Колумбискиот претседател Хуан Мануел Сантос и челникот на марксистичките Револуционерни вооружени сили на Колумбија (Fuerzas Armadas Revolucionarias de Colombia – FARC) Родриго Лондонo Ечевери наречен Тимоченко (Тимошено) најавија дека ќе продолжат да се борат за завршување на 52-годишниот вооружен конфликт во кој загинале најмалку 260.000 луѓе, 45.000 се водат како исчезнати, а 6,9 милиони лица се раселени, и покрај тоа што во неделата Колумбијците на референдумот неочекувано не го прифатија нивниот мировен договор кој по четиригодишни преговарања во потпишаа минатата седмица.

На референдумот 50,21 отсто од гласачите коишто излегоа на избирачките места одбија да го поддржат мировниот договор, додека 49,78 отсто го поддржале. Конечните резултати од референдумот претставуваат огромно изненадување бидејќи излезните анкетите покажуваа дека две третини од гласачите се изјасниле позитивно за поддршка на договорот, а анкетите пред одржувањето покажуваа дека 62 отсто од испитаниците го поддржуваа договорот, а само 25 отсто го отфрлаа. Но во неделата на избирачките места излегле само 37 отсто од регистрирани избирачи, а причина за тоа делумно бил и силен дожд кој врнел во поголемиот дел од регионите на Колумбија.

„Нема ада се откажам во барањето на мирот сé до последниот ден од мандатот, бидејќи тоа е вистинскиот пат за создавање подобра нација за нашите деца“, изјави претседателот Хозе Мануел Сантос кому вториот и последен претседателски мандат му истекува во август 2018 година, па повеќе нема да може да се кандидира за оваа должност.

„FARC и натаму сака да користи само зборови како оружје за градење на иднината. На сите луѓе во Колумбија кои сонуваат за мир им порачувам да сметаат на нас и дека мирот ќе победи“, порача герилскиот водач Родриго Лондонo Ечевери – Тимоченко.

Сантос и Тимоченко на 26-ти септември во колумбискиот град Картахена го потпишаа мировниот договор со кој формално беше завршена полувековната војна во која од 1964 година учествуваа неколку бунтовнички групи од крајната левица, паравојски од крајната десница и колумбиските вооружени сили. Пред референдумот Сантос порач дека нема „план Б“ доколку гласачите го отфрлат договорот.

За одобрување на мировниот договор, неговите поддржувачи требаше не само да освојат просто мнозинство од гласовите, туку и не помалку од 13 отсто од вкупниот број избирачи, околу 4,5 милиони гласови.

Претставниците на двете конфронтирани страни го финализираа договорот на 24-ти август во Хавана, по речиси четири години преговори. Договорот вклучува одредби за трансформирање на FARC во политичка партија, формирање суд за воени злосторства, реформи во руралниот сектор и реинтеграција на демобилизираните герилци во цивилниот живот.

Во следната половина година, околу осум илјади преостанати борци на FARC ќе бидат разместени во 23 региони во земјата каде што ќе го предадат оружјето во процесот кој ќе го надгледуваат Обединетите нации.

Според договорот, FARC до 2018 година ќе има претставници во конгресот, но без право на глас, а потоа до 2026 година ќе има десет претставници со право на глас, без разлика на изборните резултати./крај/мф/сн

Извор: Макфакс