Американската сојузна држава Охајо, односно градските власти на Кливленд, ќе платат отштета од шест милиони долари на семејството на дванаесетгодишно црно момченце кое во 2014 година го убило полицаец, се дознава од судските документи.

Тамир Рајс се играл во паркот во Кливленд со воздушен пиштол кога на 22-ри ноември 2014 година бил застрелан од полицаецот Тимоти Лоехман кој мислел дека станува збор за вистинско оружје.

Властите на сојузната држава Охајо се согласија на исплатата, а градските власти во спогодбата не ја признале вината, но се согласиле на семејството да му исплатат три милиони долари оваа и три милиони следната година.

Снимката од надзорна камера, објавена веднаш по несреќата, прикажува момент во кој момченцето е убиено неколку секунди по доаѓањето на двајцата полицајци со службено возило на отворено игралиште во Кливленд.

Двајцата полицајци интервенирале попладне на отворено игралиште по телефонско јавување дека вооружено лице со пиштол цели во минувачите, според полицијата во Кливленд. Тонската снимка којашто ја објавија американските телевизии покажува дека во телефонскиот разговор на лицето коешто ја повикало полицијата се вели дека оружјето е „најверојатно лажно“. Меѓутоа, полицајците ја немале таа информација.

Полицајците кои пристигнале на местото на настанот побарале од момчето да ги крене рацете во воздух, но тоа „не го исполнило барањето на офицерите“ и „ги спуштило рацете кон пиштолот кој го носел во појасот“, беше истакнато во полициското соопштение од пред две години.

Американскиот окружен судија Дан Арон Полстер, кој посредува во спогодбата, како што покажуваат судските документите, утврдил дека семејството на Рајс се согласило да се откаже од тужбата против полициските службеници и оти градските власти не носат вина за пукањето.

Од судските документи се дознава дека семејството Рајс ќе добие 5,5 милиони долари, додека неговите мајка и сестра ќе добијат и уште по 250.000 долари. Семејството соопшти дека спогодбата не ја „донела правдата“, Велат дека полициското насилство против малцинствата „останува црна дамка врз нашата нација и се надеваат дека смртта на малиот Тамир нешто ќе промени.

Адвокатот на семејството Рајс, Субод Чандара, ја опиша спогодбата како „историска во финансиска смисла“, но истакне дека таа не може да го компензира губењето на човечки живот. „Семејството Рајс искрено се надева дека смртта на Тамир ќе поттикне движење за вистински промени во нашето општество и нашата полиција“, додаде.

Американската унија за граѓански слободи (ACLU) соопшти дека овој случај не може да биде замена за реформите коишто „очајно се потребни“ во американскиот правосуден систем.

„Законите и практиките кои го попречуваат повикувањето на одговорност за злоупотреба на службените овластувања треба да се заменат со конкретни решенија за елиминирање на расната пристрасност во правниот систем“, се вели во писмената изјава на Кристин Линк, извршен директор на филијалата на ACLU за државата Охајо.

Ова не е прв случај американските служби за спроведување на редот и законот да се спогодуваат со семејствата на жртвите на полициските службеници. Во март семејството на 20-годишниот Денрој Хенри Џуниор, ланската година убиен од страна на полицаец во сојузната држава Масачусетс, исто така, се согласи со исплата на 6 милиони долари. Семејството на 50-годишниот Валтер Скот кој беше убиен од полицаец по сообраќајна потера, минатиот октомври доби решение за исплата на 6,5 милиони долари.

Полициските убиства, при што особено високо процентуално се застапени жртви од афроамериканската заедница предизвикаа жестоки протести проследени со насилство низ градовите ширум САД последните две години./крај/мф/сн

Извор: Associated Press