Курдските борци во сирискиот град Кобане (Ајин ал-Араб, на арапски) на самата граница кон Турција, кои цел месец им одолеваат на нападите на џихадистите од Исламската држава со олеснување во понеделникот ги дочекале првите пратки оружје кои од воздух им ги достави американската армија, пренесуваат агенциите.

Агенцијата AFP потсетува дека курдските Единици за заштита на народот (YPG), благодарејќи на воздушните удари на меѓународната коалиција предводена од САД, успеаја да го сопрат напредувањето на Исламската држава којашто се закануваше да го заземе целиот град откако на 6-ти октомври нејзините борци успеаја да навлезат во некои населби и под контрола да стават 50 отсто од Кобане.

Американската централна команда објави дека испорачала оружје, муниција и медицинска помош и за курдските борци и за сириските бунтовници кои тешко се справуваат со побројните и подобро вооружени борци на Исламската држава. САД почнаа да ги спроведуваат воздушните удари против џихадистите во Ирак кон крајот на август а по речиси еден месец започнаа да ги бомбардираат и позициите на Исламската држава во северна Сирија, каде што таа држи под контрола поголеми области уште од 2013 година. Командантот на американските сили на Блискиот исток, генерал Лојд Остин, изјави дека воздушните удари против џихадистите веќе покажале резултати, но истакна и дека таа кампања ќе потрае.

„Тоа оружје ќе биде од голема помош за борците на Единиците за заштита на народот во борбата против Исламската држава“, изјавил портпаролот на курдските сили Редур Џелил. Три американски транспортни авиона „С-130“ во понеделникот исфрлиле 27 пакети со оружје и медицински материјал за Курдите коишто успеваат и покрај жестоките улични борби изминатиот викенд да контролираат половина од градот.

Опозициската Сириска опсерваторија за човекови права (SOHR) со седиште во Лондон оценува дека „во светлината на најновите случувања би можела да се промени рамнотежата на силите“ на боиштето.

Пред американската акција, претседателот Барак Обама за намерата на сириските Курди во Кобане да им биде доставена воена помош од воздух го известил турскиот претседател Реџеп Тајип Ердоган, „Исламската држава е заеднички непријател на САД и на Турција“, изјавил висок американски извор кој барал да остане анонимен, пренесе Reuters.

Официјална Анкара, меѓутоа, нема доверба во сириските Курди поради нивната блискост со турските Курди од забранетата Работничка партија на Курдистан (РКК) коишто 30 години војуваат со турските власти за автономија при што загинаа повеќе од 40 илјади луѓе. Претседателот Ердоган во неделата повторно се оглуши на повиците неговата земја да им достави помош на сириските Курди во Кобане во оружје. Наместо тоа, главната курдска Партија на демократското единство (PYD), заедно со нејзиното вооружено крило Единици за заштита на народот (YPG), ја обвини дека е „терористичка организација“ поврзана со PKK.

Снабдувањето на сириските сунитски бунтовници кои ја имаат поддршката на Западот, од сунитска Турција и другите пет сунитски арапски земји во регионот, и кои од март 2011 година се обидуваат да го соборат алавитскиот (шиитски) претседател Башар ал-Асад, е последната од мерките во рамките на напорите на САД да им помогнат на овие сили коишто ги нарекуваат „умерени“ да ги одбијат нападите на Исламската држава, Фронтот ан-Нусра и други сунитски радикални групи со коишто до оваа година заедно војуваат против владините сириски сили, откако Вашингтон со години се обидува да го избегне директното вовлекување во сириската граѓанска војна во којашто досега загинаа над 190 илјади луѓе./крај/мф/сн

Извор: Макфакс