Русија ѝ испорачува воена опрема на владата на Сирија за борба против тероризмот, соопшти во понеделникот руското министерство за надворешни работи и ги оцени како измислици медиумските написи за наводното трупање руски сили во Сирија и дека ги менува своите ставови за оваа земја, откако Вашингтон изрази загриженост за овие медиумски извештаи.

„Руската страна никогаш не криеше дека испорачува воена опрема за официјалните власти во Сирија во нивната борба со тероризмот“, изјави за агенцијата РИА портпаролката на руското министерство за надворешни работи, Марија Захарова.

Додаде дека шефот на дипломатијата Сергеј Лавров во неодамнешниот телефонски разговор со американскиот колега Џон Кери, во кој Стејт департментот соопшти дека била изразена загриженоста на Вашингтон од таквите информации“ му кажал дека „таквата помош Русија секогаш ја давала и дека и натаму ќе ја дава“.

„Државниот секретар јасно кажа дека доколку тие извештаи се точни, тие акции би можеле да водат кон натамошна ескалација, поголеми загуби на живот, поголем број бегалци, а се закануваат и со судир со коалицијата којашто во Сирија дејствува против таканаречената Исламска држава“, се наведува во соопштението на американската дипломатија без прецизирање на која коалиција се однесува.

Руското министерство за надворешни работи во понеделникот ги нарече „фалсификувани и измислени“ медиумските извештаи дека ги менува своите стави во однос на војната во Сирија или во врска со сирискиот претседател Башар ал-Асад, кој ја продолжи децениската стратешка тесна соработка на Дамаск со Москва.

„Ние не ги именуваме, ниту ги разрешуваме странските државници, ниту самите, ниту во соработка со некого“, порача Москва.

Во меѓувреме ирскиот новинар Брајан Мекдоналд објави анализа на причините и потеклото на наводни информации кои беа објавени во американските медиуми за наводното зголемено руско воено присуство во Сирија и наводното руско приближување со Саудиска Арабија која ги финансира сириските сунитски опозиционери против претседателот Асад.

Рускиот претседател Владимир Путин изјави минатиот петок дека сé уште е прерано да се зборува за воен ангажман на Русија во Сирија за борба против радикалната сунитска групација Исламска држава. Запрашан за евентуален воен ангажман на Русија, против џихадистите, Путин на новинарите им одговори дека „се разгледуваат различни опции, но ова за што вие зборувате не е дневен ред“.

„Прерано е да кажеме дека сме подготвени да одиме таму веднаш“, одговори рускиот челник, сепак потсетувајќи дека Русија со децении, вклучително и на владата на претседателот Башар ал-Асад, на Сирија ѝ продава оружје. „Ја снабдуваме Сирија со поприлично сериозна помош во воена опрема, со оспособување на нивните единици коишто ги вооружуваме“, додаде Путин.

Повеќе медиумски извештаи објавени во четвртокот и петокот, кои се повикуваа на неименувани американски функционери, говореа за наводно зголемување на руските воени сили во Сирија, кои се инаку присутни во децениската единствена во овој регион воена руска база во Тартус, како и за јакнењето на воената поддршка на сојузникот на Москва, сирискиот претседател – алавитот (шиит) Башар ал-Асад, кого САД под притисок на своите сунитски сојузници во регионот, во прв ред Турција и Саудиска Арабија сакаат да го соборат од власта и не го прифаќаат рускиот предлог да се оди на избори и политичката транзиција во Сирија да се изврши со учество на сите фактори, туку бараат тие неизоставно да се одржат без негово учество.

Цитирајќи неименуван извори од администрацијата на американскиот претседател Барак Обама, дневниот весник The New York Times објави дека Русија испратила воен извидувачки тим во Сирија и монтажни куќи за стотици луѓе и опрема за полски аеродром во Сирија. Според толкувањето на весникот, тоа говори дека Москва би можела да распореди до 1.000 воени советници и друг воен персонал на аеродромот кај Латакија, главното морско пристаниште во Сирија./крај/мф/сн

Извор: Макфакс