Руското министерство за одбрана соопшти во четвртокот дека американските воени авиони го бомбардирале сирискиот град Алепо во средата, откако САД тврдеа дека нападите ги извеле руски авиони, и тоа наводно врз две болници.

Портпаролот на руското министерство за одбрана, генерал-мајорот Игор Конашенков на брифингот со новинарите во Москва изјави дека два американски авиона од типот „А-10“ кои долетале од Турција, го бомбардирале сирискиот град Алепо. Тој потврди дека портпаролот на Пентагон ја обвинил Русија дека бомбардирала две болници во истиот град во средата, но ги отфрли ваквите обвинувања.

„Како што им ветивме на нашите американски партнери, нема да ги криеме информациите. Во средата (во 11.55 часот по македонско време) од Турција по најкусата рута директно над Алепо се појавија два американски авиона ‘А-1-‘ и ги истрелаа сите проектили врз градот. Полковникот Ворен воопшто не го најави тој лет, ниту во директна ниту во непосредна смисла“, изјави Конашенков, кого го цитира агенцијата РИА.

Конашенков осврнувајќи се на изјавата на портпаролот на Пентагон, иронизираше и истакна дека полковникот Стив Ворен седејќи во штабот во ирачката престолнина Багдад, изјавил дека наводно руските авиони во средата во Алепо нападнале две болници.

„Како резултат на тоа, наводно околу 50.000 Сиријци биле лишени од основните услуги, Повеќе од тоа официјалниот портпарол не можеше да изведи од себе. Ниту за времето, ниту за координатите на тие болници, ниту за изворот на таа информација. Едноставно ништо“, истакна портпаролот на руското министерство за одбрана.

Според Конашенков, во министерството за одбрана на Русија целата претходна ноќ биле „внимателно проучувани“ тие информации.

„Едно е кога такви небулози изјавуваат лондонските активисти заштитници на човековите права (Конашенков алудира на опозициската невладина организација Сириска опсерваторија за човекови права SOHR со седиште во Лондон, за којашто руската дипломатија од почетокот на сирискиот конфликт вели дека ја преставува еден човек – Рами Абделерахман кој нема компетенции затоа што има само основно образование и е сопственик на сириски ресторан во британската престолнина – з..р). Меѓутоа, кога такви работи изјавува портпарол на Пентагон, кој себеси се позиционира како воен професионалец, тоа е сосема поинаква ситуација“, истакна Конашенков.

„Внимателно ги анализиравме сите податоци за целите кои во средата ги гаѓавме во покраината Алепо. Полковникот Ворен можеби бил вознемирен… Руските авиони во градот Алепо вчера не дејствуваа, најблиската цела беше на 20 километри од градот. А над самиот град во средата летаа само авионите на ткн антисиловска коалиција: авиони и ударни беспилотни летала“, изјави Конашенков мислејќи на меѓународната коалиција предводена од САД која се бори против екстремнaта суниска група Исламска држава (ISIL).

Рускиот воен портпарол порачувајќи дека „нема да се однесува“ како својот американски колега истакна дека признава дека „Немавме доволно време точно да го утврдиме идентитетот на деветте објекти кои тие ги бомбардираа во средата во Алепо. Можно е меѓу нив да биле и двете болници“ рече и додаде дека руската страна повнимателни ќе ги провери овие информации.

Конашенков потсети дека оваа ситуација наликува на оние кога во американски бомбардирања беа погодени болницата на Лекари без граници во авганистанскиот град Кундуз и позициите на ирачката армија која во Фалуџа напредуваше против Исламската држава.

„Првото што го прават во таквите ситуации, се нафрлаат со обвинување врз нас, за да ги симнат сомневањата од себеси“, рече Конашенков иронизирајќи уште еднаш дека ќе треба да организира два брифинга „еден за соопштување на нашите информации, а потоа за момците од коалицијата кои себеси се сметаат за професионалци“./крај/мф/сн

Извор: Макфакс