Администрацијата на САД ја понесува целата одговорност за судирот во Украина и неговите тешки последици, а исто така во спроведувањето на својата надворешна политика се потпира на целосни лаги, одговори во саботата министерството за надворешни работи на Руската Федерација на претходните обвинувања на Белата куќа дека рускиот претседател Владимир Путин „е виновен“ за уривањето на малезискиот патнички авион во источна Украина.

„САД продолжуваат да го туркаат Киев во насилното задушување на незадоволството на рускојазичното население. Еден е заклучокот – на администрацијата на американскиот претседател Барак Обама паѓа дел од одговорноста за внатрешниот судри во Украина и неговите тешки последици“, се наведува во изјавата на руското министерство за надворешни работи. „Судејќи според непопустливата кампања за клеветење на Русија, организирана од страна на американската администрација, таму сé повеќе се потпираат на отворените лаги во спроведувањето на својата надворешна политика. Имајќи ги предвид само најновите изјави на портпаролот на претседателот на САД, Џош Ернест, кој директно ја обвинува нашата земја за уривањето на малезискиот авион над Украина“, се истакнува во соопштението на руската дипломатија. Патничкиот авион „Boeing 777“ кој леташе од Амстердам до Куала Лумпур со 298 патници и членови на екипажот од кои 85 деца, на 17-ти јули се урна над источна Украина, 60-ина километри од границата со Русија, во областа на Донецк контролирана од проруските бунтовници. На последниот брифинг во Белата куќа во петокот, портпаролот Џош Ернест ги обвини руските власти и директно претседателот Путин за уривањето на малезискиот авион. Според него, ракетата земја-воздух била истрелана од територијата којашто ја контролираат проруските бунтовници. Ернест, исто така, рече дека информацијата за тоа дека украинските бунтовници обучени од Русија користеле ракетен систем „Бук“ администрацијата на САД ја добила од социјалните мрежи. „Како поткрепа на своите тврдења Вашингтон досега не даде ниеден доказ, па се повикува само на факти кои можат да се дискутираат и коментираат. Сите во Белата куќа се ограничуваат на споменување на некакви ’разузнавачки податоци’, чии извори никако да бидат наведени и, што е уште полошо, од ’информации од социјалните мрежи’. Со други зборови, вашингтонскиот режим во својата аргументација се потпира на неосновани антируски невистинити шпекулации, собрани на интернет. Познато е кој се занимава со затнувањето на мрежата со тоа ѓубре, тоа е само Вашингтон, а покрај тоа можеби и Киев“, се вели во остро интонираната руска реакција, како што претходно тамошното министерство за надворешни работи реагираше и на најновите проширувања на санкциите од Европската унија, предупредувајќи го Брисел дека потклекнувајќи пред притисоците на САД ја прекинува соработката со Русија во сферата на безбедноста што може да оди во полза на меѓународниот тероризам. Руското министерство за надворешни работи, исто така, истакнува дека Москва постави многу прашања до Вашингтон кој „сé повеќе се изолира себеси од можноста да согледа нешто поинакво освен сопствените планови и заклучоци“.„Пред да ги покажат ’виновниците’, САД би требало да одговорат на 10-те прашања од Министерството за одбрана на Русија и 22-те прашања формулирани од руската Федерална агенција за воздушен сообраќај. Зошто во Вашингтон молчат? Веројатно затоа што немаат одговори. Или затоа што одговорот се сведува на еден збор – санкции“, заклучува руската дипломатија. Претставници на руската армија на 21-ви јули објавија податоци во коишто е регистрирана ситуацијата на територијата на Донецката област непосредно пред трагедијата на малезискиот патнички авион. Тие факти, според Москва, пред властите во Киев поставуваат многу прашања, како што се за зголемената активност на украинските радарски системи во текот на денот на несреќата, лоцирањето во близина на територијата контролирана од бунтовниците на ракетен систем „Бук“ на украинската армија и воени авион на украинските сили кој му се приближил на малезискиот авион кусо непосредно пред падот./крај/мф/сн

Извор: РИА Новости