Демонстрантите во јужното калифорниско гратче Ел Кахон, 25 километри североисточно од Сан Диего, побараа во средата спроведување истрага откако полицаец убил невооружен црнец, пренесува Reuters во чиј извештај се додава дека новиот протест следел откако последните две седмици во два американски града се случија слични инциденти кои предизвикаа слични реакции.

Во најновиот инцидент, двајца полицајци одговориле на повикот дека еден афроамериканец, на околу триесетина години, „не се однесува присебно“. Полицијата не можела веднаш да ја идентификува жртвата, но локалните активисти и блиски на застреланиот тврдат дека станува збор за Акфред Оланг, роден во Уганда. Тврдат дека бил ментално болен и дека во моментот на инцидентот можеби имал напад.

Полицајците околу два часот утрото по локално време го пронашле Оланг зад еден ресторан и му наредиле да ја извади раката од џеб, но тој тоа одбил да го стори. Според полицискито извештај, нервозно одел горе-долу и одеднаш од предниот џеб од панталоните извадил некој предмет и со двете раце ги вперил во полицајците, Полицајците истовремено пукале. Оружје на местото на настанот не е пронајдено , а не е објавено кој предмет жртвата го извадила од џебот.

Две години демонстрантите во 170 американски градови протестираат и извикуваат „Не пукај“ и „И животите на црниците вредат“ протестирајќи затоа што белите полицајци во загрижувачки број смртно застрелуваат црните, а таквите полициските убиства на припадниците на афроамериканската заедница во САД потсетуваат на линчувања и тамошната влада мора да стори многу повеќе за да ги заштити, тврди работната група за чијшто извештај ќе расправа Советот за човекови права на Обединетите нации, кој се темели на посетата на САД во јануари годинава на петчлената група со којашто претседава филипинскиот професор по право Рикардо А. Сунга Трети.

Оваа остра критикa, со којашто сегашното постапување на американската полиција се споредува со убиствата на црнците од XIX и XX век, доаѓа во периодот на новиот бран расни тензии во САД. Претходно седмицава во градот Шарлот, во сојузната држава Северна Каролина, избувнаа насилни протести откако црн полицаец го уби црнецот Кејт Скот. Минатиот пето белата полицајка којашто застрела невооружен црнец им се предаден на властите во градот Тулса, во сојузната држава Оклахома.

„Најновите полициски убиства и траумите кои ги предизвикуваат тие, потсетуваат на расистичките линчувања од минатото“, се наведува во извештајот на работната група на ОН составена од експерти за луѓето од африканско потекло кој беше претставен кон крајот на минатата седмица. Повеќето од жртвите на линчувањата се убиени со бесење. Во извештајот на непрофитната организација Иницијатива за еднаква правда од 2015 година, се наведува дека 3.959 црнци се убиени во „расистичките линчувања“ во неколку сојузни јужни држави во периодот од 1877 до 1950 година.

Американските полицајци во минатата 2015 година фатално застрелале околу илјада цивили, се наведува во студијата изработена од весникот The Wasington Post, објавена на почетокот од годинава. Според податоците вкупниот број на жртвите на полициското насилство или прекумерна употреба на сила во САД изнесувал 965 цивили, од кои 564 во моментот на конфликт со полицијата биле вооружени со пиштол, кај други 281 имало оружје од друг вид, и 90 лица биле невооружени. Според студијата, главниот тренд за полициското отворање оган била расната нетрпеливост. Така, и покрај тоа што афроамериканците се само 13 отсто од вкупното население во САД во 2015 година, дури 40 отсто од жртвите на полициската бруталност се токму невооружените црни Американци, покажува базата на податоци на весникот. Исто така, во моментов 40 отсто од сите затвореници во САД се црнци.

Во повеќето случаи, пак, кога полицаец отворил оган и смртно застрелал човек кој го нападнал со некој вид оружје, напаѓачот бил белец, а енормно е помал и бројот кога лицата со заканувачко однесување биле црни или хиспаноамериканци. Весникот го започнал проектот во кој се следат извештаите за жртвите од полициски оган во 2015 година по убиството за кое е обвинет белиот 26-годишен полицаец Дарен Вилсон го застрела 18-годишниот невооружен афроамериканец Мајлк Браун во Фергусон, предградие на Сент Луис, по што започнаа низата протести и безредија ширум САД за многу слични случаи.

Меѓутоа, едно истражување од претходната 2014 година што го спровела непрофитната корпорација ProPublica покажа дека дури 21 пат е поголема веројатноста темнокожите млади Американци да станат жртви на тамошната полиција отколку нивните бели врсници. Соработниците на ProPublica истражувале 1.217 престрелки со полицијата со смртни последици во периодотод 2010 до 2012 година. Притоа, според резултатите од студијата, поголемиот дел од таквите инциденти се однесува на случаи во кои биле инволвирани афроамерикански тинејџери на возраст од 15 до 19 години, односно 31,17 на милион црнци биле убиени во вакви инциденти, наспроти 1,47 на милион белци на споменатата возраст. Анализата на ProPublica покажува дека станува за многу остра разлика, којашто ја илустрира со тоа дека за да биде еднаков ризикот за двете споредувани групи тинејџери, би биле потребно три години во кои седмично би гинеле дури 185 седмично.

Професорот на државниот универзитет Мисури, Дејвид Клингер, експерт за полициска употреба на смртоносна сила, изјави за публикацијата дека бројките можеби и не се точни, бидејќи Федералното истражно биро (FBI) не е обврзано да обезбеди целосни податоци за спроведените истраги. Сепак, според професорот, „малку е веројатно дека има значителна грешка“ во податоците од споменатото истражување.

Истражувањето, исто така, покажува дека просечната возраст на убиените во разни акции на припадници на американската полиција за aфроамериканците изнесува 30 години, додека за белците 35 години.Покрај тоа, меѓу полицајците кои нанеле фатални истрели на тинејџери, поголемиот дел се бели Американци, додека бројот на темнокожите полициски офицери е само 10 отсто.

Активистите на ProPublica го спроведувале истражувањето врз основа на податоците од извештаите на FBI. Во студијата се наведува дека во истражувањето се вклучени детални податоци од повеќе од 12 илјади полициски убиства во периодот од 1980 до 2012 година содржани во извештаи на FBI, при што се забележува контрадикторност во извештаите меѓу стотици полициски станици низ земјата, како и дека во изминатите 33 години недостигаат извештаи од полициски станици за познати случаи. Анализата за ризикот на ProPublica за полициските убиства на тинејџери, како што се заклучува, укажува на она што со децении беше само сомневање дека црните млади мажи се почесто жртви отколкуостатокот од населението на САД.

Ниту Хилари Клинтон ниту Доналд Трамп во своите предизборни говори досега не кажаа ништо што афроамериканците и ги навело да помислат дека како евентуални следни американски претседатели би им ги решиле нивните проблеми. Клинтон неодамна изјави дека ума уште многу непознати за овие инциденти, но дека се знае оти имињата се допишуваат на списокот убиени црнци. Но не пропушти да каже дека полицајците секојдневно храбро иѝ служат на земјата. Со таквата метода на седење на две столици по ова прашање се случи и Трамп, кој наведен оти се надева на смирување на последните расни немири./крај/мф/сн

Извор: Макфакс