Аргентинскиот обвинител Алберто Нисман, кој ги обвини претседателката Кристина Кишнер и министерот да надворешни работи Ектор Тимерман за заговор во врска со експлозијата во еврејскиот културен центар во престолнината Буенос Аиерес во 1994 година кога загинаа 85 луѓе, е пронајден мртов во својот стан неколку часа пред сослушувањето во Конгресот, пишуваат во понеделникот тамошните медиуми.

Ноќта кон понеделникот Алберто Нисман, обвинител за истрагата којашто беше отворена во 2004 година, е пронајден мртво во неговиот стан Пуерто Мадера, елитна населба во аргентинската престолнина Буенос Аирес.

„Настојуваме да ја одредиме причината за смртта. Можам да потврдам дека е пронајдено оружје со калибар 22 мм покрај телото. Смртта е предизвикана од истрел од огнено оружје“, изјави за медиумите обвинителка Вивиана Феин.

Според локалните медиуми, телото на Нисман било пронајдено во бањата од неговиот стан во понеделникот наутро. Како што изјави за локалната телевизија пратеничката Патрисија Булрич, парламентарците требало да се сретнат со обвинителот во понеделникот претпладне. Нисман требало да ги образложи во понеделникот попладне пред пратениците обвинувањата што ги покрена против претседателката, пренесува Reuters.

Минатата седмица Алберто Нисман побара отворање истрага против претседателката Кристина Кишнер поради попречување на работата на правосудните органи. Ги осомничи претседателката и министерот да надворешни работи Ектор Тимерман дека заговарале попречување истрага во полза на Иран, чии високи функционери ги гони аргентинското правосудство. Како што тврдеше Нисман, официјален Буенос Аирес ветил дека ќе ги ослободи иранските функционери за нападот од 1994 година, во замена за иранската нафта која на Аргентина ѝ е неопходна.

Нисман ги обвини Кишнер и Тимерман за заговор за „обезбедување неказнивост“ за Иранците, кои Аргентина ги обвинува за учество во експлозијата. Покрај тоа, Нисман се обрати до судот со барање за испрашување на претседателката и шефот на дипломатијата, како и замрзнување на нивниот имот од околу 23 милиони американски долари.

Покрај тоа, обвинителот обвини уште неколку аргентински политичари блиски до актуелната влада. Според него, тие биле посредници во преговорите со Иран, во кои Аргентина на Техеран му предлагала жито во замена на испорака на нафта, којашто е нужно неопходна за разнишаната аргентинска економија.

Владата преку министерот за надворешни работи Ектор Тимерман категорички ги отфрли обвинувањата на Нисман и тврди дека целта на неговата акција е да се дестабилизира владата девет месеци пред одржувањето на првиот круг од претседателските избор.

Во 1994 година, две години по нападот врз израелската амбасада во Буенос Аирес, во подметнувањето на експлозијата со којашто беше уништена зградата на еврејската организација AMIA при што се убиени 85 луѓе, а 200 беа повредени во центарот на аргентинскиот главен град.

Аргентина ги обвини за вмешаност во организацијата на најголемиот терористички напад во историјата на земјата повеќе високорангирани ирански функционери, вклучително и поранешниот претседател Хашеми Рафсанџани и седум поранешни владини функционери. Иранските власти секогаш жестоко ги негираат обвинувањата.

Претходно властите на Аргентина и Иран го ратификуваа Меморандумот за разбирање, со кој земјите се договорија за заедничка истрага на експлозијата. Против тоа остро реагираа претставниците на влијателната во Аргентина израелска заедница. Тие го нарекоа овој договор „неуставен“, кој го „обелува образот на иранскиот режим“ и „обезбедува неказнивост“ за организаторите на нападот, потсетува AFP./крај/мф/сн

Извор: AFP/Reuters