Најмалку 64 луѓе загинале а 270 се ранети во петокот во троен напад врз Големата џамија во Кано, со која управува еден од главните муслимански челници во Нигерија кој неодамна ги повика Нигеријците да се вооружат и да дадат отпор на радикалната исламска секта Боко Харам.
 

Најмалку 64 луѓе загинале а 270 се ранети во петокот во троен напад врз Големата џамија во Кано, со која управува еден од главните муслимански челници во Нигерија кој неодамна ги повика Нигеријците да се вооружат и да дадат отпор на радикалната исламска секта Боко Харам.

Три бомби експлодирале во дворот на Големата џамија во Кано и во блиската улица, кусо време по почетокот на традиционалната исламска петочна молитва, изјавиле очевидци за AFP.

„Две бомби експлодираа една по друга во кругот на Големата џамија, неколку секунди по почетокот на молитвата. Третата бомба експлодираше во блиската улица (…) Полицијата по експлозиите пукаше за да го одврати можниот напад“ изјавил за агенцијата Амину Абдулахи, верник кој бил во џамијата во времето на нападот.

Џамијата се потпира на палатата на емирот на градот Кано, Мохамед Сануси Втори, втор по важност муслимански челник во Нигерија. Засега не е познато каде бил емирот во време на нападот. Во истата таа џамија емирот минатата седмица го повика населението во северниот дел од земјата да се вооружи и да им пружи отпор на радикалните исламисти од Боко Харам, критикувајќи ја неспособноста на нигериската армија да ги брани цивилите од екстремистите.

Нападот го извеле двајца бомбаши самоубијци и вооружени лица, соопшти локалната полиција. Според претставник на полицијата, нападот го извршиле двајца самоубијци кои влегле во џамијата, а потоа „непознати луѓе отворија оган врз луѓето кои се обидуваа да им помогнат на повредените или да се сокријат“. Во нападот учествувале најмалку 15 бунтовници, од кои покрај двајцата самоубијци четворица биле убиени, а другите успеале да побегнат, соопшти полицијата во Кано.

Болницата во Кано примила 120 тела по нападот, а во трите болници во градот се регистрирани 270 ранети, рекол челникот на спасувачките служби кој сакал да остане анонимен. „Бројот на жртвите ќе расте“, предупредил.

Нигериската армија на почетокот од септември призна дека бунтот на Боко Харам му се заканува на суверенитетот на земјата. Меѓутоа тврди дека ја преземала контролата над повеќе градови.

Боко Харам пет години води вооружен бунт, главно концентриран во североисточна Нигерија. Само досега во 2014 година Боко Харам ја презема одговорноста за смртта на повеќе од три илјади луѓе во цела Нигерија. Кога во 2009 година првпат јавно го призна своето постоење, оваа радикална исламистичка група којашто некои ја сметаат за секта, ги напаѓаше само христијаните во желбата да ги протера или преобрати за од Нигерија да направи исламска држава во којашто ќе владее шеријатот, меѓутоа од 2013 година цел ѝ се и припадниците на безбедносните сили и цивилите, како христијани, така и муслимани.

Боко Харам инаку е основана во 2002 година како секта на салфитите, кои во прво време сакаа да прогласат исламска држава во северна Нигерија. Од тогаш, според нигериските власти, во нејзините терористички акти загинале над 10 илјади луѓе. Групата којашто го забранува западниот модел на образование, а особено на жените, извршува напади и врз училишни комплекси и интернати, а во еден таков од април годинава градот Чибок киднапираше 276 ученички од кои успеаја да побегнат 57, но судбината на 219 сѐ уште е непозната.

Исламистичката групација Боко Харам е активна во северните и централните делови на Нигерија каде што мнозинството население се муслимани. Групата која е поврзана со глобалната терористичка мрежа Ал Каеда, ја презема одговорноста за многу терористички напади и стои зад други вооружени напади врз верски објекти, села, како и во соседните држави. Нејзините борци беа вклучени во неколку терористички напади во 2011 година, вклучително и врз седиштето на Обединетите нации во главниот град Абуџа.

Во Нигерија последните месеци се разжестува бунтот на исламистите чии упоришта се во североисточниот дел од земјата, каде што е прогласена вонредна состојба. Судири меѓу муслиманските милитанти и нигериската војска се разгоруваат повремено во регионите Борно, Потискум и Јоба. Спорадични пресметки има и во провинцијата Вудилу, на околу 20 километри од Кано, најголем град во северниот дел од Нигерија, како и во Баучи, во една од 12-тe провинции во северна Нигерија со мнозинско муслиманско население. Таму пред девет години почна да спроведува шеријатско право, што предизвика судири меѓу муслиманите и припадниците на локалното христијанско малцинство.

Нигерија е составена од вкупно 36 сојузни држави и има население од околу 160 милиони, кои речиси по половина се христијани на југот и муслимани на северот, но милиони од нив живеат и на север и на југ.

Нигерија е најголемиот производител на нафта во Африка, и извезува околу 2,2 милиони барели нафта дневно. Меѓутоа, нафтената индустрија во земјата трпи загуби поради честите напади што ги изведуваат борците на Движењето за ослободување на делтата на Нигер и други вооружени групи, врз објекти на „Chevron”, „Shell” и други нафтени компании./крај/мф/сн

Извор: Макфакс