на почетокот од 2016 година ќе се одржат партиските предизбори.

„Сега е и официјално: Хилари се кандидира за претседателка“, изјави нејзиниот советник Џон Подеста во електронската порака испратена до приврзаниците на нејзината неуспешна номинација во 2008 година.

Многумина сметаат дека тогашната нејзина номинација повеќе беше во цел да му даде тежина на Барак Обама кој тогаш стана првиот црн претседател на САД, а откако го прескокна периодот на големите геополитички разместувања на планетата, сега таа ќе се обиде да стане првата претседателка во историјата на Соединетите држави.

Нејзината кампања за претстојните избори кои ќе се одржат во ноември 2016 година, ќе биде фокусирана на борбата против економската нееднаквост, како и на нејзината желба да стане првата жена на чело на САД и да влезе во историјата, велат нејзините советници.

Меѓутоа, според аналитичарите, имајќи предвид дека повеќе децении е во фокусот на јавноста, прво како сопруга на поранешниот американски претседател Бил Клинтон, потоа како сенаторка и на крајот како државна секретарка, таа мора повеќе да се концентрира на приближувње до обичните луѓе, нејзините потенцијални избирачи.

Но, нејзината кампања може да биде и најскапата во историјата, пишува The New York Times. „Оваа кампања започнува во мали обрти, о голема е веројатноста да стане најскапата од сите претседателски кампањи“, се наведува во коментарот. Се истакнува дека „Клинтон и нејзините поддржувачи сметаат да соберат околу 2,5 милијарди долари“.

Ставањето на дигиталните комуникации во прв план претставува обид да се поврзе со младите избирачи, коишто ѝ се потребни на Клинтон за да стане првата претседателка во историјата на САД, е делумно и поради тоа што во 2008 година Обама во неговата кампања ги користеше социјалните медиуми за привлекување на вниманието кон неговата кандидатура и собирање големи парични износи преку мали донации.

The New York Times е убеден дека Клинтон ужива „голема поддршка кај демократите“. „Дел од тој ентузијазам е поврзан со можноста да се учествува во креирањето на историјата, односно првпат жена да биде избрана за претседател на САД“, се вели уште во написот. Истовремено се укажува на „недостигот од алтернативни кандидати на (Демократската) партија, кои имаат цел да ја задржат Белата куќа, откако републиканците ја преземаа контролата во Конгресот“.

Многу американски демократи со нетрпение го очекуваа нејзиното номинирање, а резултатите од истражувањето на јавното мнение покажуваат дека е во голема предност пред другите потенцијални демократски противници. Анкетата на Reuters Ipsos покажува дека Клинтон ја поддржуваат повеќе од 60 отсто од демократите.

Меѓутоа, имајќи предвид дека повеќе децении е во фокусот на јавноста, во прв ред како поранешна сопруга на поранешниот 42-ри претседател Бил Клинтон, во двата мандата од 1993 до 2001 година, потоа како сенаторка и на крајот како државна секретарка, Хилари би требало повеќе да се насочи кон приближувањето на обичните мали луѓе, кои се нејзини потенцијални гласачи, сметаат аналитичарите.

Уште пред официјалното објавување на номинацијата на Клинтон, нејзините потенцијални републикански противкандидати жестоко ја нападнаа. Поранешниот гувернер на Флорида, Џеб Буш, ја критикуваше пореди водењето на американската надворешна политика, додека беше шефица на дипломатијата. „Потребена ни е подобра надворешна политика од онаа на двоецот Обама – Клинтон којашто им наштети на односите со нашите сојузници и ги зајакна нашите непријатели“, порача Буш.

Републиканскиот сенатор од Кентаки, Ранд Пол, за кого се смета дека е фаворит во својата партија за претседателската номинација, изјави дека она што го демонстрирала Хилари Клинтон во текот на мандатот на државна секретарка, ја доведува во прашање нејзината квалификуваност за функцијата шеф на државата. Пол одново ја критикуваше нејзината реакција пред и по нападот врз американскиот конзулат во либиски Бенгази во 2012-та и неодамнешните странски донации на хуманитарната Фондација што ја основа заедно со сопругот Бил Клинтон. Фондацијата Клинтон прифаќала донации од земји како што е Саудиска Арабија (којашто се смета за спонзор на ултраконзервативните исламски движење низ светот), „поради што тешко може да се верува дека таа (Хилари) е искрена“, рече сенаторот Пол. „Рекоа дека нема да примаат донации за Фондацијата Клинтон додека таа е државна секретарка, а се поставува прашањето дали тоа навистина го правеле“, додаде./крај/мф/сн

Извор: Макфакс