Челникот на антисламистичката партија Нидаа Тунис (Гласот на Тунис), 87-годишниот Беџи Каид Ес-Себси води на претседателските избори во Тунис, но веројатно ќе мора да оди во вториот изборен круг, објави во неделата навечер шефот на неговата кампања.

„Беџи Каид Ес-Себси според првите процени води со голема разлика. Сепак, веројатно ќе се одржи и вториот круг“, изјавил за Reuters шефот на неговата изборна кампања, Мохсен Мазрук, оценувајќи дека не е далеку од 50 отсто од гласовите. Според агенцијата, разликата од најголемиот конкурент не е помала од 10 отсто.

Според излезните анкети, на второто место се наоѓа актуелниот претседател Монсеф Мазруки. Неговиот шеф на кампањата, Аднан Мансер, пак, тврди дека досегашниот шеф на државата е изедначен со противкандидатот Ес-Себси. „Во најлош случај сме изедначени, во најдобар – водиме со 2 до 4 проценти“, рекол Мансер за AFP.

Објавувањето на излезните анкети не беше дозволено, но сепак телевизијата објави дека Ес-Себси е во водство со 47,8 отсто, додека Марзуки освоил 26,9 отсто од гласовите.

Претседателските избори се одржаа во неделата во Туниската република, првпат по ткн „Револуција на јасмините“, од 14-ти јануари 2011 година, со којашто беше соборен од власт деценискиот авторитарен претседател Зине ал-Абидине бен-Али.

За претседател на Тунис се кандидираа дури 27 кандидати. Меѓу фаворитите беа поранешниот премиер Беџи Каед ЕС-Себси, лидер на Нидаа Тунис којашто победи на парламентарните избори од 26-ти октомври 2014 година, сегашниот претседател на заминување Монсеф Мазруки која ја презема должноста кон крајот на 2011 година благодарејќи на коалицискиот договор со исламистичката партија Енахде, неколку министри од времето на Зине ал-Абидине бен-Али, кандидатот на левата партија Хамма Хаммами, бизнис магнатот Слим Риахи, како и единствената кандидатка која учествуваше на овие избори, судијката Калтхум Кану.

Претседателот на изборната комисија Шафик Сарсар има време до 26-ти ноември да ги објави резултатите од првиот и да го објави евентуалниот втор круг кон крајот на декември, доколку еден од кандидатите во неделата не добие апсолутно мнозинство.

Одѕивот на гласачите до 16,30 часот по локално време, еден час пред затворањето на избирачките места, изнесувал 53,73 отсто.

Во текот на изборите не бил регистриран ниеден поголем инцидент, иако изборниот штаб на претседателот Марзуки ги обвини приврзаниците на противкандидатот Ес-Себси дека сакале да го нападнат.

Властите постојано ја истакнуваа важноста на овие први слободни претседателски избори во независен Тунис. „Ова е историски ден, ова се први претседателски избори во Тунис со унапредени демократски стандарди. Ако даде Господ, ќе биде тоа голем празник на демократијата“, изјави во неделата претпладне премиерот Мехди Џома, независен кандидат кој од почетокот на годината ја доби должноста да го извлече Тунис од длабоката политичка криза и да ги организира изборите.

За да се спречи враќање на диктатурата, новиот устав на Тунис му дава на претседателот, кој се избира со петгодишен мандат, многу ограничени овластувања, но неговото непосредно избирање од гласачите му дава голема политичка тежина.

Речиси 5,3 милиони избирачи можеа да гласаат во неделата, еден месец по парламентарните избори чија демократичност ја призна меѓународната заедница, што претставува исклучок во регионот, имајќи предвид дека најголемиот број од земјите коишто ја изведоа во 2011 година ткн Арапска пролет западнаа во репресија и хаос, предизвикан од судирите меѓу либералните и исламистичките струи, кои во некои земји се радикализираа./крај/мф/сн

Извор: AFP/Reuters