Повеќе од 10 илјади припадници на џихадистичката терористичка организација Исламска држава се убиени од почетокот на воздушните напади во Ирак и во Сирија од почетокот на воздушната кампања на меѓународната коалиција предводена од САД, изјави во средата вториот човек на американската дипломатија Ентони Блинкен, додека ирачкиот премиер Хајдер ал-Абади ја обвини коалицијата за неуспех.

„Сведоци сме на огромните загуби на страната на Исламската држава, повеќе од 10 илјади лица се убиени од почетокот на кампањата, и на крајот ќе има ефект“, изјави Ентони Блинкен за радиото France International, но притоа не наведе дали зборува за Ирак, за Сирија или за двете земји заедно.

Помошникот државен секретар на САД престојува во француската престолнина Париз поради состанокот на меѓународната коалиција против џихадистите кој се одржа во вторникот вечерта.

Претставниците на дваесетината земји и меѓународни организации дадоа поддршка за воениот план на ирачкиот премиер Хајдер ал-Абади за повторно освојување на западната покраина ал-Анбар, која од јуни 2014 година е под контрола на Исламската држава. Побараа од него и спроведување политички реформи, поради подобра интеграција на сунитската заедница којашто се смета за маргинализирана, откако во 2003 година беше соборен од власт диктаторот Садам Хусеин во чиешто време сунитите ја узурпираа власта за сметка на шиитското мнозинство.

Од своја страна, пак, ирачкиот премиер ал-Абади ја обвини меѓународната заедница за „неуспех“ во борбата со сунитската радикална групација Исламска држава, пред да ја изложи својата стратегија за ослободувањето на териториите кои ги освоија џихадистите.

„Мислам дека тоа е неуспех на меѓународната заедница. Во врска со поддршката во Ирак, има многу зборови а малку дела на теренот“, изјави премиерот Хајдер ал-Абади на прес-конференцијата во француското министерство за одбрана во Париз

Предупреди дека проблемите со коишто се соочува неговата земја се набавките на оружје и муниција во борбата со џихадистите. Инаку, САД под изговор дека стравуваат дека воената техника може да падне во рацете на џихадистити ја суспендираа испораката на Ирак веќе платените борбени летала и друга воена опрема, поради што владата во Багдад беше принудена да склучува итни договори со Русија.

Исламската држава, и покрај околу 4.100 воздушни удари од страна на меѓународната коалиција водена од САД, веќе цела година напредува во Ирак и во Сирија, каде што контролира територија со големина на Велика Британија на којашто прогласи калифат.

Абади на конференцијата предупреди дека постојано се зголемува бројот на странските борци во редовите на Исламската држава, а според неговата оцена тој изнесува 60 отсто. Според процените на американското разузнавање и на ОН, меѓу 25 и 30 илјади странски борци од целиот свет им се приклучиле на џихадистичките групи во Сирија и во Ирак.

„Тоа е меѓународен проблем кој мора да биде решен. Мораме да добиеме одговор зошто толку терористи доаѓаат од Саудиска Арабија, од земјите на Персискиот залив, Египет, Сирија, Турција и европските земји“, истакна ал-Абади./крај/мф/сн

Извор: Макфакс