Воздушните удари коишто ги презема Русија врз позициите на Исламската држава (IS) во Сирија се прецизно изведувани, а информациите кои говорат за наводни цивилни жртви се неосновани и Москва нема такви сознанија, изјави шефот на руската дипломатија Сергеј Лавров.

„Шпекулациите за тоа дека нападите не биле врз Исламската држава не се втемелени“, изјави ноќта кон четвртокот рускиот министер за надворешни работи Сергеј Лавров по средбата со американскиот државен секретар Џон Кери во Њујорк, додавајќи дека не постојат ниедни релевантни информации за тоа дека имало цивилни жртви.

Шефот на руската дипломатија ги даде овие изјави откако претставниците на вооружените сириски опозициски сили коишто ги поддржува Западот од егзил соопштија дека наводно во руските воздушни удари биле ранети осум борци на опозицијата и загинале 36 цивили. Ова портпаролката на руската дипломатија уште во средата вечерта го оцени како дел од информативната војна против руското ангажирање на Блискиот исток, бидејќи се зборува за наводни жртви во покраината Хама, а руското воздухопловство дејствувало во покраината Хомс.

Руските воздушни напади во Сирија се прецизно насочени исклучиво врз позициите на терористичката организација Исламска држава. Москва нема информации за цивилни жртви, истакна Лавров одговарајќи на прашањето за „загриженоста“ на САД.,

„Го слушнавте говорот на Кери и на другите наши колеги во Советот за безбедност на ОН, кои се сведуваат на позицијата дека доколку Русија навистина помага во борбата против Исламската држава, таа е добредојдена“, изјави шефот на руската дипломатија.

Лавров, исто така, за новинарите појаснил дека со американската страна било разговарано да се избегнат несаканите инциденти, бидејќи во Сирија активно извршува напади речиси цела година и коалицијата предводена од САД. Кери, притоа, истакнал дека доколку цели на руските напади не бидат само терористичките позиции, тоа би можело да се одрази лошо во смисла на зголемувањето на притисокот на џихадистите во Сирија, појасни Лавров.

„Искрено и чесно повеќепати кажавме дека ние одговараме на барањето на раководството на Сирија и помагаме исклучиво во борбата против Исламската држава и против другите терористички групации. А ‘загриженоста’ на САД во врска со тоа ‘дали тоа не биле тие цели’, од нивна страна беа искажани тие сомневања, и утврдувавме дали за тоа имаат некакви докази“, рече рускиот министер за надворешни работи.

Лавров истакна дека руските воздушни напади се изведуваат со „хируршка прецизност“ и врз цели кои се објавени, а опфаќаат борбена техника и магацини на џихадистите и се преземаат надвор од населени места и далеку од цивилна инфраструктура.

Посочи дека на средбата со Кери, од американка страна било истакнато дека САД и коалицијата дејствуваат во Сирија во согласност со Повелбата на ОН, особено со членот 51 кој го предвидува правото на колективна самоодбрана. „Членот 51 се однесува исклучиво на ситуација во која одредена држава бара да биде заштитена. Такво барање од страна на Сирија кон коалицијата нема, додека соодветно барање ѝ беше упатено на Русија“, појасни Лавров.

„Разбираме дека коалицијата е реалност која треба да се земе предвид. Токму затоа претседателите на Русија и на САД се договорија за контакти меѓу воените функционери, за да се избегна недоразбирањата“, додаде шефот на руската дипломатија.

Одговарајќи на новинарските прашања за ризиците од руската воена интервенција, Лавров посочи дека тие се состојат од тоа што илјадниците борци во редовите на џихадистичките структури во Сирија, коишто потекнуваат од територијата на Руската Федерација, да се вратат дома и да ги продолжат своите злосторнички активности. „Овие ризици сакаме да ги избегнеме по секоја цена, и јас сум убеден дека ќе успееме во тоа“, заклучи рускиот дипломат./крај/мф/сн

Извор: Макфакс