Михај Хавеиер Џонсон, 25-годишниот воен ветеран од Авганистан, кој во минатонеделниот расно мотивиран напад уби пет и рани уште седум полицајци во Далас, бил разочаран од военото искуство во Авганистан, открива неговата мајка, како што пренесуваат американските медиуми во понеделникот.

По нападот на Џонсон во четвртокот вечерта, американската армија уште во петокот преку портпаролката Синтија Смит објави дека тој бил столар и ѕидар во 420-та бригада на инженеријата во сојузната држава Тексас.

Според податоците на американската војска, како резервист Џонсон бил мобилизиран во три наврата од шест месеци до една година меѓу 2009 и 2015 година во 420-та бригада чие седиште е во Сиговил во Тексас.

Како што претходно објавија американските медиуми, ова црно момче кое живеел во Москвито, предградие на Далас, не било кривично гонето ниту казнувано, ниту било поврзано со некоја радикална група или организација.

Михеј Џонсон, служејќи во Авганистан, бил „разочаран“ од своето воено искуство, изјавила неговата мајка во разговорот за порталот TheBlaze.com во понеделникот

„Војската не беше онаква како што Михеј очекуваше, Беше разочаран. Многу разочаран“, изјави Делфин Џонсон, за неговата мајка, но не сакала да открие зошто тоа било така, и што стои зад неговото отпуштање од воената служба,

Претходно неколку медиуми, како и колеги на Џонсон преку социјалните мрежи, објавија дека тој во текот на престојот во Авганистан бил пријавуван од колешките во војската за сексуално вознемирување, дека им ја крадел долната облека, а една дури успеала да издејствува судска забрана да се приближува неа, на членовите на нејзиното семејство и на нејзините сопствености.

Џонсон во преговорите со полицајците, за кои барал да бидат само црнци, во текот на двочасовната опсада и престрелка пред да биде ликвидиран со робот бомба, рекол дека бил гневен на двата случаи од минатиот вторник и средата, кога во сојузните држави Лузијана и Минесота, полицијата смртно застрела двајца афроамерикци. „Сакам да убивам белци, особено полицајци“, им кажал Џонсон на полицајците.

Овие инциденти, кои се последни во најмалку двегодишна низа контроверзни полициски убиства на невооружени афроамериканци во Њујорк, Фергусон, Мисури, Чикаго и Балтимор, изминатиот викенд предизвикаа нови протести ширум САД поради расните предрасуди.

Во неделата беше соопштено дека во саботата вечерта биле уапсени вкупно околу 200 лица во неколку градови.

Началникот на полицијата во Далас, Дејвид Браун во неделата за CNN изјави дека во домот на Џонсон при претресот е откриено дека вежбал користење експлозиви, имал голем арсенал муниција и оружје, а водел и дневник за организирање напад, што укажува дека се подготвувал за многу поголем напад.

„Убедени сме дека осомничениот имал други планови“, изјави Браун додавајќи дека минатонеделните полициски убиства само ја забрзале одлуката. Тој, во преговорите со полицајците, се интересирал за тоа колку полицајци погодил, а пред да биде убиен им се заканил дека „ќе биде уште пострашно“, како и дека во центарот на Далас се поставени експлозивни направи.

Воената обука на Џонсон, а минал и приватен курс во приватна организација за обезбедување, му овозможило брзо да се движи и прецизно да гаѓа, поради што полицијата во првичните процени сметаше дека станува збор за повеќе снајперисти. Подоцна беше соопштено дека тој бил сам, пукал од неколку различни ката на иста зграда, и дека не бил поврзан ниту имал помош од некоја радикална група.

Демонстрациите против полициската бруталност во САД продолжуваат и натаму. Три сојузни држави ги предупредија своите граѓани да бидат претпазливи при патувањата во американските градови во кои се одржуваат протестите. Во вторник во Далас ќе се одржи комеморација за убиените полицајци, на којашто ќе присуствува и американскиот претседател Барак Обама./крај/мф/сн

Извор: Макфакс