Рускиот министер за надворешни работи Сергеј Лавров ги повика во средата сириската опозицијата и претставниците на владата на претседателот Башар ал-Асад да се обединат во борбата против тероризмот, а истовремено сириските власти во консултација со Москва се согласиле да разгледаат голем број предлози од опозицијата и да се создаде Комитет за човекови права.

Разговорите меѓу дел од сириската опозиција, во кој не е Националната коалиција во егзил којашто ја поддржуваат Западот, сунитска Турција и сунитските апраски земји од регионот, која започна оружено востание во март 2011 година за соборување на алавитскиот шиитски претседател Башар ал-Асад кој го продолжи децениското стратешко сојузништво со Русија, започнаа во Москва во обидот да се заживеат мировните напори за сопирање на четиригодишниот судир кој во меѓувреме се претвори во секташка граѓанска војна во која се појавија радикалните сунитски групи како Исламската држава и Фронтот ан-Нусра во чии редови се борат илјадници џихадисти од целиот свет, вклучително и од западните земји.

„Сметаме дека свеста на политичарите и на цивилната заедница за неопходноста од обединување против заедничката закана од тероризмот би требало да стане клучот за повторното единство на сирискиот народ“, им порача Лавров и на двете страни, кого го цитира РИА Новости.

Меѓутоа, аналитичарите сметаат дека малку е веројатно дека ќе биде постигнат позначителен напредок, бидејќи вооружената опозиција поддржана од Западот има исклучив став за заминување од функцијата на претседателот Асад, кој ја има поддршката од алавитите, дел од сунитските сириски племиња, христијаните и друзите, додека Курдите се држат резервирано во конфликтот, додека официјален Дамаск, поддржан од Москва и Техеран, смета дека за тоа треба да одлучат граѓаните на избори.

Тоа е причината зошто некои од западно протежираните опозициски групи, како Националната коалиција за сириска револуција и Опозициските сили одбија да дојдат на разговорите на сириската опозиција во Москва, истакнувајќи дека ќе учествуваат само во разговори кои ќе имаат цел Асад да замине од власта.

На средбата во Москва учествуваат 32 претставници на опозициски групи во Сирија и шест членови на делегацијата којашто ја предводи сирискиот амбасадор во Обединетите нации.

Ова не е прва средба на сириските опозициски групи, коишто Западот не ги смета за такви, под покровителство на Русија, меѓутоа е првата на којашто учество земаат толку голем број групи кои досега не учествуваа во преговорите, а во прв ред Националниот совет за координација на силите за демократски промени (CCND) и на Курдите со челници од власта, по неуспехот на преговорите на ткн средба Женева -2 од февруари 2014 година.

Како што подоцна во средата во Москва изјави челничката на опозициската Сириска татковинска партија, Маџ Нијази, делегацијата на официјалните власти се согласила да разгледа низа точки коишто ги предложиле опозиционерите, но истакнал дека за повеќето од нив се неопходни детални дискусии кои би можеле да се одржат во Дамаск.

„Претставниците на делегацијата на владата изјавија дека се подготвени да го разгледаат конкретниот список со политички затвореници чиишто ослободување го бара опозицијата, доколку им го доставиме, а исто така рекоа дека се согласни со формирање Комитет за човекови права. Сепак, притоа тие се изјаснија за разгледување на оваа и на другите точки во рамките на натамошните преговори“, истакнала, пренесува агенцијата ТАСС.

„Следната средба тие ја предлагаат да се одржи во Дамакс“, додала Нијази, која инаку е позната сириска уметница и генерален секретар на Сириската татковинска парија.

Прерано е да се зборува дека сириската опозиција на преговорите во Москва успеала да се договори за заедничкиот финален документ, предупредил претставникот на независната сириска опозиција, Џамал Сулејман.

„Од своја страна не можевме да и` претставиме на владината делегација конкретен документ. Изложивме неколку идеи, кои ги разгледувавме претходните денови, но тоа не може да се нарече финален договор. Преговорите со делегацијата на Дамаск одат многу тешко. Што се однесува до перспективата, имаме уште еден ден. Утре ќе се види дали има смисла да ги продолжиме консултациите“, додал Сулејман. /крај/мф/сн

Извор: Макфакс