Републиканскиот кандидат за американски претседател Доналд Трамп, можеби на легален начин избегнувал плаќање данок цели 18 години, пишува дневниот весник The New York Times (NYT), а њујоршкиот милијардер возврати со обвинување за пристрасност на весникот во претседателската трка и отворена поддршка за демократската ривалка за Белата куќа Хилари Клинтон.

Според документот кој преку електронска пошта минатиот месец му бил испратен на новинар на NYT, Доналд Трамп во 1995 година во својата даночна пријава навел загуба од речиси 916 милиони долари. Според оцената на весникот, пријавата на колосална загуба од 916 милиони долари би била доволна на Трамп да му овозможи на сосема легален начин од своите приходи кои се подложни на оданочување секоја година да одбива 50 милиони долари во текот на 18 години, односно до 2013 година.

Во написот се наведува дека причина за толку големата загуба било неефективното управување во почетокот на 1990-те години со трите казина во Атлантик Сити, во сојузната држава Њу Џерси, неуспешниот обид на Трамп да започне бизнис во сферата на воздухопловниот транспорт, како и тогашниот неуспешен обид да го добие хотелот „Plaza“ на Менхетен. Во написот на NYT не се прецизира дали Трамп ја искористил можноста да ги користи тие даночни олеснувања.

Изборниот штаб на Трамп веднаш објави соопштение, во кое се наведува дека весникот до даночниот документ, кој инаку е таен, дошол на нелегален начин, нарекувајќи го The New York Times „продолжена рака на кампањата на Хилари Клинтон, Демократската партија и нивните глобални лоби групи и интереси“ и се истакнува дека тоа е обид да се забошоти скандалот со електронската пошта на демократската кандидатка во времето кога била државна секретарка со што ја загрозила националната безбедност на САД, но не понесе кривична одговорност.

„Единствената новина се состои во тоа што наводниот документ за данокот е стекнат на нелегален начин и сведочи за тоа дека The New York Times, како и другите провладини медиуми во целина, претставуваат филијала на предизборната кампања на Клинтон…“.

Во соопштението се додава и дека Трамп е „висококвалификуван деловен човек“ кој ја знае даночната политика повеќе „од кој и да е друг кандидат кој некогаш се кандидирал за американски претседател“, како и дека „не е обврзан да плаќа данок повеќе отколку што одредува законот“ и оти магнатот платил стотици милиони долари по разни оданочувања и во добротворни цели. Но во објавата не се наведува загубата од 916 милиони долари.

Штабот на Хилари Клинтон, исто така, се огласи нарекувајќи го Трамп „никаков бизнисмен“, според изјавата на шефицата на кампањата на поранешната прва дама Барајан Фелон.

„Бомба: извештаите на Трамп покажуваат, каков незначителен бизнисмен е тој и колк долго можел да избегнува да плаќа данок“, напиша Фелон на Twitter додавајќи дека од неговиот настап во Пенсилванија се покажало колку „длабоко е потресен“ од објавениот напис во NYT.

Прашањето за плаќањето на даноците за Трамп е многу чувствително, колку што е за Клинтон скандалот со електронската пошта и донациите во семејната Фондација Клинтон од странски влади и компании во времето кога таа беше државна секретарка. Но Трамп и натаму одбива да ја објави својата имотна состојба, што не е практикувано досега во претседателските кампањи, а што го стори Клинтон, и е упорен таа да го објави својот здравствен картон./крај/мф/сн

Извор: Макфакс