Сите наведувани крстаречки проектили кои во средата беа истрелани од бродовите во Каспиското Езеро ги погодија целите во Сирија, објави руското министерство за одбрана во четвртокот вечерта веднаш откако неименуван американски функционер изјави за медиумите дека четири паднале на територијата на Иран, кој исто така, негираше дека има информации оти на негова територија паднале руски ракети.

Руското министерство за одбрана во средата објави дека четири бродови од нејзината Касписка флота истрелале 26 наведувани проектили врз цели на Исламската држава во Сирија со прецизност на најмногу пет метри од целта. Ракетите летале преку териториите на Иран и на Ирак, од Каспиското Езеро, односно од оддалеченост од околу 1.500 километри.

„Без разлика на тоа колку непријатни и ‘неочекувани’ биле за нашите колеги во Пентагон (министерството за одбрана на САД) и во Ленгли (седиштето на Централната разузнавачка агенција – CIA), вчерашните многу прецизни удари врз инфраструктурата на Исламската држава во Сирија, сите лансирани проектили ги најдоа своите цели“, изјави во Москва портпаролот на руското министерство за одбрана, генерал-мајорот Игор Конашенков.

Според него, според веродостојноста во информациите на американската телевизиска мрежа CNN која признава дека целите на Исламската држава биле оддалечени меѓусебно, ти најверојатно експлодирале самите од себе.

„За разлика од CNN, ние не даваме изјави повикувајќи се на анонимни извори, и ги прикажуваме лансирањата на нашите ракети и целите коишто тие ги погодуваат во реално време…. Секој професионалец во оваа област знае дека при спроведувањето на таквите операции секогаш се фиксира сликата на целта до и по ударот“, додаде Конашенков потсетувајќи дека над Сирија летаат и руските беспилотни летала.

Претходно неименуван американски воен извор изјави дека четири од наведуваните проектили истрелани од Каспиското Езеро паднале во Иран.

Меѓутоа, американскиот Стејт департмент не можеше да ја потврди таа информација. „Јас не сум во позиција во оваа фаза“, изјави шефот на службата за односи во јавноста на американската дипломатија, Џон Кирби, одговарајќи на прашањето да ги коментира тврдењата за паѓање на руските проектили во Иран.

Министерството за одбрана на Иран го негираше информациите за наводното паѓање на руските ракети на територијата на земјата, пренесе агенцијата Fars. „Министерството за одбрана ги негираше западните медиумски извештаи дека четири од 26-те ракети истрелани од руската Касписка флота врз цели на терористичката група Исламска држава во Сирија паднале на иранска територија“, се наведува во извештајот на агенцијата. Министерството тоа ги оценува овие извештаи како дел од „психолошката војна на Западот“.

Руското министерство за надворешни работи, изјави дека рускиот и американскиот шефови на дипломатиите, Сергеј Лавров и Џон Кери, разговарале во четвртокот за ситуацијата во Сирија. Тие разговарале за координацијата на борбата против Исламската држава и потребата да се избегнат инциденти во сирискиот воздушен простор на кој дејствуваат и руските и американските авиони.

САД објавија во средата дека нема воено да соработуваат со Русија во Сирија, бидејќи оценија дека стратегијата на Москва „трагично има недостатоци“, според министерот за одбрана Ештон Картер, додека руското министерството за одбрана соопшти дека Вашингтон само бараат изговор да не соработуваат во борбата против тероризмот.

Меѓутоа, САД истакнаа дека сакаат да одржуваат основни технички разговори со Русија за да се направи обид за се гарантира безбедноста на летовите./крај/мф/сн

Извор: Макфакс