Координаторот на политиките на САД во борбата против Исламската држава, генералот Џон Ален, му соопштил на ирачкиот премиер Хајдер ал-Абади дека Вашингтон е загрижен од приближувањето на Багдад и Москва, пишува арапскиот весник Ашарк ал-Авсат кој излегува во Лондон, повикувајќи се на свои извори.

Кон крајот на септември, Русија, Ирак, Сирија и Иран објавија дека во ирачката престолнина Багдад воспоставиле разузнавачки центар за координирање на борбата против екстремната сунитска групација Исламската држава. Главната функција на овој центар е собирање, обработка, анализа и споделување на информациите за актуелните состојби на Блискиот исток во контекстот на борбата против терористите. Овие информации, исто така, се дистрибуираат до генералштабовите на споменатите земји за оперативно дејствување против екстремистите.

„Џон Ален го информираше Хајдер ал-Абади за тоа дека Вашингтон е загрижен од сојузот на Ирак со Русија, и му го кажа буквално следното: ‘Американскиот претседател Барак Обама е заинтересиран за улогата во борбата со Исламската држава. Зарем Ирак не треба да им биде благодарен на САД?’“, го цитира весникот својот соговорник кој прецизирал дека разговор со ваква содржина бил воден за време на посетата на генералот Ален на Багдад пред 11 дена.

Според изворот на весникот, Ален, кој треба да ја напушти челната позиција во коалицијата во ноември, исто така, побарал од ирачкиот премиер да не ја продолжува соработката со Русија. Како што пишува натаму весникот, ал-Абади од своја страна го уверил американскиот соговорник дека до тоа нема да дојде и оти Багдад, доколку е неопходно, ќе ги координира своите активности со Вашингтон и со коалицијата што ја предводат САД, којашто од август 2014 година изведува воздушни удари врз Исламската држава во Ирак.

Ашарк ал-Авсат натаму пишува дека премиерот ал-Абади на домашен терен се соочува со притисок од најголемата шиитска партија за вклучување на Русија во борбата против Исламската држава во Ирак, како што тоа го прави во соседна Сирија, а соговорникот на весникот тврди дека премиерот бил „заглавен“ меѓу задоволувањето на овие повици во земјата и неговата посветеноста на соработката со Вашингтон.

Ал Абади, исто така, бил под притисокот на ирачките шиитските милиции кои се поддржани од Иран, познати како Народна мобилизација. САД, инаку, се претпазливи во однос на вклученоста на ваквите милиции во борбата против Исламската држава, кои се обвинувани од меѓународни организации за човекови права, за наводни секташки напади врз сунитските цивили во областите кои се ослободени од контролата на џихадистите, бидејќи стравуваат дека тоа може да предизвика локална поддршка за екстремните сунитски групи.

Вашингтон инсистира на вооружување на локалните сунитски племенски милиции за да ѝ помогнат на владата во Ирак во борбата против Исламската држава, што е проблематичен потег за владата на Абади во која доминира шиитската исламска партија Дава.

Во меѓувреме Хади ал-Амери, челникот на влијателната групација Бадр, вооруженото крило на една од водечките шиитски политички партии Врховниот исламски совет на Ирак (ISCI) му порача на Абади дека областите кои се под контрола на исламската држава, како што е градот Рамади кој падна во мај, „не можат да бидат ослободени без вклучување на Народната мобилизација“./крај/мф/сн

Извор: Макфакс