Михај Џонсон кој во четвртокот вечерта во Далас уби пет и рани уште седум полицајци, делувал сам, соопштија властите, а во саботата американскиот претседател Барак Обама објави дека поради овој напад кој го заживува болното сеќавање на расизмот во САД, ќе ја скуси посетата на Европа и ќе замине во Далас, откако претходно Белата куќа објави дека ќе го продолжи учеството на самитот на НАТО во Варшава.

Во нападот кој се случи во четвртокот вечерта при крајот на мирниот протест поради неодамнешните полициски убиства на двајца Афроамериканци. покрај дванаесетте полицајци застрелани се уште два цивила, изјави градоначалникот на Далас, Мајк Роулингс.

Полицајците кои го обезбедувале протестот верувале во тој момент дека се нападнати од повеќе напаѓачи, но до петокот попладнето истрагата заклучи дека 25-годишниот поранешен војник во Авганистан, Михај Ксавиер Џонсон, вооружен со полуавтоматска пушка делувал сам.

„Сега изгледа дека имало еден напаѓач, неповрзан со која и да е меѓународна организација, ниту вдахновен од некоја од нив“, изјави во Њујорк министерот за татковинска безбедност на САД, Џех Џонсон.

На конференцијата за медиумите во Далас, градоначалникот Роулингс изјави дека „осомничениот пукал од една зграда од различни катови“, пренесува агенцијата Reuters.

До претпоставката дека во нападот учествуваат повеќе снајперисти дошло поради тоа што на мирниот протест „имало 20 вооружени демонстранти од кои некои по првите истрели започнале да трчаат“ и така ја довеле полицијата во заблуда, според Роулингс.

Во сојузната држава Тексас законот овозможува слободно шетање со пушка. Таква фотографијата од протестот се појави на социјалните мрежи, за наводно осомничено лице, но тоа подоцна самото се пријави во полициска станица.

Откако снајперистот Џонсон е убиени по подолга престрелка со помош на робот бомба, „градот сега е сигурен“, тврди Роулингс.

Началникот на полицијата во Далас, Дејвид Браун, на прес-конференцијата во градскиот совет изјави дека откако размениле оган со осомничениот, полицајците „не гледаа друга опција туку да искористат бомба робот“.

Осомничениот рекол дека е гневен поради непочитувањата на животите на црнците, изјави Браун, и самиот црнец.

„Рекол дека е лут поради полициските пукања, дека е лут на белите луѓе. Изјавил дека сака да убива бели луѓе, особено полицајци“, додаде Браун.

Напаѓачот на полицијата ѝ рекол дека „крајот се приближува“, дека уште полицајци ќе бидат повредени и убиени, како и дека низ центарот на Далас се поставени бомби.

Полицијата приведе уште три лица, но властите во јавноста не ги поврзуваат со нападот. Функционери, сепак, велат дека уште истражуваат дали Џонсон имал соучесници.

Претседателот Барак Обама ќе се врати во Вашингтон во недела навечер, „ден порано од предвиденото“ и ќе замине за Далас „на почетокот од следната седмица“, на повик на градоначалникот Роулингс, го пренесува AFP.

Претходно во петокот портпаролот на Белата куќа појасни зошто американскиот претседател Барак Обама, одлучил сепак да остане на самитот НАТО во полската престолнина Варшава, а не да се врати во земјата поради нападот. „Во работата на претседателот има многу приоритети, и неопходно е да се избере од најважните“, рече Џош Ернест.

Илјадници луѓе протестираа мирно во петокот во неколку американски градови, како Аталанта во Џорџија, Хјустон во Тексас, Сан Франциско во Калифорнија и пред Белата куќа во Вашингтон./крај/мф/сн

Извор: Макфакс