Генералниот секретар на НАТО, Јенс Столтенбер смета дека руската поддршка на сирискиот претседател Башар ал-Асад ја продлабочува кризата во Сирија, а Европската унија ја повика Русија „итно да престане“ со наводните напади врз вооружената сунитска опозиција во Сирија која таа ја смета за „умерена“ и со упади во воздушните простори на соседните земји, додека челници од Саудиска Арабија сметаат дека руската интервенција во оваа земја ќе ги поттикне екстремистите да се вклучат во судирот.

„Русија би требало да одигра конструктивна улога во борбата против Исламската држава. Да се поддржува режимот на (сирискиот претседател Башар ал-)Асад не е конструктивно, Тоа само ја продолжува војната во Сирија“, изјави генералниот секретар на НАТО, Јенс Столтенбег, пред парламентарното собрание на алијансата во Норвешка.

Столтенберг, исто така, рече дека воениот пакт предводен од САД нема намера да испраќа копнени сили во Сирија. Претходно во неделата и рускиот претседател Владимир Путин во интервју за државната телевизија негативно одговори на прашањето дали Русија по воздушните операции може да се реши и за копнена воена акција на сириското боиште.

Русија, којашто е децениски сојузник на Сирија, од 3-ти октомври започна по барање на официјален Дамаск со воздушни операции врз позициите на Исламската држава во Сирија. Меѓутоа, САД и неговите западни и арапски сојузници тврдат дека руските авиони ги бомбардираат и нивните сунитски сојузници во Сирија и ја повикуваат Москва да се концентрира на Исламската дражва.

Тензиите пораснаа откако НАТО ја обвини Русија дека нејзини борбени авиони го повредиле воздушниот простор на Турција, членка на Алијансата. Русија потврди дека нејзини авион „накусо го повредил турскиот воздушен простор поради лоши метеоролошки услови“ и ѝ се извини на Анкара со ветување дека во иднина нема да има такви инциденти. Во другите два случаја Генералштабот на турската армија објави дека станува збор за неидентификувани авиони „МиГ-29“ кои ги провоцирале на границата со Сирија турските „F-16“, а во Сирија руските сили немаат авиони од овој тип.

И Европската унија во понеделникот ја повика Русија „итно да престане со нападите на умерената сириска опозиција“ и со упадите во „воздушниот простор на земјите во сириското соседство“, што доаѓа во период кога сириската војска потпомогната од руските воздушни удари и сојузничките милиции како либанското шиитско движење Хезболах остварува напредување на боиштето.

Министрите за надворешни работи на земјите членки на У, кои во понеделникот се сретнаа во Луксембург изразија „длабока загриженост поради руските напади врз умерената сириска опозиција“. „Тоа мора веднаш да престане. Исто така, мора да престане руското кршење на суверениот воздушен простор на соседните земји“, се вели во заклучоците објавено по министерскиот состанок.

Европската унија е загрижена од тоа што руските воздушни напади не биле насочени само на Исламската држава и на другите терористички групи, туку на сите противници на сирискиот претседател Башар ал-Асад.

„Оваа воена ескалација може само да го продолжи судирот, да го поткопа политичкиот процес, да ја влоши хуманитарната криза и да го зголеми радикализмот. Нашата цел би требало да биде деескалација на судирите. ЕУ ја повикува Русија да се концентрира на заедничката цел постигнување политичко решение за судирот“, се истакнува во заклучоците.

ЕУ истакнува дека во Сирија се случува „трагедија од невидени размери“ во која досега загинале 250.00 луѓе, 7,6 милиони се прогонети од своите домови во земјата, а 4 милиони во странство. Најодговорна за тоа ЕУ ја смета власта на сирискиот претседател Асад, „ЕУ ги осудува прекумерните, непропорционални и неселективни напади кои сирискиот режим продолжува да ги прави против својот народ. Режимот на Асад ја носи најголемата одговорност за мртвите и раселените“, се вели уште во заклучоците.

Руската воена интервенција во Сирија ќе има „опасни последици“, ќе ја вовлече во секташката војна и ќе ги поттикне милитнатите од целиот свет за се вклучат во него, изјави во неделата за Reuters саудиски извор, интерпретирајќи ја пораката којашто има ја пренеле саудиските дипломати на руските челници во неделата во Сочи, што е трета посета на саудиски функционери на Русија во последните неколку месеци.

,Саудиска Арабија ќе продолжи да ја поддржува „умерената“ опозиција во Сирија цитирајќи ги изјавите на министерот за одбрана Мохамед бин Салман и шефот на дипломатијата Абдел ал-Џубејра на средбите со рускиот претседател Владимир Путин и министерот за надворешни работи Сергеј Лавров.

Алавитскиот (шиитски) претседател на Сирија, Башар ал-Асад од почетокот на граѓанската војна во март 2011 година ја обвинува сунитска Саудиска Арабија дека ги поддржува финансиски и воено радикалните сунитски елементи во земјата, вклучително и џихадистичката Џебхат ан-Нусра, сириското крило на Ал Каеда.

„Руската интервенција во Сирија ќе ја вмеша во секташката војна. Неодамнешната ескалација ќе придонесе за привлекување на екстремистите и џихадистите во војната во Сирија“, рекол соговорникот на Reutes.

Според него, Саудијците ја повикале Русија да помогне во борбата против тероризмот во Сирија со придружување на постојната коалиција која ја сочинуваат 20 држави кои повеќе од една година ја бомбардираат Исламската држава, но без особени резултати.

Рекол, исто така, дека сирискиот претседател Асад мора да замине од власта во рамките на наводно договорениот процес на конференцијата во Женева во јуни 2012 година. „Асад мора да замине и Саудијците ќе продолжат да ја зајакнуваат и поддржуваат умерената опозиција во Сирија“, рекол.

Русија, пак, и своевремено тврдеше дека Западот и сунитските земји од Персискиот залив погрешно го толкуваат Женевскиот договор, кој според нив не предвидува децидно заминување на Асад, туку транзиција а за судбината на претседателот треба да одлучуваат само Сиријците./крај/мф/сн

Извор: Макфакс