Обидите за преставување на конфликтот во Сирија како судир меѓу муслиманите е неприфатливо, изјави шефот на руската дипломатија Сергеј Лавров во опширното интервју за телевизијата НТВ во кое уште зборуваше отворено за односите со САД и сознанијата дека нивното оружје паѓа во рацете на џихадистите, како и  за подготвеноста на Москва да соработува со опозициската Слободна сириска армија (FSA) која се бори против нејзиниот традиционален сириски сојузник претседателот Башар ал-Асад.

„Нашите колеги се обидуваат да ни кажат дека Исламската држава се формирала затоа што се оддолжила кризата во Сирија. И сега, како магнет, во Сирија се привлекуваат сите сунити, затоа што, како што велат, алавитите против сунитите користат сила, не сакајќи да ја препуштат власта. Тоа се многу опасни обиди“, рече Лавров во врска со забелешките на Западот дека поддршката што Русија му ја дава на својот децениски сојузник претседателот Башар ал-Асад кој доаѓа од алавитската (шиитска) заедница придонесува за одолговлекување на конфликтот кој започна во март 2011 година, а тој ја поддржува сунитската вооружен аопаозиција која ја нарекува „умерена“, како и дека руската воена интервенција во Сирија ќе ги привлече екстремните сунити од целиот свет на ова боиште.

„Зборував со колегите, со (американскиот државен секретар) Џон Кери, со европските партнери, дека обидите да се претстави овој конфликт како судир во самиот ислам е недозволиво“, истакна Лавров.

Според него, приорите во ситуацијата во Сирија е отстранувањето на светската закана од тероризмот. Но, САД не сакаат да одговорат на предлогот на Русија за формирање широка антитерористичка коалиција во Сирија, продолжи шефот на руската дипломатија, според кого „не се подготвени да ја признаат неефикасноста на своите операции, во заднина на ефективната работа на руската војска“ во воздушните напади врз позициите на Исламската држава.

„Веројатно станува збор за цела низа фактори. Најверојатно не е многу пријатно да се види како ефикасно дејствува нашата војска наспроти повеќе од една година долгата операција од страна на коалиција предводена од САД., којашто според мене извршила 60.000 летови, од кои барем половината би требало да бидат борбени мисии“, рече Лавров.

Рускиот министер за надворешни работи обрати внимание на недостигот од позитивните резултати на теренот од американските операции. „Напротив, Исламската држава и другите терористички групи, како Џебхат ан-Нусра која е огранок на Ал Каеда, го проширија влијанието и ја зголемија територијата под нивна контрола, на кои го практикуваат својот калифат, каде што го организираат животот на луѓето по сопствените закони. Во основа, ова е сосема нов вид тероризам“, додаде Лавров.

„Ние сите се бориме против тероризмот… Повторувам, и покрај тоа што нашите партнери не добиле поука од тоа што не постигнале значителни успеси, сепак, е потребно е да се надминат себеси и да одлучат што е поважно – лажното чувство на самодоверба или ослободување на светот од најсложената во последните децении закана“, рече Лавров.

Русија нема никакви сомневања дека оружјето и муницијата коишто САД им ги доставуваат на ткн ‘умерена сириска опозиција’ завршуваат во рацете на терористите, порача рускиот министер за надворешни работи.

„Искрено, ние дури немаме никакви сомневања дека барем значителен дел од тоа оружје доаѓа во рацете на терористите. Тоа предизвикува вознемиреност дури и во САД, каде јавноста и Конгресот веќе почнаа да поставуваат прашања за претходните обиди да се поддржува Умерената опозиција’“, истакна Лавров.

Неодамна програмата за обука на сириските опозициски борци, САД ја сопреа токму затоа што првата група од стотина борци кои ги обучија го предаде оружјето или сосе него мина во редовите на другата џихадистичка групација Џебхат ан-Нусра, сириското крило на Ал Каеда.

Лавров, исто така, потсети дека неодамна во САД се разгоре скандал околу стотиците џипови „Тојота“ кои ѝ биле доставени на Сириската слободна армија и на другите опозициски групации, но коишто дојдоа во посед на Исламската држава. „Исламската држава ги вози овие џипови, на нив монтираат митралези и дејствуваат од нив, носејќи ја својата разурнувачка идеја меѓу масите. Тоа е тажно“, заклучи .

Шефот на руската дипломатија ги критикуваше и плановите на Вашингтон да продолжи со поддршката на сириската опозиција која ја означува како умерена. „Неодамна беше објавено дека се откажуваат од програмата за обука, бидејќи тоа е скапо и не успеваат вистински да ги подготват. Одлучија да обучуваат само команданти на единици. Така што можеме да видиме многу малку конкретни нешта, што точно прават Американците во Сирија и зошто има толку незначителни резултати од толку многу борбени летови“, продолжи Лавров.

Тој уште еднаш повтори дека Русија сé уште го чека одговорот од западните партнери на „нашите барања да кажат на кој начин може да се соработува од страна на патриотската опозиција“.

Притоа Лавров истакна дека Русија е подготвена да се координира со Сириската слободна армија (FSA), која ја поддржуваат Западот и Турција, но нема контакти. Рускиот дипломат уверува дека Русија е подготвена да соработува со оваа групација против терористите, но досега не успеала да воспостави контакт.

„Пред неколку дена американскиот претседател Барак Обама во интервју даде неколку интересни изјави, меѓу другото, и за тоа како е неопходно да се координира во Сирија во борбата против тероризмот и со FSA. А токму на тоа ние повикуваме, и не првпат“, рече Лавров.

Потсети притоа дека рускиот претседател Владимир Путин апелираше на „воспоставување координација со коалицијата предводена од САД, без разлика што во Сирија таа коалиција дејствува нелегитимно, без да биде повикана на помош (Русија дејствува по барање на сирискиот претседател Башар ал-Асад – з.м), а и Советот за безбедност при ОН нема донесено одлука за тоа“.

„Но доколку Обама повикува на координација со Сириската слободна армија, ние сме подготвени за тоа. И одамна им се обративме на Американците и на земјите во регионот, на Саудијците, Катар и Турција, со барање да ни покажат кој ја претставува и реално ја води FSA и да ни укажат на некои имиња со кои можеме да контактираме. Но тоа уште го чекаме“, појасни Лавров.

Шефот на руската дипломатија потсети и дека Москва му предложи на Вашингтон „соработка не само преку Пентагон и руското министерство за одбрана, за да се избегнат инцидентите“ при извршувањето на воздушните операции над Сирија. „Предложивме соработка во координација на нашите активности, на што уште нема одговор“, се пожали.

„Ја критикуваат нашата воена операција во Сирија, велат дека нашите удари не се со цел да ги ослабат терористите, туку да ја ослабат ‘умерената’ сириска опозиција. Ги прашавме да ги споделиме процените каде се ‘висинските’ цели, кои ќе им нанесат најголеми штети на терористите – тие сé уште не одговорија“, појасни Лавров и додаде дека уште без одговор од американска страна е и руското барање да им бидат покажани локациите каде нивните авиони би требало да гаѓаат./крај/мф/сн

Извор: TAСС