Русија и Иран објавија во понеделникот дека сите сириски групации мора да одлучуваат за иднината на претседателот Башар ал-Асад, при што Москва се противи на однапред договорено негово заминување од власта во некој можен иден мировен договор, а Советот за безбедност при Обединетите нации изрази поддршка за мировното посредување во Сирија, но Венецуела се огради од споменувањето во изјавата за политичката транзиција и преодната влада.

Рускиот министер за надворешни работи Сергеј Лавров и неговиот ирански колега Мохамад Џавад Зариф ја повторија на заедничката прес-конференција во Москва поддршка за сирискиот претседател Башар ал-Асад во конфликот започнат во март 2011 година, за кој официјален Дамаск ги обвинува соседните сунитски земји и кој се претвори во меѓуконфесионален конфликт во кој најмногу профитираа радикалните џихадистички групи како Исламската држава и Џебхат ан-Нусра коишто контролираат големи територии од земјата.

Иднината на алавитскиот (шиитски) претседател Асад е една од главните пречки во дипломатските напори бидејќи сунитската вооружена опозиција, којашто Западот и неговите регионални сунитски и арапски сојузници, бараат негово заминување, на што се спротиставува Русија, која ја има поддршката од Кина. Решение за ова прашање, не беше најдено и на неодамнешните контакти на највисоко дипломатско ниво меѓу САД, Русија и Саудиска Арабија.

Подоцна во понеделникот навечер Советот за безбедност на ОН изрази поддршка за посредувањата за постигнување мир во Сирија, на што реагираше Венецуела. Советот за безбедност има 15 членки и изјавите ги усвојува само со консензус. Текстот го подготвија петте постојани членки, САД, Русија, Кина, Велика Британија и Франција, по брифингот со посредникот на ОН, Стефан де Мистура, пред околу три седмици.

Де Мистура предложи завојуваните сириски страни да го повика да учествуваат во работата на четирите работни групи под водство на ОН кои би го подготвиле мировниот план, имајќи предвид дека групите не се подготвени на формални мировни преговори.

ОН во изјавата го поддржува планот на де Мистура кој би требало да доведе до „политички преговори и политичка транзиција“ врз основа на Женевската декларација, планот кој светските сили го усвоија во јуни 2012 година, а кој повикува на политичка транзиција без притоа да се одредува улогата на сирискиот претседател Башар ал-Асад. Се повикуваат сите страни да ја спроведат Женевската изјава, која вклучува „воспоставување инклузивна преодна влада со целосни извршни овластуваа“.

Амбасадорот на Венецуела при ОН, Рафаел Рамирес изјави, меѓутоа, дека неговата земја не се согласува со тие елементи од изјавата, но изрази поддршка за напорите на де Мистура.

„Советот мора да биде непристрасен и објективен во пристапот на сириската криза; занемарувањето на легитимитетот на владата на претседателот Башар ал-Асад го нарушува суверенитетот на тој народ“, изјави Рамирез за новинарите по усвојувањето на изјавата. Приговори и тоа што 10-те избрани членки на Советот за безбедност не учествувале во подготовките на изјавата, и тоа што се вклучени дури откако ја договориле петте постојани членки.

ОН го повикаа генералниот секретар Бан Ки-мун во рок од 90 дена да поднесе извештај во следната фаза од посредувањето за Сирија. Советот изрази и голема загриженост од тоа што сирискиот конфликт прерасна на најголемата хуманитарна криза на светот. Според податоците на ОН, загинале околу 250.000 луѓе, а 7,6 милиони се внатрешно раселени, додека 4 милиони ги напуштеле границите на земјата./крај/мф/сн

Извор: Макфакс