Долгогодишните маратонски преговори за иранската нуклеарна програма наближуваат кон својот крај, а прелиминарниот договор постигнат во четвртокот навечер во швајцарска Лозана меѓу шесте светски сили и Иран докажува дека е можно дипломатско решение на сложените светски проблеми, заклучи руското министерство за надворешни работи.

Москва вечерта кон петокот со официјално соопштение го поздрави постигнувањето на прелиминарниот договор меѓу Велика Британија, Германија, Кина, Русија, САД и Франција во составот на ‘шестката’ меѓународни посредници со делегацијата на Иран, кои успеаја да се договорат за намалување на иранската нуклеарна програма што опфаќа ограничување на капацитетите за збогатување на ураниум за две третини, како и за преработка на плутониум, контрола над програмата за збогатување во наредните 25 години и ставање под 10-годишни ненадејни инспекции на постројките од страна на Меѓународната агенција за атомска енергија (IAEA), период во кој целото количество збогатен ураниум и плутониум ќе мора да бидат изведени надвор од земјата. За возврат кон Техеран ќе бидат укинати меѓународните санкции кои траат цела деценија, но ќе можат да бидат повторно воведени доколку се утврди дека иранската страна го прекршува договорот чиј финален облик треба да биде постигнат до 30-ти јуни годинава.

„Во овој политички договор е втемелен принципот, формулиран од рускиот претседател Владимир Путин, за безусловно признавање на Иран на неприкосновеното право за поседување цивилна нуклеарна програма, вклучително и збогатување на ураниуми, со ставање на оваа програма под меѓународна контрола и отстранување на сите постојни санкции против Исламската Република“, се вели во изјавата од министерството за надворешни работи на Руската Федерација. Сите наредни чекори во рамките на конечниот договор ќе бидат преземани од сите страни, „треба да произлегуваат од принципот на реципроцитет, како што предложи руската страна“, се додава.

Руската дипломатија притоа изразува задоволство од завршување на маратонските преговори и приближувањето кон финалниот договор, но се предупредува „дека претстои макотрпна работа на експертите врз документацијата за техничките мерки од реализација на секој конкретен чекор кој ќе биде составен дел од идниот договор“. „За таа цел во преостанатиот период до крајот на јуни претстојат интензивни консултации во формат на работни групи меѓу претставниците на ‘шестката’ и Иран…. Сето тоа треба да биде сторено врз основа на веќе постигнатиот договор“, се додава.

Се истакнува особено дека пронајденото решение во Лозана, Москва го смета за важно „и од аспект на зајакнување на правниот систем во меѓународните односи како јасен доказ дека со посредство на политичко-дипломатските напори може да се решат и најсложените проблеми во кризните ситуации“.

„Нема сомневање дека договорот за иранската нуклеарна програма ќе има позитивно влијание врз вкупните состојби во сферата на безбедноста на Блискиот исток, имајќи го предвид фактот дека Иран ќе може поактивно да учествува во решавањето на редицата проблеми и конфликти во регионот“, смета руската дипломатија./кај/мф/сн

Извор: Макфакс