Нигериското претседателство и армијата соопштија во петокот дека со вооружената исламистичка групација Боко Харам потпишале договор за примирје и за ослободувањето на повеќе до 200 ученички гранати кон средината на април, како и за другите заложници.
 

Нигериското претседателство и армијата соопштија во петокот дека со вооружената исламистичка групација Боко Харам потпишале договор за примирје и за ослободувањето на повеќе до 200 ученички гранати кон средината на април, како и за другите заложници.

„Нигериската сојузна влада и Групата за проповед на исламот (попозната како Боко Харам) потпишаа договор за примирје. Дадов наредба до командантите на корпусите на копнената војска да го осигурат спроведувањето на договорот на теренот“, изјави началникот на генералштабот на нигериската армија, Алекс Бадех, кого го цитира AFP.

Генералниот секретар на нигериската претседателска администрација, Хасан Тукур за агенцијата изјави дека со радикалната исламистичка група е склучен договор за прекин на судирите и за ослободување на 219-те ученички кои од април годинава се водат како исчезнати.

Групата којашто го забранува западниот модел на образование, а особено на жените, извршува напади и врз училишни комплекси и интернати, а во еден таков од април годинава градот Чибок киднапираше 276 ученички од кои успеаја да побегнат 57, но судбината на 219 сѐ уште е непозната.

Тукур за AFP потврди дека со ја претставувал нигериската влада на две средби со исламистичките бунтовници одржани во Чад, со посредство на чадскиот претседател Идриз Деби. „Се согласија да ги ослободат девојките од Чибок“, изјавил мислејќи на девојките кои на 14-ти април годинава беа грабнати од нивното средно училиште во градот во североисточна Нигерија.

Политички аналитичари се сомневаат дека е постигнат таков договор кој се случува во моментот кога нигерискиот претседател Гудлак Џонатан треба да ја објави кандидатурата за својот реизбор во февруари следната година, и во моментот кога безбедносните прашање се во центарот на политичката дебата.

Сé уште е непознато кој е Данлади Ахмаду кого Тукур го претставил како соговорникот од Боко Харам и кој во петокот дал интервју за државното радио. „Не сум слушнал за тој господин. Доколку Боко Харам сака да прогласи примирје, тогаш би морало тоа да го стори неговиот лидер., Абубакар Шеки“, оценува Шеху Сани, експерт за Боко Харам, кој веќе во неколку наврати преговараше со исламистите во рамките на напорите на нигериската влада да го запре бунтот на оваа група.

Кон средината на септември се појавија информациите дека Боко Харам ја преземала контролата на најмалку 25 градови во североисточна Нигерија, откако од почетокот на месецот во рацете на бунтовниците паднале десет градови во сојузната нигериска држава Јоба, исто толку во државата Борно и пет во Адамави. Исламистите тврдат дека исто како и џихадистичката Исламска дражва во Сирија и во Ирак, на ова подрачје во Нигерија воспоставиле калифат.

Боко Харам пет години води вооружен бунт, главно концентриран во североисточна Нигерија. Само досега во 2014 година Боко Харам ја презема одговорноста за смртта на повеќе од 2.500 луѓе во цела Нигерија. Кога во 2009 година првпат јавно го призна своето постоење, оваа радикална исламистичка група којашто некои ја сметаат за секта, ги напаѓаше само христијаните во желбата да ги протера или преобрати за од Нигерија да направи исламска држава во којашто ќе владее шеријатот, меѓутоа од 2013 година цел ѝ се и припадниците на безбедносните сили и цивилите, како христијани, така и муслимани.

Исламистичката групација Боко Харам е активна во северните и централните делови на Нигерија каде што мнозинството население се муслимани, и се залага за укинување на западниот модел на образованието, што и во превод значи нејзиното име, и воведување на строгите шеријатски прописи во целата земја. Групата која е поврзана со глобалната терористичка мрежа Ал Каеда, ја презема одговорноста за многу терористички напади и стои зад други вооружени напади врз верски објекти и села.

Иако нигериската армија објави дека е ликвидиран лидерот на Боко Харам, Абубакар Шеку, веројатно во периодот меѓу 25-ти јули и 4-ти август 2013 година, од раните што ги здобил во размена на огнот со безбедносните сили, исламистите од оваа група не престануваа со нападите. Наводната смрт на Шеку не влијаеше позначително врз намалувањето на интензитетот на акциите на исламистите, но сепак Боко Харем дејствува помалку моќно откако претседателот Гудлак Џонатан минатата година прогласи вонредна состојба во три северни сојузни држави и во мај 2013 година покрена офанзива против групата. Бунтот во почетокот беше ослабен со овие операции, меѓутоа и натаму има спорадични герилски напади. Подоцна се покажа и дека смртта на Шеку била непотврдена информација.

Во Нигерија последните месеци се разжестува бунтот на исламистите чии упоришта се во североисточниот дел од земјата, каде што е прогласена вонредна состојба. Судири меѓу муслиманските милитанти и нигериската војска се разгоруваат повремено во регионите Борно, Потискум и Јоба. Спорадични пресметки има и во провинцијата Вудилу, на околу 20 километри од Кано, најголем град во северниот дел од Нигерија, како и во Баучи, во една од 12-тe провинции во северна Нигерија со мнозинско муслиманско население. Таму пред девет години почна да спроведува шеријатско право, што предизвика судири меѓу муслиманите и припадниците на локалното христијанско малцинство, и оттогаш во судирите се убиени повеќе од илјада лица.

За нападите врз христијаните во Нигерија одговорноста редовно ја презема радикалната исламистичка група Боко Харам, основана во 2002 година која бара воведување на шеријатот (исламскиот закон) во Нигерија и искоренување на западниот секуларен модел на образование. Нејзините борци беа вклучени во неколку терористички напади во 2011 година, вклучително и врз седиштето на Обединетите нации во главниот град Абуџа. Боко Харам е обвинета за убиствата на повеќе од илјада луѓе во терористичките напади коишто ги интензивираше од 2009 година.

Нигерија е составена од вкупно 36 сојузни држави и има население од околу 160 милиони, кои речиси по половина се христијани на југот и муслимани на северот, но милиони од нив живеат и на север и на југ.

Според Меѓународната кризна група чие седиште е во Брисел, само во етничките и верските конфликти во Нигерија во периодот меѓу 1999 и 2009 година загинале повеќе до 14 илјади луѓе.

Нигерија е најголемиот производител на нафта во Африка, и извезува околу 2,2 милиони барели нафта дневно. Меѓутоа, нафтената индустрија во земјата трпи загуби поради честите напади што ги изведуваат борците на Движењето за ослободување на делтата на Нигер и други вооружени групи врз објекти на „Chevron”, „Shell” и други нафтени компании./крај/мф/сн

Извор: Макфакс