Москва нема да разгледа никакви критериуми кои би требало да бидат исполнети за да бидат укинати западните санкции кон неа, изјавил во понеделникот шефот на руската дипломатија, Сергеј Лавров, наведувајќи дека Западот се повеќе сфаќа дека конфликтот со Русија му пречи во борбата против тероризмот.
 

Москва нема да разгледа никакви критериуми кои би требало да бидат исполнети за да бидат укинати западните санкции кон неа, изјавил во понеделникот шефот на руската дипломатија, Сергеј Лавров, наведувајќи дека Западот се повеќе сфаќа дека конфликтот со Русија му пречи во борбата против тероризмот.

„Ние не воведовме санкции. Ние не покренавме никаква спирала на санкции која се проширува. Некои колеги ни наговестуваа дека треба да усогласиме некои критериуми и да ги исполниме, и дека тогаш ќе ни бидат укинати санкциите. Ние ништо нема да разгледуваме“, изјавил Лавров по средбата со својот естонски колега Едгар Ринкевичс во Москва.

Според Лавров, санкциите се апсолутно нелегитимни и контрапродуктивни мерки кои ги погодуваат сите, вклучувајќи ја и Русија, но дека таа од оваа состојба ќе излезе „дури и во плус“, пренесува РИА Новости.

„Нашите европски партнери, кои го чувствуваат негативното влијание на санкциите, сами нека одлучат. Тоа се нивни проблеми“, рекол Лавров, додавајќи дека Западот се повеќе сфаќа дека не треба да дозволи да се прошири и продлабочи заедничката закана од тероризмот, во состојба кога соработката меѓу Русија од една страна, и ЕУ и НАТО од друа страна, во оваа област е замрзната.

„Ова го почувствував и вчера во многубројните разговори за време на учеството на Републиканскиот марш во Париз“, рекол рускиот министер.

Естонскиот министер за надворешни работи и актуелен претседавач со Европскиот совет, Едгарс Ринкевичс изјавил дека ЕУ сериозно ќе го разгледа прашањето за укинувањето на санкциите кон Русија, доколку има реален напредок во решавањето на кризата во Украина.

Според него, постојат договори од Женева и Минск, како и оној од 21-ви февруари 2014 година во Киев.

„Гледаме дека ни договорот од Минск се уште не се исполнува, постојат проблеми. И од оваа гледна точка, би рекол дека доколку видиме реален напредок, ЕУ би била сериозно подготвена да го разгледа прашањето за ублажување или прекинување на санкциитеа“, изјавил шефот на естонската дипломатија.

Лавров по средбата исто така изјавил дека Москва има информации оти украинските безбедносни сили подготвуваат нов обид за насилно решавање на кризата, што според него „би било катастрофално“, пренесува ТАС.

„Конфликтот во Украина не може да биде решен со воени средства“, изјавил рускиот министер, изразувајќи очекувања дека странските партнери ќе влијаат врз Киев за овие обиди да бидат спречени.

Лавров истакнал дека за исполнувањето на договорите треба да за погрижат страните во конфликтот – украинските власти и претставниците на Доњецката и Луганската област на истокот на земјата, а за Москва е најважно тоа да започне почеток на директен национален дијалог за уставни реформи во Украина.

„По пат на национално помирување треба да се достигне национален консензус за тоа во каква државата сите Украинци ќе се чувствуваат безбедно и добро“, рекол Лавров./крај/мф/бс