Поранешниот помошник министер за економска политика на министерот за финансии на САД во времето на претседателот Роналд Реган, Пол Крег Робертс иронично одговори на обвиненијата од новинарот на весникот The Washington Post со писмо до рускиот претседател Владимир Путин со барање да му биде издадено руско државјанство.

„Сега, кога агентот на ЦИА Крег Тимберг, претставувајќи се за новинар на The Washington Post ме разобличи како руски агент, би сакал да знам дали можам од вас да побарам доделување руско државјанство и дипломатски имунитет, можеби како помошник на портпаролот во руската амбасада во Вашингтон. Тоа ми е потребно сé додека не излезам од земјава. Знам дека му дадовте државјанство на Стивен Сигал, и се надевам, дека за да се биде руски агент, подеднакво станало важно да се учат руските боречки вештини“, напиша Робертс.

Поранешниот функционер во американската администрација натаму признава дека не знае колку им плаќаат на „руските агенти“, но предлага „да се уплатува“ на сметка во руска банка, бидејќи швајцарските банки ја загубија својата привлечност откако тамошната влада „му дозволи на Вашингтон да го преработи нејзиното банкарско законодавство“.

Овој економски стручњак, исто така, изразува надеж дека рускиот претседател ќе го поврзе со некој издавач кој ќе му ги објави мемоарите под наслов „Животот на марионетката на Путин“.

„Треба да контактираме што е можно поскоро: на трагата ми се агентите на ФБИ, прилепени по наводите Washington Post . Тие ќе бидат многу лути, затоа што сум ги мамел сиве овие години, имајќи највисок степен на пристап до доверливи документи и добивајќи инструкции од самиот врв. Секој ден Washington Post може да го разоткрие тој факт, дека ние заедно со колегата – агентот на КГБ (екс американскиот претседател Роналд) Реган, ги намалувавме даноците за богатите, за да го направиме капитализмот што повеќе угнетувачки, за американскиот народ да се побуни и да го собори..“, се наведува во писмото на Робертс.

Во посериозниот дел од дописот објавен во американските медиуми, тој истакнува дека неговата критика на политиката што ја избрал Вашингтон за ескалација на тензиите со Москва, не е шпионска камуфлажа. Таа е одраз на искрената желба да се избегне нуклеарен конфликт меѓу двете земји, посочува Робертс.

„Во САД таквата позиција се смета сомнителна, но јас се надевам дека за Русија таа е прифатлива“, заклучува Пол Крег Робертс во дописот објавен во средата.

Претходно The Washington Post објави напис под наслов „Лажните вести за време на изборите во САД беа ширени преку руската пропаганда“. Во написот на новинарот Крег Тимберг, редица независни американски весници од лева или либертаријанска провиниенција се нарекуваат „извори на руските дезинформации“. Повеќето од нив, како и порталот на Ron Paul Institute, пак, го објавија ироничниот напис на Пол Крег Робертс.

Еден од основачите на порталот The Intercept, Глен Гринвалд, која како новинар на The Guardian ги објавуваше документите доставени од одметнатиот американски разузнавачки аналитичар Едвард Сноуден за скандалот со масовното прислушување, го оцени написот за „полн со недокажани обвинувања“, а новинарот на The Washingon Post за составувач на „макартистички црни листи“, алудирајќи на антикомунистичката хајка во САД меѓу интелектуалците во средината од минатиот век./крај/мф/сн