Еден од пилотите на соборениот руски авион е убиен со оган од земја а по другиот се трага соопшти руската армија, додавајќи дека податоците од радарските системи укажуваат дека рускиот „Су-24“ не го нарушил турскиот воздушен простор, додека сириската армија има податоци кои укажуваат дека турски борбени авиони во вторникот навлегле во нејзиниот воздушен простор.

Според тоа што авионот летал над сириска територија, пилотите се катапултирале над сириска територија, притоа еден од нив е убиен со оган отворен од земја, изјави началникот на оперативниот штаб генерал-полковникот Сергеј Рудској.Сириските бунтовници од туркменските бригади, кои се сириски државјани а имаат турско етничко чувство и се поддржувани од Турција, тврдат дека ги убиле двајцата руски пилоти. На интернет поставено е видео на бунтовнички борци околу мртвото тело на рускиот пилот, кои извикуваат во слава на Алах и според преводот жалат што не го запалиле неговото тело. Неименуван турски владин извор за медиумите изјави дека двајцата пилоти можеби се живи и дека Анкара работи на нивно ослободување.Руското министерство, исто така, во остро интонираното соопштение објави дека ги суспендира сите воени контакти со Турција, како и дека руските воени бродови со ракетни противвоздушни системи веќе се распоредени крај брегот на западната сириска покраина Латакија, како и дека отсега „ќе бидат уништени сите цели кои ќе бидат оценети како потенцијална опасност“ за руските сили.Според руското министерство за одбрана, инцидентот се случил околу 8,24 часот по средноевропско време, кога над територијата над Сирија турски борбен авион „F-16“ го соборил рускиот ловец-бомбардер „Су-24“ кој извршувал задачи над сириската територија. Според првичната процена, рускиот авион е соборен со проектил „воздух-воздух“ со кус радиус со термичко самонаведување.„Немало никаков обид од страна на турскиот авион да воспостави врска или визуелен контакт со нашиот екипаж, кое е регистрирано со средствата на објективна контрола“, се наведува во соопштението на руското министерство за одбрана.Претходно Анкара соопшти дека турските авиони десет пати за пет минути го предупредувале екипажот на рускиот авион дека наводно се наоѓа во турскиот воздушен простор, што било игнорирано.Портпаролот на Пентагон, Питер Кук, кој рече дека не очекува проблеми и измени во дејствувањето на коалицијата предводена од САД поради инцидентот со рускиот авион, изјави дека коалицијата пресретнала предупредување на турските пилоти до екипажот на рускиот авион, но не одговорил на која територија се случил инцидентот.Претходно портпаролот на американскиот Стејт департмент, Марк Тонер, изјави на брифингот со новинарите дека САД немаа информации каде се наоѓал рускиот авион за време на нападот од турските авиони. Истакна дека САД „ја поддржуваат Турција како сојузник“ и оти Вашингтон сака „Турција и Русија да го одржат дијалогот и да не дозволат ескалација на ситуацијата“.Москва тврди дека рускиот авион бил гаѓан над територијата на Сирија, на најмалку еден километар од воздушниот простор на Турција. Местото на падот на „Су24“ е четири километри во сириска територија. Руската контрола регистрирала дека нејзиниот авион не ја минал границата на Сирија. Меѓутоа, според радарското разузнавање на сирискиот аеродром Хмејмим, кој го користат руските воздушни сили во Сирија, регистрирано е нарушување на сирискиот воздушен простор од страна на турските воздухопловни сили.„Овој факт се смета за флагрантно кршење на меѓународното право со најтешки последици и директно кршење на Меморандумот за спречување на инцидентите и осигурување на безбедноста на летовите во Сирија, склучен со САД и кој се однесува на сите страни од коалицијата, вклучително и од Турција“, заклучува руското министерство за одбрана во чие соопштение се наведува дека ќе бидат засилени сите мерки за осигурување на безбедноста на руските авиони во сирискиот воздушен простор./крај/мф/сн

Извор: Макфакс