Повеќе од три илјади милитанти од џихадистичките групации Исламска држава, Џебхат ан-Нусра и Џаиш ал-Јармук пребегале од Сирија во Јордан, по масивното напредување на армијата на сирискиот претседател Башар ал-Асад, соопшти во понеделникот сириски воен извор, а руските служби проценуваат дека најмалку 600 џихадисти се враќаат кон Европа од почетокот на руските воздушни удари.

Претходно во саботата генералот Андреј Картаполов од рускиот Генералштаб изјави дека руските воздушни удари започнати минатата среда во Сирија принудиле околу 600 борци на Исламската држава да се упатат кон Европа.

Сумирајќи ги резултатите од тридневната руска кампања Картаполов во соопштението објавено во саботата наведе дека руските разузнавачки служби дека милитантите ги напуштаат областите кои се под нивна контрола. „Паника и дезертерство ги зафатија редовите на терористите. Околу 600 платеници ги напуштиле своите позиции и се обидуваат да се вратат во Европа“, истакна генералот.

„Најмалку три илјади борци на Исламската држава, Џебхат ан-Нусра и Џаиш ал-Јамрук, пребегнаа во Јордан. Тие стравуваат од големата офанзива на сириската армија на сите фронтови и од ударите на руските авиони“, изјавил неименуван сириски воен фунцкионер за агенцијата РИА.

Според соговорникот, сириската армија во неделата ги бомбардирала позициите на Исламската држава и на Џебхат ан-Нусра во предградие на главниот град Дамаск, во покраините Деир-ез-Зор и Хомс, вклучително и во областа на градот Палмира каде што Исламската држава во неделата изврши уште едно големо злосторство врз светското културно наследство од листата на УНЕСКО.

Во Деир-ез-Зор сириските сили ја нападнале Исламската држава, обидувајќи се да ги потиснат нејзините борци од гратчињата Расафа, Рашидија, Ум-ал-Синаа и притоа биле убиени околу 160 џихадистички борци. Во судирот биле уништени и три оклопни возила на сириската армија, која признава дека има ранети војници но не го соопштува нивниот број или за смртно настрадани.

Во покраината Хомс сириската армија тврди дека успеала да уништи две колони на Исламската држава во близина на градот Палмира во областа Сехни, а артилеријата ги бомбардирала терористичките позиции во ал-Карајатајан, при што биле убиени 17 екстремисти.

Исто така, во покраината Хомс сириските борбени авиони и артилеријата извршиле напади врз позициите на сунитските радикални групации Џебхат ан-Нусра, Јатаиб ал-Фарук и Ахрар аш-Шам, кои се утврдени во селото Фаилак.

Според воени извори, во оваа џихадистичка коалиција започнале сериозни разидувања меѓу борците од сириско потекло и странските џихадисти во врска со командувањето. Сириските бунтовници наводно барале од странските борци да ги напуштат селата Хула, Растан и Талбиси за да се избегнат нападите на руските авиони и офанзивата на сириските копнени војски која беше објавена минатиот четврток.

Во понеделникот над селата Растан и Талбиси сириските борбени хеликоптери исфрлале летоци во кои на милитантите им се предлага да го положат оружјето а на цивилното население да се евакуира, бидејќи наскоро ќе започне голема воена операција на сириската војска. Такви летоци во понеделникот биле фрлан и на југот од покраината Хама.

Истовремено во предградијата на главниот град Дамаск сириските авиони ги нападнале бунтовничките позиции во Дума и Дараја, а во Харашти бил уништен команден пункт. Сириската армија се обидува да ги отфрли терористите подалеку од престолнината, бидејќи во изминатиот период тие со ракетни и минофрлачки оган ги гаѓаа централните и историски квартови на главниот град.

Сириската армија објави и дека во близина на северниот град Алепо одбиен е напад на Исламската држава врз воздухопловната школа, во рамките на воздухопловната база, која повеќе од две години е под опсада и притоа биле убиени најмалку 15 терористи./крај/мф/сн

Извор: SANA/РИА