Руското министерство за надворешни работи во четвртокот реплицираше на коментарот на американскиот државен секретар Џон Кери за тоа дека двете земји споделуваат тајни информации за џихадистите од Исламската држава, велејќи дека Москва не сака да биде вмешана во делување на сојузи кои го кршат меѓународниот закон, додека министерот за одбрана Сергеј Шојгу изјави дека предизвикува сериозна загриженост изјавата на неговиот американски колега Чак Хејгел кој порача дека армијата на САД покрај со терористите треба да се соочи и со „модерната и воено ефикасна“ руска армија којашто е на „прагот на НАТО“.
 
 

Руското министерство за надворешни работи во четвртокот реплицираше на коментарот на американскиот државен секретар Џон Кери за тоа дека двете земји споделуваат тајни информации за џихадистите од Исламската држава, велејќи дека Москва не сака да биде вмешана во делување на сојузи кои го кршат меѓународниот закон, додека министерот за одбрана Сергеј Шојгу изјави дека предизвикува сериозна загриженост изјавата на неговиот американски колега Чак Хејгел кој порача дека армијата на САД покрај со терористите треба да се соочи и со „модерната и воено ефикасна“ руска армија којашто е на „прагот на НАТО“.

Иако во соопштението на руската дипломатија не се негира дека таква соработка за екстремните исламистички групи постоела а ја прекинале САД, се истакнува дека е потребно да се појасни изјавата на американскиот државен секретар Џон Кери, според која тој со рускиот министер за надворешни работи Сергеј Лавров се договориле за споделување на тајните информации.

Кери претходно седмицава, по состанокот со Лавров во Париз, изјави дека САД и Русија се договориле за „јакнење на соработката кога станува збор за размената на тајните информации за Исламската држава, како и во поглед на антитерористичките предизвици во регионот“.

Руското министерство за надворешни работи извести дека Москва и од порано им помага на Сирија и на Ирак во борбата против тероризмот.

„Тие прашања беа поставени од државниот секретар на САД. Лавров, пак, истакна дека Русија од поодамна и постојано се справува со тероризмот и им пружа помош и на други земји кои се соочуваат со терористичката закана, вклучително и обезбедување значителна помош за Сирија, Ирак и други земји во регионот (на Блискиот исток) за зајакнување на нивната борбена способност. Русија ќе продолжи со тие напори, но нема да се вовлекува во ’коалиции’ кои се создадени со заобиколување на Советот за безбедност при ОН и го кршат меѓународното право“, се наведува во соопштението на руската дипломатија , кое го цитираат руските медиуми.

Москва всушност алудира дека Вашингтон се оглуши на повиците воздушните операции врз позициите на Исламската држава особено во Сирија да добијат мандат од Советот за безбедност на ОН и тие да бидат изведувани во координација со владата на претседателот Башар ал-Асад, кого всушност Западот сака да го собори поддржувајќи ги сунитските „умерени“ вооружени групации.

Во изјавата, исто така се истакнува дека руската страна на споменатиот состанок од вторникот во Париз потсетила дека во руско-американската Претседателска комисија работела група за антитероризам, во рамките на којашто, меѓу другото, била остварувана размена на заемно корисни информации.

„Сепак, активностите на Претседателската комисија и сите нејзини механизми, вклучително и групата за антитероризам, беа еднострано прекинати од американската страна“ од избувнувањето на украинска криза, се истакнува во одговорот на Москва.

Истовремено руската страна одговори и на изјавата од средата на американскиот министер за одбрана Чак Хејгел кој изјави дека американската армија ќе мора да соочи во наредниот период со терористичката закана, вклучително и онаа од Исламската држава, како и со модерната и ефикасна руска армија којашто според него е на границите на НАТО.

„Со американскиот министер за добрана Чак Хејгел се познавам лично. Оттаму, неговите зборови искажани на годишниот состанок на американската армија, во којашто руските вооружени сили ги изедначи со воен непријател, благо речено, ме изненади“, изјави рускиот министер за одбрана Сергеј Шојгу, кого го цитира РИА Новости.

„Денес во светот не постои ниедна невралгична точка на којашто не е присутна американската армија. Покрај тоа, по завршувањето на ткн ’мисии за промовирање на демократијата’ , таквите региони паѓаат во крвав хаос. Познати се примерите со Ирак, Либија, Авганистан и сега со Сирија. Дури трагичните настани во Украина не се без отворено менторство на претставници на оперативната група на Централната команда на армијата на САД“, изјави за медиумите рускиот министер за одбрана.

„Тезите на Чак Хејгел за потребата на американската армија да се подготви за да се ’справи’ со веќе ’модернизираната и ефикасна’ руска армија којашто е на ’прагот на НАТО’, предизвикува сериозна загриженоста. Тоа сведочи дека Пентагон разработува сценарија за операции на границите на нашата земја“, возврати Шојгу.

„Наместо зголемување на тензиите во моментов е неопходен искрен дијалог со целосната агенда за нашите односи со западните партнери. Тоа е единствениот начин да се изнајде заемно прифатлив начин за да се зачува постојната рамнотежа на силите и зајакнување на стратешката стабилност“, му порача рускиот министер за одбрана на својот американски колега. /крај/мф/сн

Извор: Макфакс