Русија и САД би можеле да ги обединат напорите поради борбата против тероризмот, како што своевремено умееја тоа да го сторат во борбата против фашизмот, без разлика на тогаш постојните идеолошки разлики, изјави, меѓу другото, рускиот министер за надворешни работи Сергеј Лавров во опширното интервју за телевизијата НТВ.

„Тоа го искажа и рускиот претседател во говорот пред Генералното собрание на ОН. Всушност, тој направи паралела со периодот на создавање на антихитлеровската коалиција кога Советскиот сојуз беше злото од гледна точка на Западот. Но кога се појави фашизмот, кога се појави Хитлер со новиот поредок, веќе немаше идеолошки разлики меѓу комунизмот и капитализмот, меѓу социјалистичката сопственост и пазарната економија“, рече Лавров истакнувајќи дека денес, за разлика од Втората светска војна, не постојат идеолошки разлики меѓу различните системи.

„И ако уште тогаш двата спротиставени система сфатиле која е смртната закана и се обединиле против заедничкиот многу суриов непријател, сега врз основа на сето тоа искуство од заедничката соработка во многу прашања, врз основа на Студената војна, веројатно може да се извлечат вистински заклучоци и да се создаде таква коалиција, и покрај разидувањата во врска со разни прашања, кои се второстепени“, рече шефот на руската дипломатија.

Лавров ги негираше медиумските извештаи дека Саудиска Арабија ѝ понудила на Русија да се присоедини кон коалицијата којашто ја предводат САД, и којашто повеќе од една година дејствува против Исламската држава во Сирија и во Ирак. Меѓутоа, рускиот дипломат истакна дека Ријад бил запознаен со позицијата на Русија за Сирија.

Одговарајќи на повтореното прашање за веродостојноста на написите во западните медиуми дека претставниците на Саудиска Арабија при нивната неодамнешна посета на Русија ѝ предлагале на Москва да се присоедини на коалицијата предводена од САД, Лавров истакна дека „тоа не е висина“.

„Ги слушнав изјавите од некои извори, дека сме биле предупредени дека (руската интервенција во Сирија – з.м.) ќе има катастрофални последици. Апсолутно не е така. Тие зборуваа за потребата од координирани напори. Им беше јасно потврдено дека ние се бориме со тероризмот, а не со сириската патриотска опозиција“, истакна Лавров.

„Напротив, ние сакаме со таа патриотска сириска опозиција да ги координираме активностите и да помогнеме да се совладаат терористите, исто како што ѝ помагаме на армијата на сириската влада да ослободи градови откако ќе ги бомбардираме позициите на Исламската држава, Џебхат ан-Нусра или другите терористички групи. Ние сме подготвени да ѝ помогнеме на сириската патриотска опозиција“, рече Лавров повторувајќи дека Москва и натаму очекува од Западот и земјите како Саудиска Арабија кои ја поддржуваат вооружената сунитска опозиција во Сирија којашто ја означуваат како „умерена“ да ја поврзат со неа.

Лавров додаде притоа дека на саудиските претставници во неколкуте нивни посети на Русија им било посочено дека руските активности во Сирија се насочени кон борбата против тероризмот, а не кон спасување на актуелната власт и оти се надева дека тие ја разбрале позицијата на Москва./крај/мф/сн

Извор: ТАСС