Руските воени авиони кои Вашингтон ги обвини дека изведуваат „агресивни“ летови во непосредна близина на американски воен брод во Балтичкото Море, ги изведувале тие летови „почитувајќи сите безбедносни превила“., објави во четвртокот руската армија.

„Воочувајќи го американскиот брод во зоната на видливост, руските пилоти го насочиле леталото од бродот почитувајќи ги сите безбедносни правила“, изјави портпаролот на руското министерство за одбрана генералот Игор Конашенков додавајќи дека „не ги разбира претераните реакции“ од САД, пренесе агенцијата РИА.

Претходно во четвртокот портпаролката на Пентагон, потполковникот Мишел Болданза за телевизиската мрежа Fox 5 News изнесе нови детали за инцидентот меѓу руските воени летала и американскиот разурнувач „USS Donald Cook“

„Во вторникот двојка руски борбени авиони ‘Су-24’, најверојатно без вооружување, кружеа околу ‘Cook’ 11 пати. Во еден момент руски авион се наоѓаше на 30 стапки, или 9,14 метри, од бродот“, се наведува во писмената изјава на портпаролката.

Таа истакнува дека претходно во понеделникот, руски борбени авиони извеле „симултан приод за напад“ пролетувајќи на 100 стапки, 30 метри, од разурнувачот. Притоа двојката руски авиони пролетала пониско од командниот мост на бродот, соопшти претставничката на Пентагон.

Руски воени авиони извеле низа „агресивни“ прелети над американски воен брод во меѓународните води во Балтичкото Мое што изгледало како симулиран напад, изјави за AFP во средата американски воен функционер кој сакал да остане анонимен, а во меѓувреме Европската командата на американската армија објави видео од приближувањето на авиони „Су-24“ и хеликоптер „Ка-27“ покрај американскиот разурнувач „USS Donald Cook“.

Американски воени функционери во средата објавија дека два руски авиона „Су-24“ во понеделникот го надлетале американскиот разурнувач, а инцидентот се повторил и во вторникот.

Според нив, инцидентот се случил во меѓународните води на Балтичкото Море, околу 70 наутички милји од руската енклава Калининград, пренесе Reuters.

Белата куќа изрази загриженост поради овие извештаи, а руската агенција РИА објави дека руската страна уште не излегла со коментар,

Соговорникот на AFP го опишал прелетот на рускиот „Су-24“ на „помалку од девет метри“ над американскиот воен брод, што според негова оцена „изгледаше како симулиран напад“. „Тоа е најагресивното од сето што можевме да го видиме во последно време“, рекол неименуваниот американски функционер.

Претходно во јануари годинава Пентагон извести за „опасно“ приближување на руски борбен авион „Су-27“ до американски разузнавачки авион над Црното Море.

Воените маневри на американската морнарица започнаа во понеделникот, кога американскиот разурнувач бил на речиси 130 километри од руската енклава Калининград, најзападната руска територија меѓу Балтичкото Море, Полска и Литванија.

Два руски „Су-24“ дваесетина пати во понеделникот прелетале над „USS Donald Cook“ на оддалеченост помала од 900 метри и на височина од околу 30 метри, рекол американскиот функционер.

Потоа во вторникот руски противподморнички хеликоптер „Ка-27“ седум пати прелетал во близина на бродот снимајќи фотографии.

„Малку подоцна се појави Су-2 и прелета над бродот, толку близу што подигна бранови“, рекол соговорникот на AFP. Според него, се чини дека руските авиони не биле опремени со вооружување,

Американските морнари повеќепати се обиделе да го предупредат рускиот пилот преку меѓународни фреквенции, но не добивале одговор. „Според командантот (на разурнувачот), тоа било опасно и непрофесионално“, додал американскиот функционер./крај/мф/сн

Извор: Макфакс