Либерија прогласи вонредна состојба поради епидемија на смртоносната ебола, додека американскиот претседател, Барак Обама, изјавил дека прерано е на жртвите од оваа болест во Африка да им се испрати лек кој се уште е во експериментална фаза.

Претседателката на Либерија, Елен Џонсон Серлив, доцна во средата прогласи вонредна состојба во земјата и предупредила дека неопходни се вонредни мерки „за опстанок на државата“.

Либерискиот парламент во четврток ќе ја ратификува оваа одлука, а истото ќе го направи и парламентот во Сиера Леоне, каде вонредна состојба била прогласена претходната недела.

Зборувајќи за „јасна и присутна опасност“ од вирусот кој до сега одзеде речиси илјада животи во западна Африка, Серлиф најавила дека вонредната состојба ќе трае најмалку 90 дена.

„Размерите на епидемијата, заразноста и стапката на смртност од овој вирус би ги надминале капацитетите на било која владина агенција или министерство“, рекла Серлиф.

И додека африканските земји бараат неодложна помош, американскиот претседател истакнал дека премногу е рано да се експериментира со лекови кои не се доволно испитани.

Двајца американски државјани кои работеле за христијанска хуманитарна агенција во Либерија изминатите денови биле доведени на лечење во САД и примиле од експерименталниот лек по што веднаш почувствувале подобрување, меѓутоа овој лек тешко може да се произведува во големи количини.

Според најновите податоци на Светската здравствена организација, во западна Африка од почетокот на оваа година од ебола умреле 932 лица, а потврдено е дека дополнително уште 1.711 лица се инфицирани од овој вирус, од кои најголем број во Гвинеја, Либерија и Сиера Леоне.

Се стравува дека болеста може да се прошири и на територијата на Нигерија, откако во Лагос, голем град со повеќе од 20 милиони жители, починала медицинска сестра заразена од овој вирус, пренесуваат странските агенции.

Од саботата до понеделникот на територијата на западна Африка потврдени биле 45 смртни случаи од ебола, а хуманитарните агенции, вклучувајќи ја и Лекари без граници, истакнале дека оваа тешка тропска болест излегла од контрола.

Нигерискиот министер за здравство, Оњебучи Чукви, изјавил дека стапил во контакт со американскиот Центар за контрола на болести поради можноста од нив да обезбедат лекови за да се спротивстават на евентуална епидемија и во оваа земја.

„Реков дека имаме информации оти овој експериментален лек, по се изгледа е корисен. Би сакале да обезбедиме залихи од овој лек за нашите луѓе кои се лекуваат од овој вирус и кои се во период на инкубација“, истакнал министерот.

Светската здравствена организација повикала итна седница зад затворени врати во Женева на која би требало да се донесе одлука дали ќе биде прогласена меѓународна криза.

Во главниот град на Либерија, Монровиј, телата на жртвите од ебола оставени се да лежат по градските улици или во домовите и не се закопуваат. Во Сиера Леоне, каде има и најголем број потврдени случаи на заразени со ебола, 800 војници, меѓу кои и 50 воени медицински сестри, ја обезбедуваат болницата и клиниките во кои се лечат пациенти заболени од ебола, изјавил портпаролот на војската.

Еболата била откриена во 1976 година, а своето име го добила според река која се наоѓа во Демократска Република Конго. Оваа болест се пренесува преку директен контакт со ткива, крв, плунка и пот од заразените лица.

Од неа умреле околу две третини од заболените во изминатите четири децении, а во две епидемии стапката на смртност била речиси 90 отсто.

Во најновата епидемија оваа стапка изнесува 55 отсто./крај/мф/ап