Во падот на малиот ирански патнички авион од типот „Iran-140“ на иранската воздухопловна компанија „Sepahan Airlines“ на летот од главниот град Техеран кон источниот град Табас во неделата наутро, кој веднаш по полетувањето паднал на пат и парк во близина на аеродромот „Мехрабад“, загинати се најмалку 39 а повредени се 9 лица, соопштија иранските државни медиуми.

Првично беше јавено дека во несреќата загинале си те 40 патници и осумте членови на екипажот, меѓутоа подоцна ирачките медиуми јавија дека има преживеани во трагедијата.

Новинската агенција на Исламската Република (IRNA) пренесува дека преживеале осум или девет патници, а повикувајќи се на лекар од брзата служба извести дека еден од преживеаните дошил при свест. Државната телевизија, пак, јавува за 38 жртви и 10 повредени кои во критична состојба се префрлени во болниците во Техеран. Иранската студентска новинска агенција (ISNA) известува дека пет лица од урнатиот авион биле префрлени во болница, но додава дека лекар од болницата „Имам“ соопштил дека тие починале.

Управата за цивилен воздушен сообраќај на Иран објави дека меѓу патниците имало две бебиња и три деца помлади од 12 години.

Пилотот открил технички проблеми четири минути по полетувањето и скршнал од курсот кон запад во обидот да се врати на аеродромот во Техеран, меѓутоа двомоторниот турбопропелерскиот авион се урнал на патот крај парк во 9,18 часот по локално време (6,48 по македонско време) во близина на квартот Азас, но на земја нема жртви и повредени, пренесува Press TV повикувајќи се на државната телевизија..

Иранската цивилна авијација којашто опслужува пазар од 76 милиони луѓе трпи последици од меѓународните санкции наметнати од Западот, што се одразува и врз безбедноста во воздушниот сообраќај. Авионите, имено, се одржуваат со купување делови на црниот пазар. Така, четирите најголеми ирански воздухопловни компании „Iran Air“, „Iran Aseman Airlines“, „Mahan Air“ и „Iran Air Tours“ поседуваат воздухоплови стари и по 22 години.

Поради западните санкции коишто им забрануваат меѓу другото на странските компании да ја снабдуваат Исламската Република со авиони и резервни делови, почна со развивање свој патнички авион. Во 2000 година Иран ја купи лиценцата за производство на авионот од типот „Антонов Ан-140“, врз чија база во 2003 година беше создаден првиот ирански патнички авион „Iran-140“, кој може да превезе до 52 патници, а неговата сигурност досега не беше доведувана во прашање.

Минатата 2013 година, Иранската организација за воздухопловна индустрија (IAIO) соопшти дека се развива нов тип патнички авион наменет за домашните летови „Iran-141“ Изградбата на првиот авион од новиот тип требаше да започне во март 2014 година.

Најголемата авионска несреќа во Иран во последно време се случи во јануари 2011 година, која патнички авион се распадна во обидот принудно да слета во снежна виулица во северозападниот дел од Иран, која загинаа 77 луѓе. Во јули 2009 година авион се уран, исто така, во северозападниот дел на земјата, кусо време по полетувањето од Техеран при што загинаа сите 168 лица во воздухопловот. Една од најтешките авионски несреќи во Иран се случи во февруари 2003 година, во југоисточните области, кога се урна авион од типот „Илушин Ил-76“, при што загинаа 302 патници и членови на екипажот./крај/мф/сн

Извор: Макфакс