Најбараниот мексикански нарко барон, Сервандо Гомез познат како „Ла Тута“ е уапсен во петокот, потврдија мексиканските власти истакнувајќи дека тоа претставува голема победа за владата и претседателот Енрике Пена Нието во борбата против осилените нарко картели.

Сервандо Гомез „Ла Тута“, 49-годишен поранешен учител, беше цел на напорите на мексиканскиот претседател Енрике Пена Нието да воспостави повторно контрола на властите во сојузната држава Мичоакан, во западниот дел на Мексико, којашто е потресувана од бруталните пресметки меѓу наркокартелот „Рицарите темплари“ кој го води „Ла Тута“ и другите локални банди, како и судирите со вооружените милиции коишто ги организира самото население во обидот да се заштити и да ги протера бандите.

Картелот „Рицарите темплари“ официјално се огласи во јавноста на почетокот од 2011 година, кога некои групи се одвоија од картелот „Фамилијата од Мичоакан“. Потоа на улиците во поголемите градови во Мичоакан, каде што е роден поранешниот мексикански претседател Фелипе Калдерон кој им објави војна на нарко картелите во којашто ја ангажира и мексиканската армија, се појавија десетици бели наметки со црвен крст на кои беше објавено формирањето на картелот. Меѓу „рицарите” и „фамилијата” се води жестока и брутална борба за контрола на територијата, во којашто подоцна се вклучија и картелите „Лоз Зетас“, составена од поранешни припадници на специјалните безбедносни сили, и „Халиско – Нова генерација“.

„Темпларите” последните години се инфилтрирале во поголемиот дел од економијата на Мичоакан, а покрај изнудувањето на заштитата на фармерите и сопствениците на дуќани за што тие се самоорганизраат во милиции за самозаштита, ја контролира и рударската индустрија во оваа сојузна држава и железната руда ја извезува во Кина, според локалните власти.

Државата Мичокан се смета за една од клучните мексикански сојузни држави преку којашто минуваат главните криумчарски канали за дрогата на богатиот пазар во САД каде што се проценува дека од овој криминал се заработуваат повеќе од 40 милијарди долари годишно.

Претседателот Пена Нието настојува да го сузбие незадоволството на мексиканската јавност откако кон крајот на ланскиот септември корумпираната локална власт со полицијата и заедно со припадници на локалните банди грабна и веројатно масакрирала 43 студенти.

По неколкумесечната разузнавачка истрага, сојузната полиција објави дека го уапсила Гомез и уште неколку лица, во акција без испукан куршум во петокот наутро во куќа во населба во Морелиа, главниот град на државата Мичоакан. Како доказ Гомез „Ла Тута“ беше покажан пред телевизиските камери пред во петокот навечер со хеликоптер да биде пренесен во затвор во мексиканската престолнина. Против него се подигнати осум обвиненија – за убиство, трговија со дроги и оружје, за уцена и за грабнување.

Минатата седмица мексиканските специјалци запленија многу објекти во истиот кварт и уапсија неколку лица поврзани со „Ла Тута“. Локалните медиуми пишуваат дека таа претходна операција била вовед во пасењето на криминалниот шеф.

„Ла Тута“ е уапсен една година откако беше уапсен најозлогласениот мексикански нарко барон Хоакин Гузман наречен „Малиот“, водач на картелот „Синалоа“, една од најмоќните криминални организации за криумчарење дроги на светот. Гузман од страна нa магазинот Forbes пред неколку години беше ставен на листата на светските доларски милијардери со поголемо влијание од тогашниот францускиот претседател Никола Саркози./крај/мф/сн

Извор: Макфакс