Силите на ирачките Курди – пешмергите успешно ги потиснуваат борците на џихадистичката групација Исламска држава на планината Синџар во северозападен Ирак, обидувајќи се да го вратат по контрола градот кој го заземаа џихадистите.
 

Силите на ирачките Курди – пешмергите успешно ги потиснуваат борците на џихадистичката групација Исламска држава на планината Синџар во северозападен Ирак, обидувајќи се да го вратат по контрола градот кој го заземаа џихадистите.

„Силите на (курдските борци) пешмергите ја натераа Исламската држава на повлекување од градот откако претрпе тешки загуби“, изјавил Саед Шингали, претставник на Курдската демократска партија, пренесе во саботата курдското радио Rudaw. Дописникот на ова радио од Синџар јави дека сунитските екстремисти се принудени да бегаат преку границите во соседната Сирија.

Напредувањето на Курдите во областа на Синџар доаѓа два дена откако силите на ирачките Курди, со поддршка на американски воздушни удари, ја пробија опсадата на планината Синџар каде со месеци џихадистите држеа под опсада над десет илјади припадници на етноконфесионалната јазидска заедница.

Тоа е најголемата воена победа на пешмергите во ирачката автономна покраина Курдистан во последните неколку месеци, а портпаролот на премиерот на ирачката влада Хајдар ал-Абади разбивањето на опсадата ја нарече „победа на целиот ирачки народ“. „Силите на пешмергите се дел од ирачкиот безбедносен систем. Тие и ирачката армија имаат заеднички непријател, а тоа е Даеш“, изјави портпаролот Раеф ал-Џабури, користејќи го терминот „даеш“, што претставува шиитски арапски акроним за Исламската држава.

Односите меѓу Курдите и централните ирачки власти во Багдад во последниот период се подобрија, по повеќегодишната затегнатост.

Во август повеќе илјади цивили, главно припадници на јазидската заедница, побараа спас на планината Синџар, откако Исламската држава го зазема градот Синџар кој се наоѓа во подножјето на планината. Припадниците на Исламската држава, радикални сунити, ги сметаат јазидите следбеници на древна религија обожувачи на ѓаволот и се особено брутални кон нејзините припадници. Оние кои нема да се преобратат во исламот ги обезглавуваат или распнуваат, додека жените и девојките ги даваат на своите борци како робинки.

Пешмергите во средата започнаа офанзива чија цел беше да ја заземат областа Синџар, со обид да го прекината главниот правец за снабдување на џихадистите меѓу сириската граница и градот Мосул, вториот по големина во Ирак. Мосул од почетокот на јуни по ненадејната офанзива е во рацете на Исламската држава којашто контролира големи области и во соседна Сирија на коишто прогласи исламски калифат.

Курдските борци во Сирија, пак, имаат под контрола осум населби во близина на ирачката граница каде што водат жестоки борби со Исламската држава, објави во саботата опозициската Сириска опсерваторија за човекови права (SOHR) со седиште во Лондон. Оваа група која се повикува на широка мрежа активисти на теренот, тврди дека борците на сириските групи од Единицата за заштита на народот, се судриле со џихадистите во областа Јарубија, во покраината Хасака во североисточна Сирија, в о близина на ирачката граница. Според Опсерваторијата, и двете страни во судирот претрпеле значителни загуби.

Според медиумските извештаи, Исламската држава ликвидирала стотина свои борци од странски држави коишто се обиделе да заминат од сирискиот град Рака, кој е нејзина база уште од 2013 година. Повеќето од ликвидираните борци доаѓаат од европските држави, тврдат сириските извори./крај/мф/сн

Извор: Макфакс