Американскиот претседател Барак Обама повтори во петокот дека неговиот сириски колега Башар ал-Асад мора да замине од власта, имајќи предвид дека иднината на сирискиот претседател е едно од прашањата околу кое постојат несогласувања меѓу Вашингтон и Москва во изнаоѓањето решение за тамошната војна, но и оти во Сирија е неопходно да за „изгради мост“ за политичката транзиција, во којашто меѓу другото ќе се земат предвид и интересите на сојузниците на Асад, односно Русија и Иран, а исто така објасни и дека ситуацијата во Либија можеше да прерасне во криза слична на сириската.

Истовремено додека претставниците на големите сили во петокот вечерта по средноевропско време се собираа во Обединетите нации во Њујорк за да разговараат за евентуалниот мировен план за Сирија, американскиот претседател Барак Обама оцени дека мирот во оваа земја опустошена со четиригодишната војна нема да биде постигнат „без легитимна влада“, во текот на својата годишна прес-конференција во Белата куќа.„Мислам дека (сирискиот претседател Башар ал-) Асад мора да замине за да се запре крвопролевањето во земјата и за сите заинтересирани страни да можат да напредуваат. Го загуби секој легитимитет во очите на својата земја. Не можете да ја запрете граѓанската војна сé додека немате влада којашто мнозинството во земјата ја смета легитимна“, изјави американскиот претседател без да прецизира во кој момент од евентуалната политичка транзиција, актуелниот претседател треба да замине од власта.Сепак, според Обама, сега постојат можности да се „изгради мост, да се организира политичката транзиција на власта којашто ќе ги земе предвид интересите на сојузниците на Асад, интересите на Русите, Иранците“. Покрај тоа, американскиот челник укажа и на неопходноста од заштитата на интересите на алавитите, верското малцинство кое принадлежи на шиитскиот ислам од коешто потекнува претседателот Асад. Процесот на политичката транзиција на власта, додаде претседателот на САД, мора да претпочита зачувување на Сирија како унитарна држава, како и прекин на огнот „кој нема да биде идеален, но ќе овозможи концентрирање на главното прашање – уништувањето на Даеш (арапскиот акроним за Исламска држава во Ирак и Левантот – ISIL/ISIS – сега само Исламска држава – IS) и нивните сојузници во регионот“.Истовремено агенциите објавија дека светските сили, меѓу кои и САД и Русија, се договориле во Советот за безбедност на ОН за текстот на резолуцијата со кој се потврдува руско-американскиот мировен план за Сирија, според дипломатите. И покрај тоа што политичката иднина на сирискиот претседател Асад и натаму е главното прашање на несогласувањето меѓу Американците и Русите, американскиот државен секретар Џон Кери последните седмици беше подложен на критики поради ублажувањето на ставот и приближувањето до Москва имајќи предвид дека повеќе не се бара моментално заминување на Башар ал-Асад. Москва инсистира за неговата судбина да одлучуваат само сириските избирачи. Обама на својата последна годишна прес-конференцијата како станар на Белата куќа во петокот порача и дека ситуацијата во Либија би можела да се движи кон состојба слична на актуелната сириска криза, осврнувајќи се дејствијата на западната коалиција во Либија во 2011 година.„Либија е алтернативната верзија на Сирија, во одредена смисла“, рече американскиот претседател. Според Обама, кога меѓународната коалиција се вмеша во конфликтот „таму веќе се водеше граѓанска војна“. Западните сили, со мандатот на ОН „се обидуваа да спречат уште поголема хуманитарна катастрофа“.Обама притоа истакнаа дека оние кои сега зборуваат за поддршката на убиениот либиски челник Муамер ел-Гадафи „заборават дека тој ја загуби легитимноста и можевме да имаме уште една Сирија“./крај/мф/сн

Извор: Макфакс