Ќерката на републиканскиот претседателски кандидат Иванка Трамп, говореше во четвртокот на републиканската конвенција во Кливленд, претставувајќи го својот татко Донлад Трамп како човек кој доаѓа надвор од политичката арена со големи идеи за промени во САД, во говорот кој многу американски медиуми го оценија како најдобриот таа вечер.

„Вистинска промена, каква што немаме видено со децении, единствено може да дојде надвор од системот, и може да дојде само од човекот кој целиот свој живот го работел она за што другите зборуваа дека е невозможно да се стори“, порача 34-годишната Иванка Трамп додавајќи дека нејзиниот татко не ја гледа бојата на кожата, ниту полот.

Иванка, сега деловна жена а поранешен модел, во својот говор на републиканската конвенција, кој според извештаите го гледале милиони пред телевизиските екрани, го претстави татко си како личност којашто сака да ги унапреди Соединетите држави, која се грижи за децата, се залага за иста плата за жените и за мажите, и како човек кој во овој момент може да каже „Америка ќе ја направиме повторно голема“, што е мотото на кампањата на Доналд Трамп.

Сметајќи очигледно во прв ред на можното влијание кај женскиот дел од американскиот електорат, Иванка меѓу другото истакна дека „Trump Organization“, компанија на нејзиниот татко во којашто таа е потпретседателка, жените ги плаќа исто како и мажите, како и дека жените во неа се во мнозинство.

Ја истакна, исто така, подготвеноста на нејзиниот татко да им помогне на целосните странци „и е тука токму кога ви е потребен“, а приказните од животот кои зборуваат за тоа, покажуваат, како што рече, дека нејзиниот татко има „не само сила и способност потребни за да биде нов претседател, туку и љубезност и сочувствување коешто ќе му помогне да биде лидер каков што ѝ потребен на оваа земја“.

Највозрасната ќерка на њујоршкиот претприемач и мултимилијардер речиси „му го украде шоуто“ на својот татко, оценува Reuters, кој ги пренесува оцените од Twitter во кои се поставува прашањето зошто Иванка Трамп не е во трката за претседател или, пак, говорот се оценува како најдобар таа вечер.

На Google е забележано дека луѓето барале повеќе информации за Иванка Трамп, отколку за нејзиниот татко.

Медиумите истакнуваа и пред конвенцијата дека убавата и паметна ќерка на Доналд Трамп е неговото најефикасно оружје во кампањата, против коешто немаат што да кажат ниту неговите најжестоки противници.

Мајка на три мали деца, омажена за претприемач во градежништвото Џаред Кушнер поради кој мина во хебрејство, Иванка Трамп е заменичка на претседателот на управата задолжена за развој и аквизиции во татковата компанија „Trump Organization“. Деловна жена со диплома од економија, Иванка го осмисли брендот облека и модни детали кој го носи нејзиното име, а има и интернет страница преку која дели совети за вработените жени.

Се смета дека Иванка Трамп е неопходниот адут за освојување на женското гласачко тело, имајќи предвид дека само 34 отсто од жените го поддржуваат Доналд Трамп, според најновата анкета направена за телевизијата ABC News и дневниот весник The Washington Post,/крај/мф/сн

Извор: Макфакс