Најмалку 21 човек е убиен во петокот во борбите во близина на либиската престолнина Триполи, соопштија во саботата воени извори, а истовремено се одвиваат преговорите меѓу двата ривалски либиски парламента кои се водат под закрила на Обединетите нации во Мароко, за да се стави крај на насилствата во оваа земја кои се разгореа по соборувањето на деценискиот водач Моамер ел-Гадафи во 2011 година.

Силите на едната влада, којашто ја признава меѓународната заедница, ги поразиле борците на коалициите од племенските и исламистички милиции Фаџр Либија (Либиска зора) во Тажура, 30 километри од Триполи. Владините сили ја нападнале базата на споменатата милиција во новиот обид да ја преземат целосната контрола над либиската престолнина, пренесува AFP.

„Четиринаесет војници, четири припадници на милициите и една жена се убиени во Тажура“, изјавил за агенцијата провладин воен извор. Додал дека жената била случајно застрелана, како и дека уште 24 луѓе се ранети.

Либија има две влади и два парламента откако во август 2014 година главниот град Триполи го заземаа милициите, а признатата влада се повлече на истокот од земјата.

По двата состанока во март годинава, преговорите меѓу двете ривласки либиски парламента, беа повторно покренати во четвртокот во Ширата, во близина на мароканската престолнина Рабат.

Тешката ситуација со илегалните имигранти во Средоземјето, кои ги има сé повеќе и до кои илјадници смртно страдаат во обидот да дојдат до италијанскиот брег, не може да се реши поинаку од со стабилизирање на Либија, се согласија во петокот во Вашингтон италијанскиот премиер Матео Ренци и американскиот претседател Барак Обама, истакнувајќи дека единственото решение за постигнување „мир во Либија е стабилноста на либиските институции“.

Инсистирајќи на потребата од координирано меѓународно дејствување во врска со споменатиот проблем, Ренци истакна дека 90 отсто од илегалната имиграција од Африка доаѓаат од Италија токму преку Либија.

Обама, пак, рече дека САД се загрижени од формирање области кои ги контролираат терористички групи, како и дека „организацијата Исламска држава сака да го искористи хаосот во Либија за таму да постави свои луѓе“. Координацијата со Италија и со другите клучни партнери ќе биде многу силна, изјави американскиот претседател додавајќи дека проблемот „не може да биде решен со неколку напади со беспилотни летала или со неколку воени операции“.

На крајот од март либиските сили кои се под контрола на властите во главниот град Трипили добија наредба да се повлечат од базите покрај големите нафтени пристаништа и да заминат да се борат против Исламската држава во Сирт, градот во централниот дел од земјата. Во Либија јакне влијанието на исламистичките сили кои се верни на Исламската држава, и тоа поради безбедносниот вакуум кој дојде по борбите на различните партии по востанието од 2011 година.

Во Сирт, голем град во централниот дел од Либија, на почетокот од годинава исламистичките герилци ги нападнаа силите лојални на владата во Триполи и ги заземаа владините згради, универзитетот и радиото.

Присутноста на Исламската држава во Либија стана очигледна кога во февруари џихадистите обезглавија 21 египетски државјанин, што наиде на осуди во целиот свет./крај/мф/сн

Извор: Макфакс