Американски сателит регистрирал топлинско сјаење над Синајскиот полуостров во моментот на падот на рускиот патнички авион во саботата утрото, што може да упатува на експлозија во резервоарот за гориво или детонација на бомба, објави ноќта кон вторникот американската телевизиска мрежа CBS News, повикувајќи се на својот коментатор, додека министерството за одбрана на САД одби да ги коментира ваквите наводи, а Стејт департментот се сомнева дека терористичката организација Исламска држава би можела да има одговорност во уривањето на рускиот воздухоплов.

„Американски сателит опремен со инфрацрвена технологија открил топлинско сјаење над Синај во моментот на падот на рускиот авион. Податоците сé уште се анализираат со цел да се утврди што би можело да го предизвика блесокот. Една од причините може да биде бомба, но можна е и експлозија во резервоарот за гориво или моторот како резултат на механички дефект…“, објави телевизијата CBS News, цитирајќи го својот коментатор за прашања од безбедноста Дејвид Мартин.Во меѓувреме Пентагон одби да ги коментира наводите на телевизијата. „… Немам ништо да кажам во врска со тоа“, изјавил портпарол на американското министерство за одбрана на прашање на руската агенција РИА.Џихадистичката терористичка групација Исламската држава не би можела да биде инволвирана во авионската несреќа на рускиот патнички авион во Египет, изјави на брифингот со новинарите портпаролката на американскиот Стејт департмент, Елизабет Трудо.Според неа, САД „во овој момент не гледаат никаква поврзаност“ на несреќата со терористички чин. Одговарајќи на прашање за евентуалната вмешаност на терористи на Исламската дражва во несреќата, Трудо одговори дека во Вашингтон „не виделе никакви соопштенија и извештаи коишто би можеле тоа да го потврдат“, пренесе агенцијата ТАСС.Кусо пред неа, челникот на американското национално разузнавање, Џејмс Клапер, во обраќањето на воено-политичка конференција во Вашингтон изјавил дека тој нема „сé уште директни потврди за терористички чин“ врз рускиот патнички авион над Синај.Во понеделникот, коментирајќи ги можните причини за падот на авионот, заменикот на извршниот директот на „Когалимавиа“ за организација на летачките операции, Александар Смирнов, изјави за новинарите дека ја исклучува техничката неисправност на авионот или грешка на пилотите. Според него, единствената причина за несреќата е надворешно влијание врз авионот од земјата.Министерството за транспорт на Русија уште во сабота ја демантираше информацијата што се појави во некои медиуми кои се повикаа на објава на Исламската држава на социјалните мрежи, според којашто рускиот авион што се урна во централен Синај бил соборен од ракета на терористите. Во соопштението беше истакнато дека Русија тесно соработува со египетските воздухопловни власти и дека ниту тие немаат никаква информација што би ги потврдило таквите шпекулации.Руските официјални власти и во понеделникот повторија дека е прерано да се извлекуваат какви и да се заклучоци за причината за уривањето на леталото. Челникот на Федералната агенција за воздушен сообраќај, Александр Нерадко, изјави дека претпоставките на топ менаџерите на авиокомпанијата „не се засновани на реални факти“. Тој, исто така, ги замоли експертите да не шпекулираат на таа тема.Портпаролот на рускиот претседател, Дмитриј Песков, изјави дека ниту една од досега споменатите верзии според визуелните проучуваа на остатоците или прелиминарните податоци „во овој момент не може да се разгледува на официјално ниво“.Пред него извори од истрагата во Каиро изјавија дека на досега пронајдените и истражувани делови од рускиот патнички авион „Airbus A321“, не се пронајдени траги од експлозиви.Авионот од типот „Airbus А321“ на компанијата „Когалимавиа“ на летот 9268 од египетското летувалиште Шарм-ел-Шејк до Санкт Петербург се урна во саботата утрото околу половина час по полетувањето во северниот дел на Синајскиот полуостров, стотина километри од градот ал-Ариша. Во авионот имаше 217 патници, од кои 25 деца, и седум членови на екипажот, од кои тројца државјани на Украина, еден на Белорусија и сите други на Русија, што е најголемата несреќа во историјата на руската и советската цивилна авијација./крај/мф/сн

Извор: Макфакс