Вести
Нетанјаху: Израел мора да се подготвува за долготраен судир во Газа
Израелскиот премиер Бенјамин Нетанјаху изјави во понеделникот дека неговата земја мора да се подготви за долготраен судир во палестинската енклава Појасот Газа, со што ги поткопа надежите во брзиот крај на судирот во кој бројката загинати надмина илјада.
Во телевизиското обраќање на јавниот сервис, израелскиот премиер Бенјамин Нетанјаху изјави дека условот за решавањето на кризата е демилитаризацијата на палестинската територијата којашто ја контролира палестинското исламистичко движење Хамас и неговите сојузници, кои САД и ЕУ од порано ги ставија на листите со терористички организации.„Нема да ја завршиме мисијата, нема да ја завршиме операцијата без неутрализацијата на тунелите чија главна цел е уништувањето на нашите граѓани, убивањето на нашите деца“, изјави Нетанјаху, пренесува Reuters. „Мораме да бидеме подготвени на долготрајна (воена) кампања, додека мисијата не биде исполнета“, порача израелскиот премиер. Израелската армија претходно објави дека палестинските борци во понеделникот низ подземен тунел прокопан од длабочината на територијата на Појасот Газа се инфилтрирале на територијата на Израел и влегле во село и отвориле оган врз израелските војници. Израелските медиуми известуваат дека во понеделникот навечер и натаму трае потрагата по милитантите и војниците кои се сметаат за исчезнати, како и дека во судирот се убиени пет борци на Хамас.Исламистичкото движење Хамас, кое од 2007 година по кусотрајната војна со ривалското движење Фатах на палестинскиот претседател Махмуд Абаз со кое во јуни годинава склучи примирје и договор за формирање влада на националното единство што беше повод Израел да се повлече од сеопфатните мировни преговори, издаде соопштени во кое се наведува дека неговите борци убиле десет израелски војници по што безбедно се вратиле на палестинска територија. Токму мрежата тунели коишто со години наназад ги прокопал Хамас преку кои неговите борци се уфрлаат зад израелските линии, е во центарот на израелската офанзива започната на 8-ми јули под називот „Линија на одбраната“ во којашто веќе загинаа над 1.070 Палестинци, од кои повеќето цивили меѓу кои стотина деца, и најмалку 46 израелски војници и тројца цивили.Израелската армија во понеделникот, исто така, и повика цивилите во Појасот Газа особено во околината на градот Газа „веднаш“ да ги напуштат своите домови и да се упатат кон централните квартови на овој најголем палестински град. Секретарот на обединетите нации, Бан Ки-мун, ги повика Израел и Хаамс да го прекинат судирот во Газа и да ги почитуваат меѓународните повици на примирје. „Во името на хуманоста, насилството мора да биде прекинато. Палестинските и израелските челници мора како лидери да ја покажат својата човечност и да го прекинат насилството за да се направи првиот чекор кон мирот“, изјави Бан за новинарите. Челникот на светската организација истакна дека во понеделникот „долго разговарал“ со израелскиот премиер Нетанјаху и го повикал да го „сопре насилството и да ги почитува здружените напори на меѓународната заедница, како и нејзиниот едногласен повик на хуманитарно примирје“.Генералниот секретар на ОН го упати овој повик во понеделникот сличен на апелот на Советот на безбедност при ОН кој во едногласно донесената изјава побара моментално и безусловно примирје во Газа по повод Рамазански бајрам, кој започна во понеделникот кој го означува крајот на постот во светиот муслимански месец./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Вести
“Во основа е пекол на земјата”: Градот Газа оставен тотално без здравствената заштита
Во раните утрински часови во саботата, над купови бетон и урнатини, толпа лекари и пациенти пешачеа километри низ уништените улици на градот Газа, принудени да се евакуираат пеш од она што остана од болниците. Здравствените работници велат дека се плашат да ги оставаат критично болните пациенти зад себе во град кој сега во голема мера е сведен на урнатини, преземен израелските сили, со болници кои работат без струја, гориво, вода или храна, пишува британски „Гардијан“.
“Тоа е во основа пекол на земјата”, вели Вилијам Шомбург, шефот на Меѓународниот комитет на Црвениот крст во Газа, опишувајќи го она што остана од животот во градот.
Со недели, десетици илјади луѓе се надеваа дека во болниците во Газа ќе најдат засолниште кое е најблиску до безбедно бидејќи енклавата издржа интензивирачки бомбардирања.
Но, откако израелските сили се приближија до објектите и потоа ја нападнаа најголемата болница во Газа, Дар ал-Шифа минатата недела, илјадници луѓе беа раселени заедно со медицинскиот персонал, шетајќи низ уништените улици на југ од енклавата.
Палестинското министерство за здравство во Газа соопшти дека израелските сили побарале евакуација на болницата Ал Шифа вчераутро, три дена откога влегоа во објектот. Здравствените лица сведочат дека им им било кажано дека имаат еден час да ја евакуираат болницата која беше центар на здравствениот систем на Газа.
Најмалку 12.000 луѓе загинаа во израелскиот напад врз Газа по нападот на Хамас на 7-ми октомври, во кој загинаа 1.200 Израелци, а околу 240 луѓе беа заложници.
Вести
Борел: Целосно е невозможно да се евакуираат милиони луѓе од северот на Газа
Првиот човек на ЕУ-дипломатијата Жозеп Борел утринава на прес-конференција изјави дека евакуацијата на милиони луѓе од северниот дел на Газа е целосно невозможна.
Десетици илјади цивили почнаа да бегаат од јужниот дел на Газа вчера, откако Израел им порача на луѓето да ја напуштат областа пред очекуваната копнена офанзива.
„Да се замисли дека можеш да преселиш милион луѓе за 24 часа во ситуација во каква што е Газа, може да биде само хуманитарна криза“, рече Борел на последниот ден од тридневната дипломатска посета на Кина.
И покрај изјавата на ЕУ за поддршка на Израел, тој исто така предупреди дека и Израел е должен да го почитува меѓународното хуманитарно право во одбранбениот процес.
„Позицијата е јасна“, рече Борел. „Но, како и секое право, тоа има граница. А таа граница е меѓународното право“.
Вести
Проценки на ОН: Десетици илјади луѓе веќе ја напуштија Газа
Во текот на ноќта беа објавени најновите проценки на ОН за бројот на луѓе кои ги напуштиле своите домови во северниот дел на Газа.
Тие велат дека веруваат дека станува збор за десетици илјади кои се упатиле кон југ по предупредувањето за евакуација на Израел.
Пред наредбата за евакуација, повеќе од 400.000 Палестинци беа внатрешно раселени, според хуманитарната канцеларија на ОН OCHA.
Израелската војска им порача на околу 1,1 милион луѓе во северниот дел на Газа да заминат пред очекуваната копнена инвазија. Хамас, пак, ги повика луѓето да останат на место и да пркосат на израелската воена наредба.
Генералниот секретар на ОН, Антонио Гутереш рече дека наредбата од Хамас е „исклучително опасна – и во некои случаи едноставно не е возможна“.