Спасувачките екипи на Еквадор ја продолжија трката со времето и во ноќта кон понеделникот во обидот да се извлечат од под урнатините преживеаните од земјотресот во кој животите ги загубија најмалку 272 луѓе, а околу две илјади се повредени. Во уривањето на околу триесетина хотели, меѓу жртвите има и странци, а потврдено е дека двајца Канаѓани ги смртно настрадале.

„Бројот на мртвите ќе порасне, и тоа веројатно значително. Ова се тешки моменти, станува збор за најголемата трагедија во последните 67 години, единствено поголема е онаа по земјотресот во 1949 година во Амбату, во централниот дел на земјата“, предупреди еквадорскиот претседател Рафаел Кореа, кој во неделата се врати во земјата прекинувајќи ја посетата на Италија соопштувајќи ги новите привремени податоци.

Според Кореа, бројот на повредените изнесува засега 2.068 лица, и претставува коригирање на претходно соопштената бројка од 2.557 која ја соопшти потпретседателот Хорхе Глас. Уште додека во неделата беше во посета на Ватикан, претседателот Кореа деблокираше итна буџетска помош од околу 600 милиони американски долари.

Тој во неделата доцна ноќта допатува во Манта. Во оваа област, која го зафаќа еквадорскиот брег, настраданите со голи раце ги бараат преживеаните под урнатините, и втора ноќ по ред минаа под отворено небо, од страв од последователните потреси или за да го чуваат од кражби она малку што успеаја да го спасат.

Во Портовиеј, на западот од земјата, еден од најпогодените градови, урнати се куќи, опустошен е локалниот пазар, столбовите од уличното осветлување се на земја и делови од објекти се расфрлени по тротоарите, сведочејќи за димензиите на потресот со магнитуда од 7,8 степени по Рихтер.

„Веќе извлековме три тела, но мислиме дека има уште десет или единаесет кои се приклештени“, изјавил за AFP член на спасувачката екипа на урнатините во хотелот „El Gato“, шестокатница којашто целосно е урната.

Стотина затвореници ја искористиле неочекуваната можност што им ја пружи стихијата и побегнаа од затворот во Портовиеј. „Започнавме операции за повторно да ги фатиме“, напиша на Twitter министерката за правда Леди Зунига, и соопшти дека дел од нив досега се пронајдени.

Во Гуајаквил, иако речиси 400 километри јужно од епицентарот на потресот, локалното население силно го почувствувало треперењето на почвата. Оскар Алава, 41-годишен инженер вели дека неговото семејство било предупредено за опасноста од лаењето на нивниот пес. Во овој пристанишен град со околу два милиона жители, еден маж е смачкан во автомобил врз кој се урнал мост, а девојченце смртно настрадало откако врз неа паднал дел од урнат покрив на трговски центар.

Во Манта, на западниот брег на Еквадор, град близу епицентарот на потресот чијшто хипоцентар бил на само 20-ина километри длабочина, „урнати се куќи, уличното осветление е паднато, има закопани под урнатините“, опишува 40-годишната службеничка Миријам Сантана.

Европската унија најави активирање на европскиот механизам за цивилна заштита за помош на оваа јужноамериканска земја, додека американскиот државен секретар Џон Кери ја понуди помошта од САД. Во погодените подрачја упатени се 14.000 припадници на безбедносните сили, 241 здравствен работник и две мобилни болници. Засилување на спасувачките екипи им пристигнува од Колумбија, Мексико, Чиле, Шпанија…

Во Педерналес, епицентарот на земјотресот, популарна туристичка дестинација со плажи на Тихиот Океан, властите го проценуваат бројот на загинатите на 300 до 400 жртви, истакнувајќи дека се уништени 30 хотели. „Педерналес е опустошен, зградите се урнати, особено хотелите каде се сместени бројни туристи, има мртви тела. Потребна ние е помош“, апелираше градоначалникот Габриел Алсивар./крај/мф/сн

Извор: AFP